Ezai 30 - NYANMIƐN NDƐ'N 1998

Sa wafa nga Nyanmiɛn klo-mɛn i'n

¹ Anannganman wan yoo: «Ba nyin keklefuɛ mun, amun yako! Kɛ amun bu sa'm be yolɛ akunndan'n n wun-man nun. Amun kpɛ anuansɛ wie mun bɔ nán min yɛ n kleli kɛ amun yo-ɔ. Amun yo sa tɛ be uka sa tɛ su!

² Kɛ amun ´kɔ Ezipt'n, amu'an kale-man min. Ezipt famiɛn'n yɛ amun ko talo i-ɔ. Eziptfuɛ mun yɛ amun waan be `nian amun su-ɔ.

³ Sanngɛ Ezipt famiɛn'n i talolɛ bɔ amun ´kɔ lɛ'n, amún nyin yɛ ɔ ´gua ase-ɔ, Eziptfuɛ'm bé sin nga amun ´ko fialɛ'n, nyannzuɛn yɛ amun ´wun i-ɔ.

⁴ Kɛ e ´se yɛ'n, amun awlo lɔ sran dandan'm b'a ju Sɔan, yɛ amún nuan jranfuɛ'm b'a ju Anɛs.

⁵ Bé nyin yɛ ɔ ´gua ase-ɔ, afin Eziptfuɛ'm be su kwla uka-man be, be su kwla de-man be, yɛ be su kwla nian-man be lika. San nyannzuɛn cɛ yɛ bé ´wun i-ɔ, yɛ sokpalɛ cɛ yɛ be ´sokpa be-ɔ.»

Be su ko kunndɛ ukalɛ Eziptfuɛ'm be sa nun

⁶ Mɛn i ngua lɔ nnɛn'm bé wun ndɛ. B'a fa anyanbeun ninnge mun b'a sua aflunmun mun, b'a fa ninnge kpakpa mun b'a sua nyɔnngɔnmɛn mun, be su fa ko man sran'm bɔ be su kwla uka-man be'n. Nyrɛnnɛn, nin awlaboɛ lika'n, b'ɔ ti asɔmɔli bla, nin asɔmɔli yasua, nin ɔnda, ɔ nin dragɔn ng'ɔ tu'n be lika'n, lɛ yɛ be sin-ɔn.

⁷ Sɛ be se wɔ kɛ Eziptfuɛ'm be kwla uka be'n, ɔ ti ato. I sɔ'n ti n flɛ Eziptfuɛ'm be kɛ Raab b'ɔ yo-man like fi'n.

Be klo-man kɛ be wun sa kpa mun

⁸ Anannganman seli Ezai kɛ: «Klɛ ndɛ sɔ mun like kun su. Yɛ klɛ be fluwa kun nun. Klɛ be Zerizalɛmfuɛ'm be nyrun lɛ. Klɛ nan ɔ `ka lɛ tititi, nan ɔ `yo lalofuɛ cɛn wie.»

⁹ Afin sran sɔ'm bé nyin ti kekle, be ti ba bɔ be sɔn-man bé su, bɔ be klo-man kɛ be ti min Anannganman min mmla mun.

¹⁰ Be se jeliwafuɛ'm be kɛ: «Amún ti nun ase wunlɛ'n ti ngbɛn.» Be kan kle be nga be wun aolia nun sa'm be kɛ: «Nán amun kan sa nanwlɛ bɔ amun wun be'n kle ye. Amun `kan ato ndɛ mun kle ye. Amun kan ndɛ b'ɔ yo be su nun nɛnkɛn-nɛnkɛn'n.

¹¹ Amun `jaso nanwlɛ atin'n su, amun `yaci atin kpafuɛ'n. Nán amun bo Izraɛl Nyanmiɛn'n i dunman'n su kle ye kun.»

Sacilɛ b'ɔ lɛ-man ayre'n i ndɛ

¹² Amun `nian, Izraɛl Nyanmiɛn'n wan yoo: «Kɛ bɔ amun fa-man ndɛ nga n kan kle amun'n su'n, bɔ amun fa amún wla guɛ i akpo bolɛ nin gblɛgblɛ ninnge'm be su'n,

¹³ amun fɔnlɛ sɔ'n, ɔ ti kɛ klɔ'n i wun talɛ nglo-nglo b'ɔ kpaci kplala kpɛkuun ɔ wunndun'n sa. I tɔlɛ'n ɔ fu sran'm be nun, ɔ jranjran-man.

