Ezai 23 - NYANMIƐN NDƐ'N 1998

Tir nin Sidɔn be sacilɛ

¹ Sa ng'ɔ ´ju Tir klɔ'n su'n. Sɛ Tarsis lɔ mmeli'm be ti sran'n, wuun n ´se be kɛ be `sun kpa, afin Tarsis klɔ'n ɔ'a saci: sua nun-man lɔ kun, be wlu klɔ'n nun-ɔn, ɔ yo-man ye kun. Kɛ be fin Kitim mɛn'n nun lɔ bali'n yɛ be tili ndɛ sɔ nin-ɔn.

² Sidɔn aata difuɛ mun, amun bɔ amun tran jenvie'n i nuan'n, amun bɔ amún sa nun sran'm be wlan-wlan jenvie'n i nyin su'n, srɛ b'ɔ kun amun'n ti'n, nán amun ijɔ.

³ Fie nga be di be Nil'n i nuan'n, be su ninnge'm be kaci Sidɔnfuɛ'm be liɛ. Sidɔn lɛ yɛ mɛnmɛn'm be nunfuɛ'm be wa di bé gua-a.

⁴ Sidɔn klɔ, ɔ bɔ a ti jenvie i sasalɛ like'n, man nyannzuɛn kun wɔ. Sɛ jenvie'n ti sran'n, wuun n ´se kɛ i waan: «N klun ɔ'a yo-man min ya, m'an wu-man ba, m'an ta-man ba yasua, m'an ta-man ba bla.»

⁵ Sɛ ndɛ sɔ'n ɔ ju Ezipt lɔ'n, be ´usu kɛ Tirfuɛ'm be usuli blɛ bɔ be tili ndɛ kunngba sɔ'n sa.

⁶ Amun bɔ amun tran jenvie'n i nuan'n, amun `wɔ Tarsis lɔ, amun `la kondo.

⁷ ?Amun klɔ bɔ laa i nunfuɛ'm be bo sro'n yɛlɛ nga? Ɔ ti klɔ bɔ nán ndɛ sa yɛ ɔ o lɛ-ɔ. Laa i nun sran wie'm be kɔ mmua kpa be ko sie mɛn uflɛ mun.

⁸ ?Wan yɛ man sa nga ɔ'a tɔ Tirfuɛ'm be su-ɔ? Laa, Tirfuɛ'm be fa famiɛn kle be cɛ, be aata difuɛ'm be ti famiɛn i awlo lɔ sran dandan, be ninnge atɛ yofuɛ'm be o be nga be bu be sran asiɛ'n su'n be nun.

⁹ Anannganman b'ɔ sie mɛn wunmuan'n i yɛ man sa sɔ'n ɔ juli-ɔ kɛ ɔ ´yo nan be kwlaa nga be tu bé wun'n, bé wun tulɛ'n ɔ'a wie'n ti, kɛ ɔ ´yo nan ɔ'a kan be nga sran'm be bu be sran asiɛ su'n be ase'n ti.

¹⁰ Tirfuɛ mun, amun `di asiɛ wun junman siɛn'n, afin mmeli'm be jranwlɛ bɔ be o jenvie nuan'n be nun-man lɛ kun.

¹¹ Anannganman mɛnnin i sa'n su jenvie'n su. Ɔ yoli man nvle-nvle'm be kejeli. Ɔ seli Kanaanfuɛ'm be kɛ be `saci be lika kpakpa nga be fia nun mun.

¹² I waan: « Sidɔnfuɛ mun, amun su kwla bo sro-man kun, amun ti kɛ talua b'ɔ si-man bian bɔ be miɛnnin i be nin be lali'n sa. Kannzɛ a kɔ lele a kpɛ jenvie a ju Kitim'n, lɔ bɔbɔ a su de-man wunmiɛn.

¹³ Amun `nian, Kaldefuɛ'm be lɛ-man nyrun kun, Asirifuɛ'm be fali bé mɛn'n mannin aawlɛ flɛnnɛn'n nun nnɛn mun. Kaldefuɛ sɔ'm be su kplan like fleinflein mun nan be ´jran su be kun alɛ. Be su saci Tir lɔ sua kpakpa mun, be su bubu be weiin.

¹⁴ Sɛ Tarsis mmeli'm be ti sran'n, wuun n ´se be kɛ be `la kondo, afin be sasafuɛ'n ɔ'a saci.»

¹⁵ I blɛ sɔ nun'n, bé wla ´fi Tir su afuɛ ableso. Afuɛ ableso'n yɛ ɔ ti famiɛn kun i afuɛ b'ɔ di i asiɛ'n su nin-ɔn. Kɛ afuɛ ableso sɔ'n ko sin'n, Tir klɔ'n ɔ wa yo kɛ tekle bla bɔ be sro i wun jue'n sa. Be sro se kɛ:

¹⁶ «Tekle bla bɔ bé wla ɔ'a fi wɔ su'n, fa jru kun nan bo sin yia klɔ'n. Bo jru'n kpa, to jue, to flan nun kpanngban nan sran'm bé wla `kpɛn wɔ su.»

¹⁷ Kɛ afuɛ ableso'n ko sin'n, Anannganman ɔ ´bu Tir klɔ'n i fɔ. Yɛ sɛ Tir ti sran'n, wuun n ´se kɛ ɔ wa fɛ i wun fa yi tekle bolɛ'n nun mɛn wunmuan'n i nun nvle'm be kwlaa nun, nan ɔ ´nyan sika.

¹⁸ Sanngɛ like ng'ɔ ´nyɛn i'n nin sika ng'ɔ ´nyɛn i'n, be ´yo Anannganman liɛ klonglo. Be su tiantian-man bé nuan, be su sie-man be lɛ. Sanngɛ be ´fa man be nga be tran Anannganman nyrun lɛ'n kɛ be `fa wie ta bé wun, yɛ be `fa kpa tralɛ nglanman-nglanman mun be `wla.