Ezai 41 - NYANMIƐN NDƐ'N 1998

Ɔ fata kɛ Izraɛlfuɛ'm be fa bé wla gua Anannganman su

¹ Amun nga bɔ amun tran asiɛ i lika nga be o jenvie nuan mun'n, amun `tran diin nan amun `sie amún su mín nuan bo. Man sran'm be tra be anwlɛn, man be wunnge wa, yɛ sɛ be ´kan ndɛ'n, e `wɔ likawlɛ e `ko tran jɔlɛ'n bɔ be wa di'n i bo.

² ?Sran'n b'ɔ ti nanwlɛfuɛ dan'n, wan yɛ ɔ ko tuli i bo wia afiliɛ lɔ bali-ɔ? ?Wan yɛ ɔ fali nvle-nvle mun wlɛli i sa nun nin-ɔn? ?Wan yɛ man ɔ trannin famiɛn be su nin-ɔn? Sɛ e ´kwla se'n, i tokofi'n nunkun be, nvle-nvle'm be nin be famiɛn mun, be kaci ndutre yɛ i ta'n ɔ sanngan be nun, be jaso kɛ ijre bɔ aunngban'n fitɛ i'n sa .

³ Ɔ su be su, ɔ sin be afiɛn kɔ, like fi yo-mɛn i, i ja'm be kan-man asiɛ bɔbɔ.

⁴ ?Wan yɛ ɔ yo sa sɔ mun nin-ɔn? ?Wan yɛ man be nuan'n ɔ yia-a? Sran nga b'ɔ flɛflɛ nvle-nvle mun kɛ ɔ fɛ i bo bolɛ nun nin-ɔn. M bɔbɔ min Anannganman, bɔ n ti ninnge'm be kwlaa be klikli'n, bɔ ninnge kasiɛn'n be ´to min'n, min-ɔn.

⁵ Be nga be tran jenvie nuan mmua mmua lɔ'n, be wun i, yɛ srɛ kun be. Be nga be wo asiɛ'n i awieliɛ lɔ'n, be ba, be wunnge wa ɔ nin usulɛ.

⁶ Sran'm be uka-uka bé wun. Be se be wiengu kɛ: «Tra wɔ anwlɛn!»

⁷ Ajuin difuɛ'n ɔ wla sran ng'ɔ klo sika'n i fanngan, sran ng'ɔ kpita-kpita ninnge bé wun'n b'ɔ man be yo mlanmlan'n, ɔ́ wla blalɛ bofuɛ'n i fanngan. Kɛ b'a tannintannin ninnge mun'n, kpɛkuun i waan: «Ɔ ti kpa o!» Yɛ ɔ fa kpɛngbɛ bobo amuɛn ba'm be nun kɛ ɔ ´yo nan b'a yo kekleke'n ti.

Nán srɛ kun amun siɛn'n

⁸ Sanngɛ Izraɛlfuɛ mun, amun bɔ amun ti min sran mun'n, amun, Zakɔb i osu'n nunfuɛ mun, amun bɔ amun fin min janvuɛ Abraam i osu nun'n ,

⁹ amun bɔ n ko fali amun asiɛ'n i awieliɛ lɔ'n, amun bɔ n ko flɛli amun mmua-mmua lɔ m bali'n, amun bɔ n seli amun kɛ: «Amun ti min sran mun, n kpali amun, n su yi-man amun blo,»

¹⁰ nán srɛ kun amun afin n jin amún sin. Nán amun klun titi amun bɔ amun ´nian wa ´nian wa-a, afin n ti amun Nyanmiɛn. N man amun fanngan, n uka amun. N fa ń sa fama bɔ wunmiɛn o nun'n n fa suan amún bo .

¹¹ Amun `nian, be kwlaa nga be fa amún wun ya'n, nyannzuɛn ´kun be, yɛ bé nyin ɔ ´gua ase. Be nga be kunndɛ amun nin ngondin'n, be ´wie, be ´nunnun mlɔnmlɔnmlɔn.

¹² Be nga be fa utre wla amún sin'n, amun kunndɛ be-ɔ, amun su wun-man be kun. Be nga be nin amun kun alɛ'n, be ´nunnun mlɔnmlɔn, be su wun-man be osu.

¹³ N ti Anannganman amun Nyanmiɛn, n sɔ amún sa. Min yɛ n se amun kɛ: «Nán srɛ kun amun nan n ´uka amun nin-ɔn.»

M ´ba amun delɛ

¹⁴ Zakɔb osu nunfuɛ mun, amun bɔ amun ti kɛ kakaa kanngan mun sa'n, Izraɛlfuɛ kanngan nga amun kali lɛ'n, nán srɛ kun amun, n su ba amun ukalɛ. Min Anannganman bɔ n ti Izraɛl Nyanmiɛn'n, bɔ n ti amún ti kpɔfuɛ'n, min yɛ n se sɔ-ɔ.