¹⁴ Ɔ fufu kɛ talie ufuɛ'n i talie'n wie yɛ b'a fa like b'a fin su kekle kpa sa. I buebue nun'n, be nyan-man bɔ kaan sa bɔ be fa fa sin gbo'n nun-ɔn ɔ yo ye-ɔ, annzɛ bɔ be fa sa nzue bla'n nun-ɔn ɔ yo ye-ɔ.»

Amun `tran diin, amun `lafi min su

¹⁵ Sa nga Anannganman Nyanmiɛn b'ɔ ti Izraɛl Nyanmiɛn'n ɔ kan'n yɛ. I waan: «Sɛ amun sa amún sin amun ba min sin ekun'n, yɛ sɛ amun tran diin'n, yɛ amun ´nyan amun ti-ɔ. Sɛ amun gua amun wla ase, yɛ sɛ amun lafi min su'n, yɛ amun ´nyan wunmiɛn-ɔn. Sanngɛ amun klo-man kɛ amun ´yo sɔ.

¹⁶ Amun waan: ‹E kplin-man su, e ´fu e nnɛn kpanngɔ'm be su e ´wanndi e kɔ.› Ɔ ´yo sɔ bɔ le, sanngɛ amun su kɔ-man sa ngbɛn, san be ´fuan amun yɛ amun ´wanndi kɔ-ɔ. Amun waan: ‹E ´fu e nnɛn kpanngɔ nga bé ja nun yo mmlɛ'n be su yɛ e ´kɔ-ɔ.› Ɔ ti sɔ, sanngɛ be bɔ be ´fuan amun'n, be wa kwla wanndi tra amun.

¹⁷ Amun kpɔfuɛ'm be nun sran kunngba ɔ ´wlanwlan amun nun sran akpi. Yɛ sɛ be nun sran nnun be wlanwlan amun'n, amun ngba kwlaa amun ´wanndi. I agualiɛ su'n, be nga be ´nyan nguan'n, be ngunmin yɛ be ´ka lɛ-ɔ. Be ´yo kɛ waka wie bɔ b'a kplɛn i oka kun su, bɔ i ngunmin o lɛ couun'n sa. Be ´yo kɛ nzɔliɛ kun bɔ b'a fa sie i kpɔlɛ kun su'n sa.»

Delɛ blɛ'n

¹⁸ I sɔ'n ti, Anannganman'n sunnzun kɛ ɔ ´yo amun ye, i waan ɔ ´si amun aunnvuɛ. Afin Anannganman ti Nyanmiɛn kun b'ɔ yo sa i nuan su. Be kwlaa bɔ be fa bé wla guɛ i su'n, be liɛ su ti ye .

¹⁹ Siɔnfuɛ mun, amun bɔ amun tran Zerizalɛm, amun su sun-man mlɔnmlɔn kun le. Sɛ amun kpan flɛ Anannganman'n, ɔ ´si amun aunnvuɛ. Sɛ ɔ ti amun ngan'n, ɔ ´ka lɛ tɛ amun su.

²⁰ Amun nyrɛnnɛn blɛ nun'n, Anannganman ɔ ´man amun aliɛ. Amun afɛ blɛ nun'n, ɔ ´man amun nzue. Sran ng'ɔ kle amun like'n su fia-man kun, sanngɛ sran sɔ'n b'ɔ kle amun like'n, amun nyinma ɔ ´tɛ i.

²¹ Sɛ fama su annzɛ bɛ su yɛ ɔ fata kɛ amun wɔ'n, amun wa ti aniɛn kun b'ɔ ´kpan su amun su. Ɔ ´se kɛ: «Atin'n yɛ ɔ o yɛ, amun `fa su.»

²² Amun amuɛn mun bɔ amun klo jɛtɛ ufue annzɛ sika ɔkwlɛ gua be wun'n, amun `bu be like fiɛnfiɛn. Amun `gua be blo kɛ be gua like tɛtɛ'm be blo'n sa. Amun `se be kɛ: «Amun `fɛ li sɔ'n be fite lɔ.»

