Ezai 22 - NYANMIƐN NDƐ'N 1998

Sa nga Anannganman kɛnnin i Zerizalɛm i wun'n

¹ Sa b'ɔ ´ju Kongo nga be wun aolia nun ninnge'm be lɔ'n i su'n. ?Zerizalɛmfuɛ mun, nguɛ ti yɛ amun kwlakwla amun fu sua'm be su-ɔ,

² amun bɔ amun klɔ'n i nun ti sran ngunmin'n, bɔ i nun ti wluwluwlu'n, bɔ be kan ngowa nun klanman'n? Amun sran nga like yoli be'n, nán tokofi yɛ be fa yoli be like sɔ nin-ɔn. Nán alɛ nun yɛ be ´wu-ɔ!

³ Amun sonja'm be nun sran kaklaakla'm be kwlaa be wieli wanndi. Be nga be to ta'n be ko trali be be fali be yoli be kanga. Kɛ amun wanndi ɔli mmua'n, amun kpɔfuɛ'm be ko trali amun kwlakwla, be fali amun yoli be kanga.

⁴ I sɔ'n ti n wan yoo: «Nán amun nian min kun, amun `yaci min lɛ man n sun piaan kpa. Nán amun se kɛ amun ´fɔnvɔ min nyrɛnnɛn b'ɔ tɔli min nvle nunfuɛ'm bé su'n ti.

⁵ Afin ndɛkɛn Anannganman b'ɔ sie mɛn wunmuan'n, ɔ'a fa sannganlɛ nin nyrɛnnɛn, ɔ nin nyannzuɛn ɔ'a yi e su.» Kongo nga be wun aolia nun ninnge'm be lɔ'n, be su bubu talɛ'n i nun lɔ, yɛ sran'm be kpan lɔ, be kpanlɛ'n ɔ kɔ lele ju oka'n i wun lɔ.

⁶ Elam sonja'm b'a fa bé ta mun nin be ta mma mun. Sran'm be wo alɛ kakaklolo wie'm be nun, wie'm be o nnɛn kpanngɔ'm be su, be su ba. Sonja nga be fin Kir'n, be su yi be wue sasalɛ like mun fite.

⁷ Zerizalɛmfuɛ mun, kakaklolo'm b'a yi amun kongo nglanman-nglanman kpa mun. Yɛ alɛ'n ti nnɛn kpanngɔ fufuɛ mun, be jinjin amun klɔ'n i anuan'm be nun .

⁸ Zidafuɛ'm be lɛ-man like fi be fa sasa-man bé wun kun. Cɛn sɔ nun'n, alɛ ninnge nga be fa be sieli sua nga be flɛ i kɛ Bo Nun Sua'n i nun lɔ'n, be su yɛ be akunndan'n trannin-ɔn.

⁹ Amun wunnin buɛ kpanngban nga be o David i klɔ'n i wun talɛ'n i nun'n. Amun sa nzue guali nzue guawlɛ dan ng'ɔ o klɔ'n i wun lɔ'n nun.

¹⁰ Amun kali Zerizalɛm klɔ'n nun sua mun. Amun bubuli be nun wie mun, amun fali be yɛbuɛ'm be yoli talɛ ng'ɔ sisi klɔ'n i wun'n kɛ ɔ ´yo nan ɔ'a yo kekleke'n ti.

¹¹ Amun yoli nzue guawlɛ talɛ nnyɔn'm be afiɛn kɛ ɔ ´yo nan amu'an fa kunman laa liɛ'n i nun nzue'n b'a gua nzue guawlɛ uflɛ'n sɔ'n nun'n ti. Sanngɛ amu'an bu-man sran ng'ɔ yoli sa sɔ mun i akunndan. Amun wla ɔ'a kpɛn-man sran ng'ɔ dun mmua siesieli be laa'n i su.

¹² I cɛn sɔ nun'n, Anannganman b'ɔ sie mɛn wunmuan'n, ɔ seli amun kɛ amun `sun yɛ amun `la kondo, i waan amun `kpu amún ti'n su yɛ amun `wla bajɛ tralɛ.

