Ezai 40 - NYANMIƐN NDƐ'N 1998

FLUWA'N I AKPASUA NNYƆN SU'N Izraɛlfuɛ'm be fɔnvɔlɛ Amun fɔnvɔ min nvle nunfuɛ mun

¹ Amun Nyanmiɛn'n i waan: «Amun `fɔnvɔ min nvle'n nunfuɛ mun, amun `fɔnvɔ be.

² Amun `gua Zerizalɛmfuɛ'm be anwlɛn su nzue, yɛ amun `kpan kekle se be kɛ be alɛ'n ɔ'a wie. Amun `se be kɛ b'a yaci bé wun sa'n b'a cɛ be, afin be sa tɛ nga be yoli'n b'a nyɛn i su akatua sɔ kpɛ nnyɔn Anannganman i sa nun.»

³ N ti sran kun nɛn, ɔ se kɛ: «Amun `siesie Anannganman i atin'n aawlɛ flɛnnɛn'n nun lɔ. Amun `yi akpɔ kun asiɛ kee'n nun man e Nyanmiɛn'n, amun `treke su .

⁴ Man be tannintannin kongo'n kwlaa! Man be tutu oka nin kpɔlɛ'm be ngba! Man be trutru lika kolokolo'm be nun nan be ´yo kpɛkplɛkpɛ. Man be trɛ lika fii'm be nun nan be ´yo gbaun.

⁵ Yɛ Anannganman i nyrun b'ɔ ti nyannyan'n ɔ ´fite nglo. Yɛ sran'm be kwlaa be ´wun Anannganman'n .» Anannganman yɛ ɔ kan sɔ-ɔ.

⁶ Sran nɛn kun se kɛ: «Kan!» Yɛ n tɛli su kɛ: «?Nguɛ ndɛ yɛ n `kan-an?» Sran nɛn sɔ'n tɛli su kɛ: «Sran'm be kwlaa be ti kɛ ijre sa. Yɛ be nyrun nga be lɛ i'n, ɔ ti kɛ ijre'n i nyrɛ'n sa.

⁷ Kɛ Anannganman i aunngban'n ko fita ijre'n su'n, ɔ wu, yɛ i nyrɛ'n ɔ gua. Sakpa, sran'm be ti kɛ ijre sa.

⁸ Ijre'n ɔ wu, yɛ i nyrɛ'n ɔ gua, sanngɛ Nyanmiɛn'n i ndɛ'n ɔ tran lɛ tititi .»

Jasin fɛ b'ɔ fata kɛ be kan'n

⁹ Siɔnfuɛ mun, amun ti jasin fɛ'n i bofuɛ, amun `fu oka fleiin kun su. Zerizalɛmfuɛ mun, amun ti jasin fɛ'n i bofuɛ, amun `man amun nɛn'n su kekle kpa. Amun `man amun nɛn'n su, nán srɛ kun amun. Amun `se Zida klɔ'm be sufuɛ'm be kɛ: «Amun Nyanmiɛn'n yɛ ɔ o yɛ !»

¹⁰ Amun `nian, Anannganman min Nyanmiɛn'n ɔ ba yasua su. I yɛ ɔ sie sran mun-ɔn. Amun `nian, sran'm be akatua'm be wo i sa nun, like nga sran'm be yo'n, i nuan like'n wo i sa nun .

¹¹ Sran'm be ti kɛ i bua sa, ɔ ´ta be kɛ bua tafuɛ kpa'n ɔ fa ta i bua mun'n sa. Ɔ ´fɛ i sa'n flɛ i bua ba mun yɛ ɔ ´tian be nuan, ɔ ´fa be sie i wue'n nun, yɛ bua nga be tɛ man be mma'm be nyɔnflɛn'n, kɛ ɔ ´kle be atin'n, ɔ ´yo be cɛcɛ .

Mɛn'n i siefuɛ'n i dan b'ɔ ti'n nin i ngwlɛlɛ b'ɔ si i'n

¹² ?Wan yɛ ɔ fɛli i sa klun'n sunnzunnin jenvie'n i nzue'n b'ɔ sili i nuan-an? ?Wan yɛ ɔ fɛli i sa ngbabua'n sunnzunnin nyanmiɛn'n b'ɔ la nglo lɔ plaii'n b'ɔ wunnin i tɛnndɛn nun nin i tɛtrɛ nun nin-ɔn? ?Wan yɛ ɔ tiannin asiɛ'n i su ndutre'n kwlakwla i nuan so kun nun b'ɔ sunnzunnin b'ɔ sili kɛ i nɔnnin'n ɔ ti nin-ɔn? ?Wan yɛ ɔ sunnzunnin oka mun nin kpɔlɛ mun toe su-ɔ?

¹³ ?Wan yɛ ɔ si Anannganman i klun lɔ akunndan nin-ɔn? ?Wan yɛ ɔ'a man Anannganman i afɔtuɛ le-ɔ ?

¹⁴ ?Ɔ nin waan yɛ be kokoli yalɛ b'ɔ sran sɔ'n mɛnnin i akunndan-an? ?Wan yɛ ɔ kleli i sa'm be nuan su yolɛ nin-ɔn? ?Wan yɛ ɔ kleli i ngwlɛlɛ-ɔ? ?Wan yɛ ɔ kleli i ngwlɛlɛ'n i atin nin-ɔn?

¹⁵ Be `nian, nvle-nvle'm be nunfuɛ'm be kwlaa be ti kɛ nzue b'ɔ fin so kun nun kpɛn kpɔ'n sa. Be ti kɛ ndutre kan yɛ ɔ o toe'n su sa. Be `nian, lika nga be o jenvie nuan'n be ti kɛ ndutre kan b'ɔ jaso'n sa.

