Ezai 36 - NYANMIƐN NDƐ'N 1998

Asiri famiɛn'n waan ɔ ´yo Zerizalɛm i tɛtɛ

¹ Kɛ Ezekias yoli famiɛn'n, i afuɛ blu-nin-nnan'n su'n, Sankerib b'ɔ ti Asiri famiɛn'n ɔ fali alɛ wluli Zida klɔ nga be sisili bé wun'n be kwlaa be nun, nan ɔ'a fa be.

² Asiri famiɛn'n sunmannin sonja kpɛnngbɛn'm be su kpɛn Ezekias sin Zerizalɛm lɔ. Kɛ ɔ ´kɔ'n, ɔ nin sonja kpanngban kpa yɛ be ɔli-ɔ. I blɛ sɔ nun'n, wuun i bɔbɔ famiɛn'n wo Lakis. Sonja kpɛnngbɛn'm be su kpɛn sɔ'n, ɔ ɔli nan ɔ'a ko jran nglo lɔ fɛtɛ'n i mmuɛ bɔ be yili'n i wun lɛ. Lika sɔ'n ɔ o ble wlafuɛ'm be lika'n i wun lɛ.

³ Ilkiza i wa Eliakim b'ɔ ti famiɛn'n i awlo'n i su kpɛn'n nin Sɛbna b'ɔ ti famiɛn'n i fluwa klɛfuɛ'n, ɔ nin Azaf i wa Zɔas b'ɔ ti famiɛn'n i nuan ijɔfuɛ'n be fin klɔ'n nun fiteli, nan b'a wɔ i atin kpalɛ.

⁴ Safunyrɛn sɔ'n seli be kɛ: «Amun `ko se Ezekias kɛ famiɛn dan'n, Asiri famiɛn'n waan e `usa wɔ kɛ: ‹?Nguɛ su liɛ a fa ɔ wla'n gua-a?

⁵ ?Kɛlɛ a bu i kɛ ndɛ ngbɛn-ngbɛn bɔ be kan'n yɛ be fa kun alɛ nin-ɔn? Be dun mmua jaja alɛ'n i wafa nga be ko nian su be ko kun'n, kpɛkuun be tra be anwlɛn yɛ be kun-ɔn! ?Nan wan su yɛ a fa ɔ wla'n gua bɔ i ti yɛ a jaso mín wun nin-ɔn?

⁶ ?Nán Ezipt'n i su yɛ a fa ɔ wla'n gua-a? Ezipt'n ti kɛ ndɛma nga bɔ ɔ'a bu'n sa. Sɛ a kisa su-ɔ, ɔ wɔ ɔ́ sa klun fiti i ´bo nun lɔ. Be nga be fa bé wla'n gua Ezipt famiɛn'n su'n, kɛ ɔ ti sɔ man be-ɔ.

⁷ Wie nun-ɔn, amun wa se min kɛ: Anannganman e Nyanmiɛn'n i su yɛ e fa é wla'n gua-a. ?Nɛ́n i yɛ Ezekias bubuli i lika mun nin i sɔwlɛ mun nin-ɔn? ?Ezekias ɔ'a se-man Zidafuɛ mun nin Zerizalɛmfuɛ'm be kɛ san Nyanmiɛn sɔwlɛ ng'ɔ o yɛ'n i kunngba i wun lɔ yɛ be su Anannganman-an ?›

⁸ Nan yoo! Asiri famiɛn'n b'ɔ ti min min'n, i waan amun `kpɛkpɛ: sɛ wɔ yɛ a fali atin klanman'n, ɔ ´fa nnɛn kpanngɔ akpi nnyɔn (2.000) ´man wɔ sɛ a kwla nyan sran fu be su o.

⁹ ?Sanngɛ i kpa nin-ɔn, min min'n i sonja'm be nun kaan kpa'n bɔbɔ'n, a jrɛn i nyrun-ɔn ɔ yo ye? ?Yɛ ɔ yo sɛ ti yɛ a lafi Ezipt famiɛn'n su bɔ a bu i kɛ ɔ ´man wɔ kakaklolo, nin nnɛn kpanngɔ nin-ɔn?