¹³ Sanngɛ amun klun ti jɔwa, yɛ able yɛ amun si-ɔ. Amun kun nannin, amun kun bua, amun di nnɛn, yɛ amun nɔn nzan. Amun se kɛ: «Man e di like e nɔn nzan, afin sɛ ainman e wu'n wuun e liɛ a wie .»

¹⁴ Anannganman b'ɔ sie mɛn wunmuan'n ɔ kannin ndɛ kleli min. I waan: «Fɔnlɛ nga amun fɔnnin yɛ'n, n su yaci cɛ-man nan amu'an wu.» Sa nga Anannganman b'ɔ sie mɛn wunmuan'n ɔ kannin'n yɛ ɔ o lɛ-ɔ.

Sɛbna b'ɔ ti like su nianfuɛ'n i junman'n ɔ wa fi i sa

¹⁵ Anannganman Nyanmiɛn b'ɔ sie mɛn wunmuan'n ɔ kannin ndɛ nga kleli min. I waan: «Kɔ nan ko to Sɛbna, ko to like su nianfuɛ sɔ'n b'ɔ ti famiɛn'n i awlo'n su kpɛn'n, nan usɛ i kɛ:

¹⁶ «?Ɔ nzu yɛ ɔ o wa-a, ɔ osufuɛ onin yɛ ɔ o wa-a b'ɔ man a fu wɔ asieliɛ kunman oka'n su, b'ɔ man a kpɛ ɔ lawlɛ kasiɛn'n yɛbuɛ buɛ'n nun-ɔn?»

¹⁷ Se i kɛ: «Nian, nja bian klanman, Anannganman wa finndin wɔ yi wɔ blo, yɛ ɔ ´fa wɔ wla like wie nun.

¹⁸ Be ´kondo wɔ kɛ like kukluku wie sa, be ´fa wɔ kɔ mɛn tɛtrɛ kpa wie nun. Wɔ bɔ man ɔ Min'n i awlofuɛ'm bé nyin ɔ gua ase'n, lɔ yɛ a ´ko wu-ɔ, Lɔ yɛ awieliɛ'n ´wie ɔ kakaklolo nglanman-nglanman mun-ɔn.»

¹⁹ Se i ekun kɛ Anannganman waan: « N ´yo man ɔ junman'n ɔ ´fi ɔ sa, n ´tu wɔ ɔ junman'n su fo.

²⁰ I cɛn sɔ nun'n, n ´flɛ min sufuɛ Eliakim b'ɔ ti Ilkiza i wa'n.

²¹ N ´fa ɔ tralɛ dan'n n ´fa wlɛ i wun, n ´fa ɔ́ bo kplo'n n ´fa ci i bo, n ´fa ɔ tinmin'n n ´fa mɛn i. Ɔ wa yo Zerizalɛmfuɛ mun nin Zida osu nunfuɛ'm bé si.

²² N ´fa David i awlo'n i lakle'n n ´fa mɛn i. Sɛ ɔ tike anuan'n, sran fi su kwla nyin-man, sɛ ɔ nyin'n, sran fi su kwla tike-man .

²³ Sɛ ɔ ti kpɛngbɛ'n, wuun n ´se kɛ n ´kplɛn i lika kpa kun nun. I si i awlo nun'n, ɔ ´yo kɛ famiɛn bia b'ɔ lɛ nyrun'n sa.»

²⁴ I osu'n nunfuɛ mun'n, be kaklaakla mun o, be kanngan mun o, i su yɛ be ´kisa-a. Ɔ ´yo kɛ kpɛngbɛ b'ɔ be bobo i talɛ kekle kpa kun wun bɔ be fa gbo nun ninnge kanngan'n kwlaa be sende su'n sa, i kpongbo o, i sɛ mma o.

²⁵ Anannganman b'ɔ sie mɛn wunmuan'n wan yoo: «I cɛn sɔ nun'n, kpɛngbɛ'n bɔ be boboli i talɛ kekleke wun'n, ɔ ´tu, yɛ ɔ ´tɔ. Yɛ ninnge'm bɔ be sende su bɔ be yo nɔnnin'n, be ´tɔ yɛ be ´bubu.» Anannganman b'ɔ sie mɛn wunmuan'n yɛ ɔ kan sɔ-ɔ.