Ezai 34 - NYANMIƐN NDƐ'N 1998

Edɔm i fɔ bulɛ'n

¹ Nvle-nvle'm be nunfuɛ mun, amun `wunnge wa be wa ti ndɛ! Mɛnmɛn'm be nunfuɛ mun, amun `sie amún su kpa. Asiɛ'n sufuɛ mun nin ninnge nga be wo asiɛ'n su'n be kwlaa, nin mɛn'n nunfuɛ mun, ɔ nin ninnge'm be ngba'n, man be sie bé su.

² Anannganman'n i ya'n ɔ wa tɔ nvle-nvle'm be nunfuɛ'm be su. I ya dan'n ɔ wa tɔ be alɛ kunfuɛ akpasua'm be kwlaa be su. Anannganman wa kun be kwlaa, ɔ wa nunnun be ngba.

³ Be nga like nyannin be'n, be ´tru asiɛ wun lɛ. Saka'm be ´bɔn fiaan. Be mmoja'n sonji oka'm be su.

⁴ Nglo lɔ ninnge'm be kwlaa be ´kaci kɛ ndutre sa. Be ´nyɔnnyɔn nyanmiɛn'n b'ɔ la nglo lɔ plaii'n kɛ be nyɔnnyɔn fluwa'n sa, nzraama'm be ´gua kɛ vinyi annzɛ figie nnya bɔ ɔ'a wu b'ɔ su kpɔngbɔ gua'n sa .

⁵ Anannganman'n waan i tokofi'n ɔ'a bo kɛ sran bɔ ɔ'a nɔn nzan'n ɔ'a bo'n sa. Nian, ɔ wa tɔ Edɔm mɛn'n su. Afin Anannganman waan be `nunnun nvle sɔ'n .

⁶ Anannganman i tokofi'n ɔ ti mmoja ngunmin, be fali lui be kpɛkpɛli i wun. A wun i-ɔ, ɔ waan bua bɔ b'a kpɛ cro'n nin boli kpakpuɛ'm be mmoja sa, ɔ waan bua nene'm be aklɛnzia'n i wun lui'n yɛ be fa kpɛkpɛli i wun sa. Afin be su yi tɛ be man Anannganman, be su yi i Bɔzra lɔ. Be su kun sran kpanngban Edɔm mɛn'n nun lɔ.

⁷ Kɛ ɔ ´yo sɔ'n, wuun awuɛ'm be ´tɔ, wuun nannin nga b'a kpɛ cro mun nin nannin tola'm be ´tɔ. Lɔ asiɛ'n ɔ'a nɔn mmoja'n lele ɔ'a ti i. Ndutre'n ɔ'a lua pɔtɔɔ nnɛn lui'n ti.

⁸ Cɛn sɔ'n, ɔ ti Anannganman'n i klunngbɔ tulɛ cɛn. Afuɛ sɔ'n ɔ ti Siɔnfuɛ'm be ti ngondin tulɛ afuɛ.

⁹ Edɔm lɔ nzue ba'm be wa kaci gudrɔn, lɔ ndutre'n ɔ wa yo kɛ sufru sa. Lɔ asiɛ'n ɔ wa yo kɛ gudrɔn b'ɔ su jue'n sa.

¹⁰ Kɔnguɛ o, wia nun o, ɔ su nuan-man. I wɛnsrɛn'n ɔ ´jaso tititi. Mɛn sɔ'n ɔ ´ka lɛ ngbɛn afuɛ'n kwlakwla, sran fi su si-man nun kun mlɔnmlɔn le.

¹¹ Nzue nun anunman bɔ be tra jue sie be konvi bo'n nin jukunin'm be yɛ be ´fɛ i sɔ lika liɛ nin-ɔn. Akpatue mun nin kɔkɔkuankuan'm be ´tran nun. Nyanman kan'n nin nyanman bɔ sunmun wo i nuan'n, lika'n bɔ Anannganman ɔ ´saci i'n ti'n, ɔ ´fa be ´fa sunnzun.

¹² I su sran kpakpa'm be wie fi su ka-man lɛ nan se kɛ be ´kan famiɛn sielɛ ndɛ. Famiɛn i awlo lɔ sran dandan wie fi su tran-man lɛ.

¹³ Famiɛn'm bé sua'm be wa kaci susrɛ. Flɔn nin owie-owie'm be ´fifi fiawlɛ sua'm be nun. Nsoso mun yɛ be ´tran sua sɔ'm be nun-ɔn, klɔnsoklo mun yɛ be ´la lɛ-ɔ.

¹⁴ Blo jɛkuajo mun nin gboklo'm be ´yia lɛ. Sɛ e ´kwla se'n, lɛ yɛ boli kpakpuɛ'm be ´flɛflɛ be wun-ɔn. Lɛ yɛ Babilɔni lɔ mmusu bɔ be wun i kɔnguɛ'n ɔ sike b'ɔ ´nyan wunmiɛn dewlɛ-ɔ.

¹⁵ Wuo'm be ´la be buɛ nun lɛ. Be ´to lɛ, be ´utu be klenzua'm bé su lɛ, lɛ yɛ be ´bobo-ɔ, yɛ lɛ yɛ be ´nian be mma'm be su-ɔ. Lɛ yɛ anunman nyin'n be kusu be ´yia-a.

¹⁶ Amun `fa Anannganman i fluwa'n be nian nun, amun `kanngan. Be klɛli i nun kɛ: Be wie fi su tu-man nun, be wie fi sa su mlin-man. Afin Anannganman yɛ ɔ sieli i sɔ-ɔ. I wawɛ'n yɛ ɔ yiali nnɛn sɔ'm bé nuan-an.

¹⁷ Anannganman bɔbɔ yɛ ɔ tuli fɔtɔ fa cɛcɛli lika nun-ɔn. Ɔ fɛli i nyanman'n fa sunnzunnin mannin be bé ti nun ti nun. Ɔ ´yo be liɛ tititi. Ɔ ´yo be tranwlɛ blɛ'n kwlaa nun.