²³ Kpɛkuun Anannganman ɔ ´yo man nzue ´tɔ ninnge nga amun luali'm be su. Yɛ amun ´nyan aliɛ b'ɔ ti kpa, amun ´nyɛn i kpanngban kpa. I blɛ sɔ nun'n, lika nga amun nnɛn'm be didi nun'n, be ´yo tɛtrɛ kpa.

²⁴ Amun nannin mun nin amun aflunmun bɔ amun fa be tutu kacɛ'n, be ´di ijre kpa bɔ njin o nun'n. Ijre sɔ'n, be ´kpaja nun yɛ be ´fa man be-ɔ. Be fa peli be ´trɛtrɛ nun ´man be.

²⁵ Sran'm be kunlɛ cɛn dan nun nin klɔ'm be sasawlɛ sua'm be bubulɛ blɛ nun'n, nzue ba wie'm be ´sonji oka kendenglein'm be kwlaa su nin kpɔlɛ nglo-nglo'm be kwlaa su.

²⁶ Cɛn nga Anannganman ´cici i nvle nunfuɛ'm be kannin'm be su'n, b'ɔ ´fua bé wunnɛn bɔ ngble'n tutuli i fofo'n, anglo'n ɔ ´ta kɛ wia'n sa, wia'n kusu ɔ ´bo tra titi liɛ'n sɔ kpɛ nso, ɔ ´bo kɛ cɛn nso wia sa.

Nyanmiɛn su ba Asirifuɛ'm be nyrɛnnɛn klelɛ

²⁷ Amun `nian, Anannganman'n bɔbɔ fin mmua lɔ su ba. Ɔ'a fa ya dan kpa. Ndɛ ng'ɔ fin i nuan fite'n ti ya ndɛ, i nuan nun ndɛ'n ti kɛ sin sa.

²⁸ Kpukpuwa ng'ɔ fin i bue nun fite'n, ɔ ti kɛ nzue ba wie bɔ ɔ'a yi ɔ'a ju be kɔmin nun'n sa. Ɔ wa fa nyrɛnnɛn'n yi i nvle-nvle'm be nunfuɛ'm be su, ɔ ´fa sa be nian. Sɛ e ´kwla se'n, ɔ ´wla bé nuan nun nga kɛ nnɛn kpanngɔ'm be liɛ'n sa, ɔ ´fa be kɔ kan be klo-man'n.

²⁹ Sanngɛ amun liɛ'n, amun wa to jue kɛ cɛn bɔ be di i kɔnguɛ'n sa. Amun klun wa jɔ kɛ be su bo blo nan amun su kɔ Anannganman b'ɔ ti kɛ Izraɛlfuɛ'm be yɛbuɛ sa'n i oka'n su lɔ sa.

³⁰ Anannganman ɔ wa ijɔ, ɔ man be ´ti i nɛn'n b'ɔ yo sro'n. Kɛ ɔ fa ya'n, wafa ng'ɔ fɛ i sa bo sran'n, ɔ ´yi i nglo. Ɔ ´yi i nglo sin dan kun b'ɔ ´jue vlauun-vlauun'n nun, ɔ nin nzue kun b'ɔ ´tɔ, b'ɔ ´yi ɔ fa lika kwlakwla'n i nun, ɔ nin aunngban dan kun b'ɔ ´fita'n nun, yɛ ɔ nin nzraama bɔ kɛ nzue ´tɔ ɔ gua'n i nun.

³¹ Kɛ Anannganman i nɛn'n ko tɛ'n, srɛ ´kun Asirifuɛ mun. Ɔ ´fɛ i ngble'n ɔ ´bo be.

³² Be ngble nuan kwlaa nga Anannganman ´bla be'n, sran'm be ´bo su klɛn nin jru. Anannganman bɔbɔ nin be ´kun.

³³ Be trɔli sin kun ɔ'a cɛ. Famiɛn'n i bɔbɔ liɛ o nun. Sin sɔ'n i trɔwlɛ'n ti klukluklu, ɔ ti tɛtrɛ, yɛ ɔ ti kploun, be ´fa yie kpanngban kpa yɛ be ´trɔ-ɔ. Anannganman i bue nun kpukpuwa'n yɛ ɔ ´sɔ i nuan-an. Ɔ wa yo kɛ sufru kpanngban yɛ ɔ su jue sa.