Ezai 29 - NYANMIƐN NDƐ'N 1998

Zerizalɛm sacili wieli, kpɛkuun ɔ fiteli nun ndɛndɛ kpa'n

¹ «Ariɛl klɔ'n bɔ David kpɛli i ngblaliɛ sin yiɛli i laa'n, be `se i kɛ i yako o, yako! Amun `di amun cɛn mun man be wie. Afuɛ ekun'n,

² n ´kle amun nun. Amun ´fɛfɛ, amun ´kplin. Klɔ'n ɔ ´yo kɛ min sɔwlɛ sa.

³ N ´kpɛ min ngblaliɛ'n klɔ'n i sin. N ´siesie sonja mun klɔ'n i sin, yɛ n ´yo lika bɔ be ´fiafia nun'n i sin.

⁴ Be ´kan klɔ'n i sufuɛ'm be ase. Kɛ be ´ijɔ'n, be aniɛn'n ɔ wa yo kɛ be wo asiɛ'n bo lɔ yɛ be ijɔ sa. Kɛ be ´kan ndɛ'n, be nɛn'n ɔ wa yo kɛ be o ndutre'n i bo lɔ yɛ be kan sa. Be nɛn'n ɔ ´fin asiɛ'n bo lɔ fite kɛ mmusu wie nɛn sa. Kɛ be o ndutre'n i bo lɔ'n, be ijɔ-ɔ, be su ti-man afin ɔ ´yo kɛ be su tu aswre sa.

⁵ Amun kpɔfuɛ'm be ´yo kpanngban kɛ ndutre sa, sran'm bɔ be kle amun yalɛ'n, be ´yo kɛ ijre'n b'ɔ jaso yengeiin blɛ bɔ aunngban'n ɔ fita'n sa. Amun nyin bɔ amun ´bo i bla-a, be yɛ be o yɛ.»

⁶ Anannganman b'ɔ sie mɛn wunmuan'n ɔ wa nian amun osu. Kɛ ɔ ´ba'n, nyanmiɛn'n ɔ ´kpla, asiɛ'n ɔ ´keje, nganniɛn dan kpa kun ´tɛ, seke'n ´tu, aunngban dan kun ɔ ´fita, yɛ sin dan kun ɔ ´jue vlauun-vlauun.

⁷ Nvle kpanngban nga be nunfuɛ'm be nin amun wa kun'n, ɔ ´yo kɛ laliɛ nun annzɛ aolia nun sa. Be kwlaa nga be wa tɔ amun su'n, bɔ be wa tɔ klɔ'n i sasalɛ lika'n su'n, ɔ ´yo sɔ ekun.

⁸ Sran bɔ awe kun i'n, bɔ kɛ ɔ ´cɛn laliɛ-ɔ ɔ su di like sanngɛ kɛ ɔ ´jaso-ɔ i ku'n ti paplapa'n, sran bɔ nzue we kun i'n bɔ kɛ ɔ ´cɛn laliɛ-ɔ ɔ su nɔn nzue sanngɛ kɛ ɔ ´tinnge-ɔ, i wunmiɛn'n ɔ'a wie i nun kpɛkuun i konviabo'n ti usi-usi'n, i kunngba nin-ɔn, nvle kpanngban nga be nunfuɛ'm be nin Zerizalɛmfuɛ'm be wa kun'n, kɛ be ´yo sɔ-ɔ.

Nyin silɛ nin nzanboɛ

⁹ Man amún nuan'n `bo amún wun, yɛ man srɛ kun amun. Kɛ ɔ yo nan amu'an wun-man ase'n, amun `kata amun nyin. Amun yo kɛ nzan ɔ'a bo amun sa. Amun `nanti dadaada kɛ nzanboɛfuɛ mun sa.

¹⁰ Afin Anannganman ɔ'a yo man amu'an yo sa zuglaa. Ɔ'a kata amun nyinma'n (wa liɛ'n, Nyanmiɛn nuan ijɔfuɛ'm be ndɛ yɛ ɔ kan-an.) Ɔ'a kata amún ti (wa liɛ'n jeliwafuɛ'm be ndɛ yɛ ɔ kan-an.)

¹¹ Ninnge sɔ'm bé wlɛ wunlɛ'n ti kekle amun sa nun. Ɔ ti kɛ fluwa bɔ be ta su like b'ɔ kle kɛ nán be tike su, sanngɛ bɔ be fa man sran ng'ɔ si kanngan'n kɛ ɔ kanngan'n sa. Kpɛkuun be se i kɛ: «Kanngan!» Yɛ ɔ tɛ su kɛ: «N kwla kanngan-man, afin b'a ta su like b'ɔ kle kɛ nán be tike su.»

