Ezai 25 - NYANMIƐN NDƐ'N 1998

Anannganman ti i sran'm be fiawlɛ

¹ Anannganman, a ti min Nyanmiɛn, m ´manman wɔ, n ´to jue m bo flɛ wɔ. Afin a yoli abonuan sa mun. Like nga a buli be akunndan'n, bɔ a yoli be ɔ'a cɛ'n, be tɛ o lɛ, be ti cinnjinnjin.

² Afin wɔ man klɔ'n ɔ'a yo kɛ yɛbuɛ kwle bɔ i nun yɛbuɛ'm be tian be wiengu su'n sa, klɔ'n bɔ i wun ti siwa'n ɔ'a saci. Be wun-man aofuɛ'm be sua kpakpa mun klɔ'n nun kun. Be su kplan-man klɔ sɔ'n i uflɛ kun.

³ I sɔ'n ti, nvle'n b'ɔ yo sro'n i nunfuɛ'm be manman wɔ. Klɔ bɔ i su sran'm be tin sran'm be su'n, lɛfuɛ'm be sro wɔ.

⁴ Afin a sasali be nga be lɛ-man wunmiɛn'n, a sasali yalɛfuɛ bɔ be o nyrɛnnɛn nun'n. A yoli kɛ lika bɔ be kata su'n, bɔ kɛ nzue'n ɔ tɔ dan'n, be fiɛ i bo'n sa. A yoli kɛ fɔnvɔ bɔ kɛ wia'n ɔ bo'n be trɛn i bo'n sa. Afin be nga be sie sran mun, bɔ be tin be su'n, be ya bɔ be fa'n ɔ ti kɛ nzue dan b'ɔ tɔ fin talɛ kun'n sa.

⁵ Kɛ a jran wia'n b'ɔ bo asiɛ kee'n su fiaan'n, i kunngba nin-ɔn, a yoli man aofuɛ'm be kpankpanlɛ bɔ be kpankpan'n, ɔ kpɛli sa kpe. Kɛ nyanmiɛn ble'n ɔ kan wia'n b'ɔ bo fiaan'n i ase'n, i kunngba nin-ɔn, be nga be sie sran mun, bɔ be tin be su'n, kɛ a jrannin be jue'n bɔ be to'n i sɔ-ɔ.

Aliɛ bɔ be ´tɔn man sran'm be kwlakwla'n

⁶ Anannganman b'ɔ sie mɛn wunmuan'n, ɔ man be ´tɔn aliɛ be ´man sran'm be kwlakwla Siɔn oka'n su. Be ´tɔn aliɛ fɛfɛ kpa, be ´sie su nzan fɛfɛ. Nnɛn bɔ lui o nun kpa'n yɛ be ´fa tɔn like sɔ nin-ɔn, nzan fɛfɛ b'ɔ ti weiin kpa'n yɛ be ´fa sie su-ɔ.

⁷ Kɛ be o oka sɔ'n su, ɔ ´yi sɛ tannin ng'ɔ kata sran'm be kwlaa be su'n, ɔ ´yi awlaboɛ kondro ng'ɔ kata nvle-nvle be kwlaa be su'n.

⁸ Ɔ ´nunnun wie'n mlɔnmlɔnmlɔn. Anannganman ɔ ´nunnun sran'm be kwlaa be nyinmuɛn'n. Nyannzuɛn nga i mɛn'n nunfuɛ'm be wunnin i'n, ɔ ´wie. Anannganman kannin sɔ .

Izraɛlfuɛ'm be klun b'ɔ jɔ'n yɛ Moabfuɛ'm be nyrɛnnɛn wunlɛ'n

⁹ I cɛn sɔ nun'n, be ´se kɛ: «I yɛ ɔ ti e Nyanmiɛn nin-ɔn. E lafili i su yɛ ɔ deli ye, Anannganman yɛ e fali é wla guɛli i su-ɔ. Man é wun blibli ye. Man e klun jɔ delɛ b'ɔ deli ye'n ti.

¹⁰ Afin Anannganman i sa kpa'n wo oka nga su.» Be tiatia Moabfuɛ'm be su kan be o lɛ'n, be tiatia be su kɛ ijre bɔ be tiatia su angrɛ kunman'n nun'n sa.

¹¹ Yɛ lika kunngba sɔ'n nun lɛ'n, be ´man be sa'n su kɛ nzue wɛfuɛ'n tinngɛ i sa'n nun wɛ nzue'n sa. Sanngɛ ɔ nin bé sa bɔ be man su'n i ngba'n, Anannganman kan be wun tulɛ'n i ase.

¹² Moabfuɛ mun, amun klɔ'm bé wun talɛ'm bɔ be ti kekleke'n, bɔ be ti nglo-nglo'n, Anannganman ɔ wa bubu be guɛ i asiɛ wun ndutre nun.