Ezai 4 - NYANMIƐN NDƐ'N 1998

¹ I cɛn sɔ nun'n, bla nso be ´tra yasua kun, yɛ be se i kɛ: «E bɔbɔ e ´kunndɛ e like e ´di, e ´kunndɛ é tannin e ´kla. Ɔ dunman'n cɛ yɛ e waan a `fa sie e su nan e nyrun nyannzuɛn ɔ wie-ɔ!»

Zerizalɛmfuɛ bɔ be kali lɛ bɔ b'a wu-man'n

² Cɛn kun'n, mma nga Anannganman luali'n ɔ ´yo nyɛnmɛn. Ɔ ´yo anyrunnyan like. Mma sɔ'n ɔ ´fifi. Ɔ ´yo Izraɛlfuɛ nga be ka'n be liɛ. Ɔ man be ´nyan kɔmin. Yɛ be ´fa di be nuan .

³ I sɔ nun'n, sran nga be ´ka Siɔn lɔ'n, sran nga be ´ka Zerizalɛm lɔ'n, be ´flɛ be kɛ Anannganman i sran mun. Be sɔfuɛ mun yɛ Anannganman klɛli be dunman i fluwa'n nun kɛ be `tran Zerizalɛm lɔ-ɔ .

⁴ Kɛ Anannganman ko salo Siɔn lɔ bla'm bé wun fiɛn'n kɔ wie'n, kɛ ɔ ko salo Zerizalɛmfuɛ'm bé sran bɔ be kun be'n be mmoja'n ko wie'n, kɛ ɔ ko di jɔlɛ'n ko wie'n, kɛ ɔ ko nunnun sa tɛ'n ko wie'n,

⁵ kpɛkuun ɔ ´yo nyanmiɛn ble nin wɛnsrɛn, be ´jran Siɔn oka wunmuan'n nin i sran bɔ b'a yia'm bé ti su nglo lɛ wia'n nun. Kɔnguɛ'n, ɔ ´yo sin b'ɔ jue kpa'n, ɔ ´kpaja be su. Afin Anannganman i nyrun nyannyan'n, ɔ kata be kwlaa be su,

⁶ ɔ ´yo kɛ lika bɔ b'a kata su bɔ kɛ wia'n ɔ ´bo'n ɔ ti fɔnvɔ, kpɛkuun kɛ aunngban'n ´fita bɔ nzue'n ´tɔ'n i kunngba'n ti fiawlɛ'n sa.