¹⁶ Sɛ be waan be ´fa Liban lɔ bo'n nun waka mun be ´fa yo yie nan be ´yi tɛ'n, ɔ su ju-man sin trɔlɛ. Sɛ be waan be ´fa Liban lɔ nnɛn'm be ngba be ´yi tɛ nga be yra be nnɛn'n kɔlikɔli'n, be su ju-man.

¹⁷ Kannzɛ be kan nvle-nvle'm be kwlaa bo nun'n, be ti-man like fi i nyrun, be ti kɛ be nun-man mɛn'n nun sa.

Nyanmiɛn b'ɔ lɛ-man wunsu'n

¹⁸ ?Wan cɛ yɛ amun ´fa sunnzun Nyanmiɛn-ɔn? ?Nzɔliɛ onin cɛ yɛ amun ´yo b'ɔ ´fa Nyanmiɛn-ɔn ?

¹⁹ Sran'm bɔ bé sa si ngwlɛlɛ'n, be yɛ be yi amuɛn mun-ɔn, be yɛ be klo like kɛ blalɛ sa'n be fa yo be-ɔ. Yɛ ajuin difuɛ'm be klo sika ɔkwlɛ gua amuɛn sɔ'm bé wun, kpɛkuun be fa jɛtɛ ufue jrɔkɔ kanngan sende-sende bé wun.

²⁰ Sran ng'ɔ nian b'ɔ ti yalɛfuɛ'n, b'ɔ kwla to-mɛn i sɔ ninnge liɛ mun'n, ɔ kpɛ kpo fa waka nga wuwa annzɛ nvɔlɛ'm be kwla di-man'n. Yɛ ɔ kunndɛ blo ninnge sɛfuɛ ng'ɔ kwla sɛ i kpa'n b'ɔ su saci-man'n, ɔ fa mɛn i yɛ ɔ sɛ-ɔ.

²¹ ?Amun si-man sɔ? ?B'a kan kle-man amun? ?B'a se-man amun i bobolɛ'n nun? ?Amu'an wun-man mɛn'n i bo ase wlalɛ'n i wun ndɛ'n i wlɛ ?

²² Anannganman ti asiɛ'n i ti su nglo lɔ ɔ man asiɛ'n su sran'm be ti kanngan kɛ lalo mun sa. I yɛ ɔ tinngɛli nyanmiɛn ng'ɔ wo e ti su nglo'n i nun kɛ tannin sa-a, i yɛ ɔ trɛli nun kɛ tannin sua sa yɛ ɔ fa yoli i tranwlɛ nin-ɔn.

²³ I yɛ ɔ yo man wlengbi'm be nyrun'n ɔ wie nin-ɔn, i yɛ man asiɛ'n su jɔlɛ difuɛ'm bé nyin utu ase nin-ɔn.

²⁴ Sɛ be ti waka'n, wuun n ´se kɛ kɛ be ta be bɔ cɛ'n, kɛ Anannganman fita be su'n kpɛkuun b'a wu kee. Yɛ sɛ be ti waka mma'n, wuun n ´se kɛ kɛ be luali be bɔ cɛ'n, kɛ be trali ndin bɔ cɛ'n, kɛ Anannganman fita be su'n, kpɛkuun b'a wu kee. Yɛ seke kun fa be kɔ kɛ ijre sa,

²⁵ «?Wan yɛ amun ´fa min sunnzun i bɔ n ´kwla fɛ i-ɔ?» Nyanmiɛn b'ɔ lɛ-man wunsu'n yɛ ɔ usa sɔ-ɔ.

²⁶ Amun `man amún nyin su nglo be `nian! ?Wan yɛ ɔ yili nzraama mun-ɔn? ?Nán sran nga b'ɔ man be kwlaa be fite nyannglaan nin-ɔn? Ɔ fa be dunman'n flɛflɛ be kwlaa, i kwlalɛ b'ɔ kwla dan'n nin i wunmiɛn dan'n ti'n, wie fi tu-man nun.

Be nga be fanngan'n ɔ'a wie'n be fanngan uflɛ nyanlɛ

²⁷ ?Zakɔb nvle'n nunfuɛ mun, Izraɛlfuɛ mun, nguɛ ti yɛ amun kɛn i titi kɛ: «Anannganman wun-man sa nga be ju é su'n. Kannzɛ e ndɛ yo fɛ'n, e Nyanmiɛn'n ɔ jran-man é sin» nin-ɔn?

²⁸ ?Amun si-man sɔ? ?B'a kan kle-man amun? Anannganman Nyanmiɛn b'ɔ ti adudua'n yɛ ɔ yili asiɛ'n kɛ ɔ fɛ i bue kun su lele fa ju i bue kun su lɔ nin-ɔn. I wunmiɛn'n wie-man, ɔ fɛ-man. Be kwla wun-mɛn i ngwlɛlɛ'n i bo.

²⁹ Sran nga ɔ'a fɛ'n, ɔ mɛn i wunmiɛn. Yɛ ɔ wla sran ng'ɔ ti fakafaka'n i nun fanngan .

³⁰ Fanngan'n wie gbanflɛn'm be nun-ɔn ɔ yo ye, yɛ be kusu be fɛ wie-ɔ ɔ yo ye. Gbanflɛn nga be ti juejue kpa'n, be tɔ cɛn wie-ɔ ɔ yo ye.

³¹ Sanngɛ be nga be fa bé wla gua Anannganman su'n, be liɛ be nyan wunmiɛn uflɛ tititi. Sɛ be ´jaso'n, be jaso kpɛ kunngba waka kɛ anunman nyin'n ɔ fa tu'n sa. Be wanndi, sanngɛ be fɛ-man, be nanti tititi, sanngɛ be wunmiɛn'n wie-man .