Ezai 35 - NYANMIƐN NDƐ'N 1998

Izraɛlfuɛ'm be sin salɛ dan'n

¹ Man aawlɛ flɛnnɛn'n nin asiɛ'n b'ɔ yo-man like ye'n, be klun jɔ. Man aawlɛ flɛnnɛn'n i wun kpɛjɛ i, man i nun ijre'm be bo nyrɛ.

² Ijre nyrɛ'm be tran nun sakpa. I wun kpɛjɛ i, yɛ ɔ ´tu kpɛn, ɔ ´to jue i klun b'ɔ jɔ'n ti. Ɔ ´nyan nyrun kɛ Liban mɛn'n sa. Ɔ ´yo nyɛnmɛn kɛ Karmɛl oka'n sa, Ɔ ´yo klanman kɛ Sarɔn lika kpɛtɛkplɛɛ'n sa. Yɛ be ´wun Anannganman i anyrunnyan b'ɔ lɛ i'n nin i nyɛnmɛn b'ɔ ti'n.

³ Be nga bé sa'm b'a kpɔ'n, amun `wla be fanngan. Be nga bé ja nannglunman'm be usu'n, amun `suan be bo .

⁴ Be nga bé wla ɔ'a bo'n, amun `se be kɛ: «Amun `jran kekle, nán srɛ kun amun, amun Nyanmiɛn'n yɛ. Ɔ ba kɛ ɔ wa tu amun klunngbɔ'n ´man amun, yɛ sa nga amun kpɔfuɛ'm be yoli amun'n, ɔ ´yi man be. I bɔbɔ su ba amun delɛ.»

⁵ I blɛ sɔ nun'n, anyansifuɛ'm be ´wun ase, sutrefuɛ'm be ´ti sa.

⁶ Blɛ sɔ nun'n, cɛcɛwafuɛ'm be ´tu kpɛn kɛ flete mun sa. Yɛ aklunjuɛ'n ti bobofuɛ'm be ´kpan. Afin nzue wa nyrɛn aawlɛ flɛnnɛn'n nun, yɛ nzue ba'm be wa sonji mɛn kee'n nun .

⁷ Aunnyan nglɛnglɛ'n ɔ ´kaci nzue fɛtɛ, yɛ mɛn nga nzue we'n wo nun'n, ɔ ´kaci lika kun bɔ nzue ti'm be ´fin nun fite. Lika nga bɔ nsoso'm be la nun'n, ndɛ nin abɛnnya'm be ´fifi lɛ.

⁸ Be wa yi atin kun ´sin lɛ. Be flɛ i kɛ Atin B'ɔ Ti Ngunmin'n. Sran fiɛn fi su sin-man nun, ɔ ´yo Anannganman i nvle nunfuɛ'm be ngunmin be sinwlɛ. Be nga be ´fa su'n, kannzɛ be ti sinnglinfuɛ bɔbɔ'n, be su kwla mlin-man.

⁹ Be su wun-man asɔmɔli fi atin sɔ'n su. Nnɛn tɛ fi su sin-man lɛ. Nnɛn tɛ fi su fa-man su. Be nga Anannganman deli be'n, be yɛ be ´sin nun-ɔn.

¹⁰ Lɛ yɛ be ng'ɔ deli be'n be ´sin yɛ be ´sa bé sin be ´ba-a. Kɛ be ´ba'n, bé wun bɔ ´kpaja be'n ti, be ´to jue lele be wlu Siɔn lɛ. Aklunjuɛ'n ɔ ´yi be piɛ. Bé wun'n ´nyrɛn be, i ti be awlaboɛ'n nin be fɛfɛlɛ'n be wie.