Ezai 21 - NYANMIƐN NDƐ'N 1998

Babilɔni i tɔlɛ'n

¹ Sa ng'ɔ wa ju jenvie'n i nuan aawlɛ flɛnnɛn'n i su'n. E kpɔfuɛ'm be fin aawlɛ flɛnnɛn'n nun mɛn ng'ɔ yo sro'n i nun lɔ be ba kɛ seke b'ɔ kpɛ b'ɔ sin mɛn'n i ngua lɔ kɔ'n sa.

² Be yili sa kekle kpa kun nglo kleli min. Sran ng'ɔ tu sran'm be ja'n, ɔ o i junman'n su, like sacifuɛ'n ɔ su di i junman'n. Anannganman waan: «Elamfuɛ mun, amun `ko kun alɛ'n! Medifuɛ mun, amun `fa klɔ'n. N ´yo man fɛfɛlɛ'n kwlaa ɔ ´wie.»

³ I sɔ'n ti, min wi'n ɔ yo min ya kpa. N su fɛ kɛ bla kun bɔ ɔ'a koto awuliɛ'n sa. Afɛ dan b'ɔ o min su'n ti, n ti-man sa kun. Srɛ b'ɔ kun min dan'n ti, n wun-man ase kun.

⁴ N lɛ-man anwlɛn kun, srɛ'n ɔ'a kun min kpo. Min waan wuun kɔnguɛ min wun ɔ ´jɔ min fɔun kan, kpɛkuun kɛ aliɛ'n san'n, n klun yɛ ɔ titi min-ɔn.

⁵ B'a fa aliɛ'n b'a sie i tabli'n su, gladi difuɛ'm b'a jranjran. Kpɛnngbɛn'm be su di like, be su nɔn nzan, kpɛkuun be ti kpanlɛ! Be ti i kɛ: «Famiɛn i awlo lɔ sran dandan mun, amun `jaso! Amun `fa amun alɛ ninnge mun!»

⁶ Afin Anannganman seli min kɛ: «Ko fa klɔ'n i sasafuɛ'n kun sie, man ɔ di i junman'n, man ɔ kan sa ng'ɔ wun i'n.

⁷ Sɛ ɔ wun nnɛn kpanngɔ fufuɛ mun bɔ be ba nnyɔn-nnyɔn'n, sɛ ɔ wun kɛ sran wie'm be o aflunmun'm be su'n be su ba'n, sɛ ɔ wun kɛ sran wie'm be o nyɔnngɔnmɛn'm be su'n be su ba'n man ɔ nian be kpa, man ɔ nian be kpa sakpa!»

⁸ Kpɛkuun sran nga b'ɔ nian lika'n su'n ɔ kpannin kɛ asɔmɔli sa. I waan: «Min Min, kɛ ɔ fɛ nglɛmun lele b'ɔ ´fa ju nnɔsua'n, n jin lika fleiin'n su n nian-nian, yɛ kɔnguɛ kwlaa n jin wa, n nian-nian.

⁹ Nian, nnɛn kpanngɔ fufuɛ wie'n be ba, be ba nnyɔn-nnyɔn.» Ɔ kpannin kekle, ɔ seli ekun kɛ: «Babilɔni ɔ'a tɔ, Babilɔni ɔ'a tɔ. Lɔfuɛ'm be amuɛn'm be kwlakwla b'a bubu b'a gua .»

¹⁰ Min nvle'n nunfuɛ mun, amun bɔ be boli amun kɛ be fa bo ble'n i bowlɛ'n nun sa'n, sa nga Anannganman b'ɔ sie mɛn wunmuan'n, b'ɔ ti Izraɛl Nyanmiɛn'n, ɔ kan kleli min'n yɛ m'an kan kle amun lɛ-ɔ.

?Kɔnguɛ'n i nun ndɛ ti sɛ?

¹¹ Dima i wun ndɛ. Be kpan flɛ min Seir lɔ, be usa min kɛ: «?Wɔ bɔ a sasa lika'n kɔnguɛ'n, kɔnguɛ'n i nun ndɛ ti sɛ? ?Wɔ bɔ a sasa lika'n kɔnguɛ'n, kɔnguɛ'n i nun ndɛ ti sɛ?»

¹² Sran'n b'ɔ sasa lika'n ɔ tɛ su kɛ: «Aliɛ'n ɔ wa cɛn, i sin aliɛ'n ɔ wa san. Sɛ amun waan amun ´usa sa'n, amun `usa, yɛ amun bla cɛn uflɛ ekun.»

Dɛdanfuɛ mun nin Kedarfuɛ'm be wanndilɛ

¹³ Arab mɛn'n i wun ndɛ. Dɛdanfuɛ mun, amun bɔ amun wlan-wlan sin'n, kɔnguɛ amun la Arabfuɛ'm bé bo'n nun.

¹⁴ Amun nga amun tran Tema'n, amun `ko kpa be nga nzue we'n ti be su wu'n be atin, amun `ko man be nzue. Amun `ko kpa be nga be su wanndi be ko kunndɛ fiawlɛ'n be atin nan amun `man be like man be di.

¹⁵ Afin be su wanndi tokofi bɔ like fi kwla jran-man be'n be nyrun. Be su wanndi ta bɔ b'a cuɛn nun b'a sie'n i nyrun. Be su wanndi nyrɛnnɛn bɔ alɛ'n ɔ fa yi i sran'm be su'n ti.

¹⁶ Afin ndɛ nga Anannganman kan kleli min'n yɛ. I waan: «Ɔ'a ka afuɛ kun sɛsɛsɛ, Kedarfuɛ'm be anyrunnyan'n ɔ ´wie.

¹⁷ Kedarfuɛ'm be nun'n, be nga be si ta'n i to kpa'n, bɔ be ´ka lɛ'n, be ´yo kaan sa. Anannganman b'ɔ ti Izraɛl Nyanmiɛn'n yɛ ɔ kan sɔ-ɔ.»