Ezai 27 - NYANMIƐN NDƐ'N 1998

Dragɔn ng'ɔ o jenvie nun'n i kwlalɛ bɔ be kwlɛli i'n

¹ I cɛn sɔ nun'n, Anannganman ´fɛ i tokofi dan b'ɔ yo sro'n, b'ɔ ti kekleke'n, ɔ ´fa kun wuo dan bɔ be kwla trɛ-mɛn i'n, b'ɔ blibli nɔnngɔnnɔnngɔn'n. Ɔ ´kun like sroesroe sɔ'n b'ɔ o jenvie nun'n.

Anannganman nin i vinyi fie'n

² I cɛn sɔ nun'n, amun ´to jue kun be ´manman vinyi fie'n bɔ i su nzan'n yo fɛ'n.

³ «M bɔbɔ min Anannganman yɛ n nian su-ɔ. Blɛ b'ɔ ju i su nzue gualɛ'n, n gua su nzue. N sɛsɛ i wia su nin kɔnguɛ kɛ ɔ ´yo nan b'a wlu-man nun b'a saci-mɛn i'n ti.

⁴ N fɛ-mɛn i wun ya, sanngɛ sɛ n wun susrɛ nin owie nun'n, n ´tiatia be su, yɛ n ´wɔ be kwlakwla be nun.

⁵ Sanngɛ sɛ be talo min'n, sɛ be kpata min'n, sɛ be tra n ja'n, i liɛ ɔ lɛ i wun.»

Izraɛl i wun sa bɔ be yaci cɛli i'n

⁶ Sɛ Zakɔb ti waka'n, wuun n ´se kɛ cɛn wie lele i osu'n nunfuɛ'm be ´nyan olui, be ´fɛfɛ, yɛ be ´bo nyrɛ, yɛ be mma'n be ´tru mɛn'n nun .

⁷ ?Anannganman boli i sran mun kɛ ɔ fa boli be nga be boli be'n sa? ?Annzɛ ɔ kunnin be kɛ ɔ fa kunnin be nga be kunnin be'n sa?

⁸ Cɛcɛ, ɔ yoli man be bo sanndili, be trali be lomuɛn ɔli mɛn uflɛ nun. Ɔ yo kɛ wia afiliɛ lɔ aunngban b'ɔ yo sro'n, b'ɔ fita like mun kɔ'n sa.

⁹ Sanngɛ siɛn'n, wafa nga be ´yaci Izraɛlfuɛ'm bé wun sa'n cɛ be'n, yɛ wafa nga be ´nunnun bé sa tɛ'n su'n yɛ: be wa bubu sraka yiwlɛ lika'm be yɛbuɛ'm be nun, be ´nunkun be kɛ like pɔpɔ wie sa, be ´yo kɛ ndutre sa. Be su taka-man yɛbuɛ nga be sɔ be'n kun, be su kplan-man sraka yiwlɛ nga be yra ansans su'n mun kun.

¹⁰ Klɔ nga be sili i wun'n, ɔ ´tɔ kouun, sran fi su tran-man nun kun, ɔ ´tɔ srololo kɛ aawlɛ flɛnnɛn'n sa. Nannin ba'm be ´didi lɔ, be ´la lɔ, yɛ be ´di susrɛ'm be nun nnya-nnya mun.

¹¹ Kɛ waka sama'm be wu kee'n, be bubu be nun, bla'm be fa yo yie be trɔ. Nanwlɛ nvle nga nunfuɛ'm be wun-man sa wlɛ mlɔnmlɔn. I sɔ'n ti be yifuɛ'n ɔ si-man be aunnvuɛ mlɔnmlɔn, sran ng'ɔ boli be jrali asiɛ'n su'n, be yo-mɛn i annvɔ mlɔnmlɔn.

Be nga be bo sanndili'n bé sin salɛ dan'n

¹² I cɛn sɔ nun'n, waka nga be o nzue dan'n i nuan lele fa ju Ezipt nzue ba'n i nuan'n, Anannganman ´keje waka sɔ mun sa uya-uya-uya. Yɛ amun Izraɛlfuɛ mun, ɔ ´isa amun kunngunngun.

¹³ I cɛn sɔ nun'n, be ´fita nnɛn wɛ dan'n nun. Yɛ be nga be sanngan Asirifuɛ'm be nun'n, ɔ nin be nga be bo sanndili Ezipt mɛn'n nun'n, be ´koto Anannganman i bo oka b'ɔ ti i liɛ'n klonglo'n b'ɔ o Zerizalɛm lɔ'n su .