¹⁵ N ´fa amun n ´yo kɛ waka nɔnnin bɔ be fa bo ble'n sa, b'ɔ ti uflɛ-uflɛ, bɔ i je'm be ti piembie'n. Amun wa kpukekpuke oka'm be nun, amun ´fufu be nun. Yɛ amun wa yo man kpɔlɛ'm be ´yo kɛ ijre sa:

¹⁶ sɛ n ´kwla se'n, amun wa kpaja be nun kɛ awie sa, seke kun wa sanndi-sanndi be nun, yɛ aunngban'n ´fa be kɔ. Sanngɛ amun liɛ'n, amun klun wa jɔ Anannganman ti, amun wa fa Izraɛl Nyanmiɛn'n ´di amun nuan.

Aawlɛ flɛnnɛn'n ɔ'a kaci nzue lika

¹⁷ Yalɛfuɛ mun nin nyrɛnnɛnfuɛ'm be kunndɛ nzue, sanngɛ be nyan-man wie. Nzue we'n ti be konviabo ɔ'a wu kee. M bɔbɔ min Anannganman n wa tɛ be srɛlɛ'n su. M bɔbɔ min bɔ n ti Izraɛl Nyanmiɛn'n, n su kpɔci-man be.

¹⁸ N ´yo man nzue ´fin kpɔlɛ kplekekpleke'm be nun ɔ ´nyrɛn. N ´yo man nzue ti'm be ´nyrɛn kongo'm be nun, aawlɛ flɛnnɛn'n ɔ ´kaci fɛtɛ, yɛ asiɛ kee'n ɔ ´kaci nzue lika.

¹⁹ N wa ta sɛdri, nin akasia, nin mirt, ɔ nin olivie aawlɛ flɛnnɛn'n nun lɔ. Lika b'ɔ ti kee'n, n ´ta nun siprɛs waka nin pɛn waka, ɔ nin bui.

²⁰ Kɛ ɔ yo sɔ'n, sran'm be kwlaa be ´wun i. Sran'm be kwlaa be ´si sɔ. Be kwlaa be ´wun i sɔ, yɛ be ´wun i wlɛ kɛ Anannganman yɛ ɔ yoli sa sɔ mun-ɔn nan i b'ɔ ti Izraɛl Nyanmiɛn'n yɛ ɔ yili be-ɔ.

Amuɛn'm bé wun ndɛ

²¹ Anannganman waan: «Amun `kpli amún ti man n nian.» Zakɔb osu'n nunfuɛ'm be famiɛn waan: «Amun `yi like nga amun jran su yo sa mun'n be nglo man n nian.»

²² Amun `wunnge wa nan amun `kan sa nga be wa ju'n kle ye. Sa nga bɔ amun dun mmua kannin be laa bɔ be kpɛnnin su'n, amun `kan be kle ye. I liɛ'n e ´bu be akunndan, yɛ kɛ amun kannin'n, sa nga be juli i sin'n, i liɛ'n e ´wun be. Annzɛ kusu amun `kan sa nga be wa ba'n kle ye. I liɛ'n, e ´si kɛ sa nga wa ju.

²³ Amun `kan sa nga be wa ba'n kle ye. I liɛ'n, e si kɛ amun ti Nyanmiɛn sakpa. Amun `yo sa kpa kaan kun annzɛ kusu sa tɛ kaan kun man e nian, nan e kwlakwla e wun i weiin.

²⁴ Amun `nian, amun ti-man like fi mlɔnmlɔn, yɛ ninnge nga amun yo be'n, be ti ninnge ngbɛn-ngbɛn ngunmin. Sran ng'ɔ fɛ i wun wla amun sa nun'n, wuun ɔ'a bo tete dan .

²⁵ N ko tuli sran kun bo mɛn'n i nglo lɔ, ɔ fin wia afiliɛ lɔ bali, ɔ bo min dunman. Ɔ tiatia siefuɛ'm be su kɛ be tiatia nnɔtiɛ'n nun'n sa. Ɔ tiatia be su kɛ sɛ wufuɛ ɔ tiatia i ufa'n su sa .

²⁶ ?Wan yɛ ɔ dun mmua kannin sa sɔ'n bɔ man e kwla sili nun-ɔn? ?Wan yɛ ɔ dun mmua boli su lele nan ɔ'a ju bɔ man e kwla seli kɛ: «I ndɛ yo fɛ-ɔ?» Sran fi a kan-man, sran fi a ti-mɛn i kɛ be su kɛn i sɔ ndɛ, yɛ sran fi a kan-man amun nuan nun ndɛ fi y'a ti-man.

²⁷ Min yɛ n dun mmua'n kɛnnin i Siɔn lɔ kɛ ndɛ yɛ ndɛ yɛ nin-ɔn! N sunmannin jasin fɛ bofuɛ kun Zerizalɛm lɔ.

²⁸ Kɛ n niannin be lele'n, m'an wun-man sran fi be nun b'ɔ kwla kɛn i klun ndɛ-ɔ. Sran fi nun-man lɛ b'ɔ kwla tɛ sa nga be usa'n be su-ɔ.

²⁹ Amun `nian, be ti-man like fi mlɔnmlɔn, yɛ ninnge nga be yo be'n be ti ninnge ngbɛn-ngbɛn ngunmin. Be amuɛn'm be ti kɛ aunngban b'ɔ fita vuu ngbɛn'n sa, nán like fi yɛlɛ be.