¹² Annzɛ kusu, ɔ ti kɛ fluwa bɔ be fa man sran b'ɔ si-man kanngan'n kɛ ɔ kanngan'n sa. Kpɛkuun be se i kɛ: «Kanngan!» Yɛ ɔ tɛ su kɛ: «N si-man fluwa kanngan.»

A-fu-be-nun sa'm be nian wie-man

¹³ Anannganman waan: «Sran nga be mantan min'n, be nuan ngbɛn yɛ be fa manman min-ɔn, be yo i bé nuan bui su ngbɛn, be anwlɛn'n ɔ nun-man min su. Yɛ bé nyin bɔ be waan ɔ yi min'n, ɔ ti kɛ like yɛ sran'm be kleli yɛ be nian su be yo sa.

¹⁴ I sɔ'n ti, n wa yo man bé nuan'n ´bo bé wun. N wa yi atrɛ mun yɛ n ´yo abonuan sa mun. Akunndanfuɛ'm be akunndan'n ɔ ´mlin, yɛ ngwlɛlɛfuɛ'm be ngwlɛlɛ'n ɔ ´fia .»

?Amun bu Anannganman kpa'n i sɛ?

¹⁵ Sran nga be fa be ninnge nga be siesie kɛ be ´yo be'n be fia Anannganman wun'n, be yako! Be yo bé sa mun aosin'n nun. Be ko se kɛ: «?Wan li yɛ ɔ wun ye-ɔ? ?Wan li yɛ ɔ si ye-ɔ?

¹⁶ ?Nguɛ sinnzin sa yɛ amun yo i sɔ-ɔ? ?Ɔ yo sɛ ti yɛ amun fa ufa'n sunnzun sɛ wufuɛ nin-ɔn?» ?Sɛ'n ɔ kwla se i ufuɛ'n kɛ: «Nán wɔ yɛ a wuli min-ɔn?» ?Sɛ'n ɔ kwla se i ufuɛ'n kɛ ɔ si-man ngwlɛlɛ?

Sa'm be wun kpɛlɛ dan bɔ be wa kpɛ'n

¹⁷ ?Amun si-man kɛ ɔ cɛ kan-an, Liban bo'n ɔ ´kaci kɛ lika bɔ be tali nun waka'n sa? ?Yɛ amun si-man kɛ lika bɔ be tali nun waka'n ɔ ´kaci bo ble?

¹⁸ I cɛn sɔ nun'n, sutrefuɛ'm be su'n ´ti ndɛ nga be kɛnnin i fluwa nun'n, anyansifuɛ'm be nyinma'm be ´wun ase, be ´fin aosin'n nun be ´fite.

¹⁹ Be nga be kan bé wun ase'n, Anannganman ti be klun ´jɔ titi ´kɔ i nyrun. Be nga be ti sran'm be nun yalɛfuɛ'n, Izraɛl Nyanmiɛn'n ti bé wun ´kpaja be.

²⁰ Be nga be sie sran mun bɔ be tin be su'n, be ´wie. Be nga be yo sran'm be finfin'n, be su wun-man be kun. Yɛ be nga sran'm be tɛtɛ yolɛ'n yɛ be kunndɛ'n, be su tran-man lɛ kun.

²¹ Be nga be ndɛ bɔ be kan nun be bu sran wie fɔ jɔlɛ diwlɛ lɔ'n, be nga be sua jɔlɛ difuɛ'm bé bo aya'n, yɛ be nga be yo man be bu sran nga be ndɛ yo fɛ'n be fɔ ngbɛn'n, be sɔfuɛ'm be su tran-man lɛ kun.

²² I sɔ'n ti Anannganman b'ɔ deli Abraam'n, ɔ kan kle Zakɔb i osu nunfuɛ'm be kɛ: «Kɛ ɔ fin ndɛ'n, Zakɔb i nvle'n nunfuɛ'm be su wun-man nyannzuɛn kun, yɛ be nyrun'n su kpa-man fuai kun.

²³ Afin kɛ be mma'm be ´wun sa nga n ´yo i be afiɛn'n, be su yo-man n dunman'n i finfin, m bɔ n ti Zakɔb i Nyanmiɛn'n, be su fa-man min sanngan-man ninnge nga be su be'm be nun, yɛ bé nyin ´yi m bɔ n ti Izraɛl Nyanmiɛn'n.

²⁴ Be nga be wun-man sa wlɛ kun'n, be wa wun ndɛ nga n kan be be wlɛ siɛn'n. Be nga be kaci bé nuan cɛn kwlaa, be ´yaci bé wun lɛ, n ´kle be like.»