Ezai 3 - NYANMIƐN NDƐ'N 1998

Sa sukusuku b'ɔ o Zida nvle nun'n i su ndɛ

¹ Nian, e Min Anannganman b'ɔ sie mɛn wunmuan'n, ɔ wa yo man aliɛ'n nin nzue'n bé bo ´tu Zerizalɛm klɔ'n nin Zida nvle'n nun. Ɔ wa yo man like nga be kisa su'n i kwlaa ɔ ´wie sa weiin.

² Like sɔ mun yɛlɛ safunyrɛn mun nin alɛ sran mun, nin jɔlɛ difuɛ mun, nin Nyanmiɛn nuan ijɔfuɛ mun, nin wunnzue yifuɛ mun, nin kpɛnngbɛn mun,

³ nin sran ablenun su kpɛn mun, nin sran nga be lɛ dunman mun, nin afɔtuɛ manfuɛ mun, nin sran nga be si be junman'n di kpa mun, ɔ nin sran nga be si bae di kpa mun.

⁴ N ´fa gbanflɛn kanngan mun n ´yo sran sɔ'm be famiɛn i awlo lɔ sran dan. Ba kanngan mun yɛ be ´sie be-ɔ.

⁵ Nvle sɔ nun'n, nga ´jaso ɔ ´yo i wiengu sa, nga ´jaso ɔ ´yo i wiengu sa. Gbanflɛn'n ɔ ´yo kpɛnngbɛn'n i like kekle. Sran finfinfuɛ'n ɔ ´jaso sran kpa'n i wun.

⁶ Yɛ sran wie ɔ ´trɛ i niaan bian i si awlo nun, ɔ ´se i kɛ: «Kɛ bɔ a lɛ tralɛ dan'n , yo e su kpɛn, sie lika bubuwa nga mun.»

⁷ Sanngɛ i cɛn sɔ nun'n, sran sɔ'n ɔ wa se kɛ: «N su kwla yo-man, yɛ min awlo lɔ'n, n lɛ-man kpaun nin tralɛ dan, nán amun fa min sie sran'm be su kpɛn.»

⁸ Zerizalɛm'n ɔ'a tɔ, Zida'n ɔ'a fin ase. Be nuan nun ndɛ mun nin be nyoliɛ mun be kle kɛ be jaso Anannganman b'ɔ ti famiɛn'n i wun.

⁹ Be wafa nga be ti'n, ɔ saci bé wun. Be yo be sa tɛtɛ mun wia klengle kpa'n nun kɛ Sodɔm lɔ fuɛ'm be sa, be fia-man bɔ kaan sa. Be yako! Afin be liɛ'n, be bɔbɔ be nyrɛnnɛn trɔ'n yɛ be su wlɛwlɛ i lɛ-ɔ.

¹⁰ Amun `se kɛ: «Sran nga Nyanmiɛn bu i sran kpa'n, ɔ wo atin kpa'n su, i sa kpa ng'ɔ yo'n, ɔ ´nyɛn i nuan like.

¹¹ Sran tɛ'n, i yako! Ɔ wo atin tɛ'n su, afin sa ng'ɔ siesie'n, yɛ be ´fa yo i-ɔ.»

¹² Ba kanngan mun yɛ be yo min sran'm be tɛtɛ-ɔ, bla mun yɛ be sie be-ɔ. Min sran mun, amun nyrun dunfuɛ'm be mlinnin amun. Be kata atin nga amun sin nun'n.

Kpɛnngbɛn'm be jɔlɛ dilɛ

¹³ Anannganman ɔ'a yi i wun nglo ɔ su wa di jɔlɛ, ɔ'a jaso kɛ ɔ ´di sran'm be jɔlɛ.

¹⁴ Anannganman su di i sran'm be afɔtuɛ manfuɛ mun nin be kpɛnngbɛn'm be jɔlɛ. Ɔ se be kɛ: «Amu'an saci vinyi'n. Like nga amun fali be yalɛfuɛ'm bé sa nun'n, be o amún sua'm be nun.

¹⁵ ?Nzu ti yɛ amun tin min sran'm be su-ɔ? ?Nzu ti yɛ amun yo yalɛfuɛ'm be tokotoko sɔ-ɔ?» Min, Anannganman bɔ n sie mɛn wunmuan'n min yɛ n usa sɔ-ɔ.

Zerizalɛm lɔ bla klanman mun

¹⁶ Anannganman waan: «Kɛ bɔ Siɔn bla'm be tu bé wun'n, kɛ bɔ be ´nanti-ɔ be tinngɛ be kɔmin'n nun'n, kɛ bɔ be ´nian sran-an, be kacikaci be nyinma'n nan be `kannvun be'n, kɛ bɔ be ´nanti-ɔ, be tu bé ja'n kunngun-kunngun wuun bé ja nga'm be ´tɛ gleinglein'n ti'n,

¹⁷ n wa yo nan bé ti'n ɔ `kpa . Yɛ n wa tike be ngban'n su.»

¹⁸ I blɛ sɔ nun'n, Anannganman ɔ ´yi be blɛ dilɛ ninnge nga be o yɛ mun: bé ja kɔmin nun nga mun, tɛ nga be fa cici bé ti'n, niannun nga be wlawla bé ti nun bɔ be ti kɛ anglo ba sa'n,

¹⁹ be su nun asunmanndi mun, be sa nga mun, nin be tannin nga be fa kata bé nyrun'n,

²⁰ bé ti kle mun, bé ja jrɔkɔ kanngan mun, be afiɛn kplo nga be wɔli'n mun, be amuɛn ba mun, nin be muae nyanman mun,

²¹ be bue nun nga mun,

²² be cɛn dilɛ tralɛ mun, be tralɛ nga bé jra kli'n mun, be tralɛ dandan mun, bé sa nun pata kanngan mun,

²³ be niannun mun, be tralɛ vɛɛ mun, be tannin nga be fa cici be kɔmin nun'n, ɔ nin nga be fa gua be wati su'n.

²⁴ Ninnge kplɔwa'm be nvan'n ɔ ´sin parfɛn'n i bɔnlɛ'n i osu. Be ´fa nyanman be ´yo bé bo kplo. Be su yo-man bé ti'm be kun , be ´yi be treketreke. Be su wla-man cɛn dilɛ tralɛ kun, bajɛ tralɛ yɛ be ´wla-a. Be wunnɛn'n su nzɔliɛ'm be su yo-man nyɛnmɛn kun, be ´yo kɛ sin osu sa.

Zerizalɛm angboti mmla mun

²⁵ Zerizalɛm, alɛ'n wa di ɔ su sran mun, ɔ lɔ safunyrɛn'm be ´wu alɛ'n nun.

²⁶ Ɔ nunfuɛ'm be kwlaa be ´bo awuyomo, be ´yi ngwlɛ. Be ´sun kɛ bla bɔ i ninnge ng'ɔ lɛ i'n i kwlaa ɔ'a fi i sa, b'ɔ tran asiɛ ba kpa'n su sun'n sa.