¹⁰ ?Sɛ nán Anannganman i bɔbɔ i fanngan nun yɛ min min'n ɔ ba mɛn nga i nunnunlɛ'n, wuun ɔ wa yo nzu wa?› Anannganman seli i kɛ: ‹A nin be `ko kun, ko nunnun be.› »

¹¹ Ilkiza nin Sɛbna, ɔ nin Zɔas be seli safunyrɛn'n kɛ: «E ´srɛ wɔ kpa ti-ɔ, kɛn i Aram aniɛn'n nun, e ´ti. Nán kɛn i Ebre'n nun, ɔ yo sɔ-ɔ nzrafuɛ'm bɔ be o klɔ'n i wun talɛ'n su'n be ´ti.»

¹² Safunyrɛn'n tɛli be su kɛ: «?Amun bu i kɛ amun nin amun min'n amun ngunmin yɛ e Min'n liɛ'n sunmannin e kɛ e wa kan ndɛ nga e kle amun-ɔn? Sran nga be o klɔ'n i wun talɛ'n su'n, be ti yɛ m bali i kanlɛ-ɔ. Ɔ cɛ kan-an, amun nin sran sɔ mun, amun sewie'n yɛ amun wa di-ɔ, yɛ amun mie'n yɛ amun wa nɔn-ɔn!»

¹³ Safunyrɛn'n wa sin jrannin. Ɔ kpannin kekle ebre'n nun kɛ: «Amun `sie amun su be tie ndɛ nga Asiri famiɛn dan'n kan'n.

¹⁴ Famiɛn'n wan yoo: ‹Sɛ Ezekias laka amun'n, nán amun fa su. Afin ɔ kwla de-man amun!

¹⁵ Sɛ ɔ se amun kɛ amun fa amun wla'n guɛ i Anannganman su nan Anannganman ɔ ´de amun, nan Asiri famiɛn'n su fa-man klɔ nga'n, nán amun fa su.

¹⁶ Nán amun tie Ezekias i ndɛ ng'ɔ kan'n!› Asiri famiɛn'n wan yoo: ‹Amun man e siesie ye afiɛn, amun `fa amun wun man min, i liɛ'n amun ´kwla di amun bɔbɔ amun vinyi'm be su mma nin amun bɔbɔ amun figie'm be su mma, yɛ amun ´kwla nɔn amun bɔbɔ amun gbo'm be nun nzue.

¹⁷ Cɛn nga m ba'n, n ´fa amun n ´kɔ mɛn kun b'ɔ ti kɛ amun liɛ'n sa'n i nun. Ble, nin nzan, nin kpaun, ɔ nin vinyi fie'm be o lɔ kpa.›

¹⁸ Nán Ezekias laka amun se kɛ: ‹Anannganman'n wa de ye. ?Mɛn onin cɛ yɛ i nunfuɛ'm be amuɛn'n be kwla deli be min sa nun-ɔn?

¹⁹ ?Amatfuɛ mun nin Arpadfuɛ'm be amuɛn'm be o nin ndɛ? ?Sɛfarvaimfuɛ'm be amuɛn'm be o nin ndɛ? ?Amuɛn sɔ'm be kwla deli Samari mín sa nun?

²⁰ ?Amuɛn sɔ mun'n, be nun onin cɛ yɛ ɔ kwla deli i mɛn'n mín sa nun-ɔn? ?Yɛ Anannganman'n ɔ ´yo i sɛ yɛ ɔ kwla de Zerizalɛm min sa nun-ɔn?› »

²¹ Be tɔli bliin, b'a tɛ-man su, afin famiɛn seli be kɛ nán man be kan ndɛ fi.

²² Yɛ Ilkiza i wa Eliakim b'ɔ ti famiɛn'n i awlo'n su kpɛn'n nin Sɛbna b'ɔ ti fluwa klɛfuɛ'n, ɔ nin Azaf i wa Zɔas b'ɔ ti famiɛn Ezekias i nuan ijɔfuɛ'n be titili bé wun tralɛ'm be nun-ɔn, nan b'a ko kan ndɛ nga safunyrɛn'n kannin'n b'a kle i.