Ezai 32 - NYANMIƐN NDƐ'N 1998

Famiɛn'n b'ɔ ti sran kpa'n

¹ Famiɛn kun ɔ ´nian mmla'n su ɔ ´sie mɛn'n, i awlo lɔ sran dandan'm be ´yo sa'm be nuan su.

² Be ngba be wa yo kɛ like bɔ be fiɛ i bo bɔ kɛ aunngban'n ɔ ´fita'n ɔ nyan-man be'n sa. Be ´yo kɛ lika bɔ be fia nun, bɔ kɛ aunngban dan'n ɔ ´tu'n, ɔ kan-man be'n sa. Be ´yo kɛ nzue ba b'ɔ sonji lika kee nun'n sa. Be ´yo kɛ yɛbuɛ dan wie b'ɔ man fɔnvɔ lika bɔ waka fi fifi-man lɛ'n sa.

³ Be nga be nyinma'n gua su'n, ɔ su si-man. Be nga bé su'n ti tikewa'n, be ´sie be su.

⁴ Sran nga be si-man ngwlɛlɛ kpa'n, be ´wun sa'm be wlɛ. Bɛbɛlifuɛ'm be wa ijɔ ndɛndɛ, yɛ be ´kan ndɛ weiin-weiin.

⁵ Sran b'ɔ ti sinnglinfuɛ'n, be su se-man kɛ ɔ ti sran ndɛnman su kun. Sran b'ɔ ti gblɛfuɛ'n, be su se-man kɛ ɔ ti sran bɔ i klun ti ufue'n kun.

⁶ Sinnglinfuɛ'n i nuan nun ndɛ'n ti tɛtɛ ngunmin. Sa tɛ'n i yolɛ'n yɛ ɔ o i akunndan'n nun-ɔn. Ɔ kpɔ Nyanmiɛn. Ndɛ nga be saci i wun'n yɛ ɔ kan be-ɔ. Sran nga awe kun i'n, ɔ mɛn-mɛn like ɔ di-man. Yɛ nga nzue we kun i'n, ɔ mɛn-mɛn i nzue ɔ nɔn-man.

⁷ Gblɛfuɛ'n i ninnge ng'ɔ yo be'n be ti tɛtɛ ngunmin. Sa ng'ɔ ko yo be nan yalɛfuɛ'm b'a wun-man bé wun fɛ'n yɛ ɔ yo-ɔ. Ɔ kan gblɛ ndɛ mun kle be. Kannzɛ nyrɛnnɛnfuɛ sɔ'm be ndɛ yo fɛ'n, ɔ yo man be wun-man bé wun fɛ.

⁸ Sanngɛ sran kpa'n i liɛ'n, akunndan kpa cɛ yɛ ɔ bu-ɔ. Yɛ sa kpa cɛ yɛ ɔ yo-ɔ.

Zerizalɛm bla'm bé wun ndɛ

⁹ Amun bla mun bɔ amun bu i kɛ amu'an nyan amun ti'n, amun `jaso nan amun `tie ndɛ nga n kan'n! Amun talua mun bɔ amun fa amun wla gua amun bɔbɔ su'n, amun `fa amun su sie min nuan bo!

¹⁰ Ɔ ka afuɛ kun ɔ gua su kan'n, amun bla mun bɔ amun fa amun wla gua amun bɔbɔ su'n, amun ´usu. Afin vinyi'n su yo-man kpa, yɛ be su nyan-man ble.

¹¹ Amun bla mun bɔ amun bu i kɛ amu'an nyan amun ti'n, man srɛ kun amun. Amun bla mun bɔ amun fa amun wla gua amun bɔbɔ su'n, amun `usu. Amun `yi amún wun tralɛ'n gua, amun `kpa amún wun, amun `fa tannin b'ɔ ti sɛ nzɔliɛ like'n `ci amun afiɛn.

¹² Amun `fin amun wue'n nun, amun `sun fie nglanman nin vinyi bɔ be su nglanman bɔ b'a saci'n be ti.

¹³ Min nvle'n nunfuɛ'm be asiɛ'n, ndre tɛ'n yɛ ɔ'a fu nun siɛn nin-ɔn, yɛ owie-owie'm b'a fifi nun. Klɔ'n bɔ be si able su'n, ndre tɛ sɔ'n ɔ'a fu nun wie, yɛ owie sɔ'm b'a fifi nun wie.

¹⁴ Famiɛn'n i awlo'n, b'a tu nun, klɔ'n bɔ i su ti wluwlu'n, sran fi nun-man su kun. Kpɔlɛ'n nin sasawlɛ sua'n b'a ka lɛ ngbɛn, be ´ka lɛ sɔ tititi. Lɛ yɛ blo aflunmun'm be kan ngowa-a, lɛ yɛ nnɛn'm be didi-ɔ.

Ninnge'm be kacilɛ'n i su ndɛ

¹⁵ Cɛn kun wa ju bɔ Nyanmiɛn ɔ ´fɛ i wawɛ'n ɔ ´man ye. Kpɛkuun aawlɛ flɛnnɛn'n ɔ ´kaci kɛ lika bɔ be tali nun waka'n sa, yɛ lika bɔ be tali nun waka'n, ɔ ´kaci bo ble .

¹⁶ Be wa di jɔlɛ nanwlɛ aawlɛ flɛnnɛn sɔ'n nun, yɛ be wa yo sa i nuan su lika'n bɔ be tali waka nun'n i nun.

¹⁷ Sɛ e ´kwla se'n, like ng'ɔ su sa nuan su yolɛ'n su'n yɛlɛ aunjuɛ. Yɛ ɔ yo man bé wla gua ase tititi, yɛ sa su nyan-man be.

¹⁸ I nvle'n nunfuɛ'm be wa tran aunjuɛ lika kun nun. Be ´tran lika bɔ be klun titi-man be lɛ'n nun. Be ´tran kan lɛ ti diin'n nun.

¹⁹ Sanngɛ laglasi b'ɔ fin nglo lɔ gua'n i ti'n, bo'n ɔ ´saci, yɛ klɔ'n ɔ ´bubu tɛ kpa.

²⁰ Sanngɛ be bɔ be lua like nzue'm be nuan'n, bɔ be yaci nannin mun nin aflunmun'm be nun be kɔ kan be klo'n, be liɛ su ti ye.