Ezai 26 - NYANMIƐN NDƐ'N 1998

Klɔ'n bɔ be sisili i wun kekleke kpa'n, yɛ klɔ'n bɔ i nun wlulɛ ti-man pɔpɔ'n

¹ I cɛn sɔ nun'n, be ´to jue ng'ɔ o yɛ'n Zida mɛn'n nun. Be ´se kɛ: «E lɛ klɔ kun bɔ be sili i wun'n kpa. Anannganman i delɛ b'ɔ de ye'n, ɔ ti kɛ talɛ nnyɔn sa yɛ be si klɔ'n i wun-ɔn.

² Amun `tike anuan mun man nvle nga be nunfuɛ'm be yo sa i nuan su'n, bɔ be ti nanwlɛfuɛ'n, be wlu.

³ Sran ng'ɔ tran cinnjin ɔ́ sa nun'n, Anannganman, a mɛn i aunjuɛ, ɔ man i wun jɔ i fɔuun, afin ɔ fɛ i wla'n gua ɔ su.

⁴ Amun `fa amún wla gua Anannganman su tititi. Afin ɔ ti kɛ yɛbuɛ sa, i yɛ be talo i-ɔ, ɔ o lɛ anannganman anannganman.

⁵ Be nga be tran oka'm be su'n, ɔ suli bé bo guali asiɛ wun wa. Sɛ klɔ'n b'ɔ o lika kendenglein su lɔ'n ɔ ti sran'n, wuun n ´se kɛ ɔ'a kɛn i ase lele ɔ'a ju ngua wa, ɔ'a su i bo a yi ndutre'n nun.

⁶ Yalɛfuɛ mun nin be nga be ti fakafaka'n, be tiatiali su.»

Blɛ kasiɛn'n nun Nyanmiɛn srɛlɛ'n

⁷ Sran kpa'n i atin'n ti sein. Anannganman, wɔ bɔ a yo sa i nuan su'n, a siesie sran kpa'n i atin'n mɛn i.

⁸ I sɔ'n ti, Anannganman, kɛ e o wɔ atin'n su'n, é wla o ɔ su. Ɔ kpanflɛlɛ'n nin ɔ dunman'n i bolɛ'n yɛ ɔ ti like bɔ e kunndɛ kɛ e ´yo-ɔ.

⁹ Kɔnguɛ'n, n konvi sɔ wɔ, n kunndɛ kɛ n ´fa min wun mantan wɔ sakpa. Kɛ a tu asiɛ'n sufuɛ'm be fɔ'n, kpɛkuun be su kpɛ mmla'n i su falɛ'n i sin atin.

¹⁰ Sanngɛ sɛ sran'm be si klunwifuɛ'm be aunnvuɛ'n, kpɛkuun klunwifuɛ sɔ'm be suan-man like ng'ɔ fata kɛ be yo'n i yolɛ. Sa ng'ɔ ti-mɛn i nuan su'n yɛ be yo i asiɛ'n su-ɔ. Yɛ Anannganman, be wun-man ɔ kpli bɔ a ti'n.

¹¹ Anannganman, a man ɔ́ sa'n su nglo fa wlanwlan be, sanngɛ be wun-mɛn i. Be ´wun klolɛ nga a fa klo ɔ nvle'n nunfuɛ mun'n, yɛ nyannzuɛn ´kun be. Yɛ sin ɔ ´yra ɔ kpɔfuɛ mun.

¹² Anannganman, wɔ man é wun jɔ ye. Afin like nga e yo'n, wɔ yɛ a yiɛ i nuan man ye-ɔ.

¹³ Anannganman e Nyanmiɛn, siefuɛ uflɛ'm be sieli ye. Sanngɛ ɔ kunngba cɛ ɔ dunman'n yɛ e bo-ɔ.

¹⁴ Sran nga be wu'n, be sa-man bé sin nguan'n nun kun. Sran nga be sin wie nun'n, be jaso-man kun. A bali, a wa nunnunnin be, a yoli man bé wla fili be su mlɔnmlɔnmlɔn.

¹⁵ Anannganman, wɔ man y'a trɛ, wɔ man y'a sɔn, yɛ w'a nyan nyrun. A trɛli e mɛn'n nun.

¹⁶ Anannganman, blɛ bɔ sa kekle tɔli be su'n, be fali be wun mantannin wɔ. Kɛ a tuli be fɔ'n, be srɛli wɔ.

¹⁷ Anannganman, kɛ bla wunnzɛfuɛ bɔ ɔ'a koto awuliɛ'n ɔ kpan'n, kɛ ɔ wun nyrɛnnɛn'n, i kunngba nin-ɔn, i nun bɔ e o ɔ́ wun mmua'n kɛ e ti sɔ-ɔ.

¹⁸ Sɛ e ´kwla se'n, e se kɛ e wunnzɛli, e ku nun yoli e ya, yɛ e wa wu ba nin-ɔn, ɔ ti aunngban. Y'a yo-man like b'ɔ man asiɛ'n sufuɛ'm be ´fite nun-ɔn, y'a yo-man like b'ɔ man mɛn'n nunfuɛ'm be ´nyan nguan-an.

Be nga be wuli'n be cɛnlɛ'n, yɛ sa tɛ'n i nuan akatua'n

¹⁹ Amun fuɛ nga be wuli'n be ´sa bé sin wa ekun. Min sran nga be sinnin wie nun'n be ´cɛn. Amun nga amun o ndutre'n nun'n, amun `tinnge, man amun klun jɔ, yɛ amun `bo sro. Anannganman, ɔ bɔlɛ ufue'n ɔ ti kɛ like b'ɔ kpaja weiin'n sa, yɛ asiɛ'n ɔ man be nga be wuli'm be ´sa bé sin wa ekun.

²⁰ Min nvle'n nunfuɛ mun, amun `ko wlu amún sua ba'm be nun, amun `nyin amun sin anuan. Amun `fia lele man Anannganman i ya'n ɔ jɔ ka nan amu'an fite.

²¹ Afin Anannganman fin i tranwlɛ'n nun lɔ su ba kɛ ɔ wa tu be nga be wo asiɛ'n su'n be fɔ sa tɛ bɔ be yo'n ti. Mmoja ng'ɔ guali asiɛ'n su'n, be ´wun i, sran nga be wuli'n, like fi su kata-man be su kun.