Ezai 2 - NYANMIƐN NDƐ'N 1998

¹ Amɔz i wa Ezai i aolia nun like ng'ɔ wunnin i'n, b'ɔ ti Zida nvle'n nin Zerizalɛm klɔ'n bé wun ndɛ'n.

Nvle'm be kwlaa be kɔ Nyanmiɛn sulɛ Zerizalɛm lɔ

² Cɛn wie lele'n, oka nga Anannganman i sua'n kplan su'n, ɔ wa taka oka'm be su, yɛ ɔ ´yo fleiin tra kpɔlɛ mun. Nvle-nvle'm be kwlaa be ´tu sa kpu be kɔ lɔ.

³ Sran kpanngban kpa be ´tu ajalɛ be ´kɔ. Be ´se kɛ: «Amun `bla man e wɔ Anannganman i oka'n su lɔ, man e wɔ Zakɔb i Nyanmiɛn'n i sua'n nun lɔ. Ɔ ´kle e i atin mun, yɛ e ´nanti i akpɔ'm be su.» Afin Siɔn lɔ yɛ mmla'n ɔ fin-ɔn, Zerizalɛm lɔ yɛ Anannganman i nuan ndɛ'n ɔ fin ba-a.

⁴ Ɔ wa yo nvle-nvle'm be jɔlɛ difuɛ, yɛ ɔ ´yo sran kpanngban be afiɛn siesiefuɛ. Be wa fa be tokofi mun be ´bo tokpo, yɛ be ´fa be cua mun be ´yo wlɔsɔ. Nvle kun su fa-man alɛ wlɛ-mɛn i nvle uflɛ sin kun. Be su suan-man alɛ dilɛ'n kun.

⁵ Zakɔb i osu'n nunfuɛ mun, amun `bla man e `nanti Anannganman i lika b'ɔ kpaja weiin'n nun.

Anannganman i jɔlɛ dilɛ cɛn'n

⁶ W'a yi ɔ nvle'n nunfuɛ'm be ase. W'a yi Zakɔb i osu'n nunfuɛ'm be ase. Afin wia afiliɛ lɔfuɛ'm be nzuɛn'n yɛ be fa-a, be yi wunnzue kɛ Filistifuɛ'm be sa, yɛ be nin nvle kun nga'm be nunfuɛ'm bé bo ti kun .

⁷ Be di-man sika ɔkwlɛ'n nin jɛtɛ ufue'n be yalɛ bé mɛn'n nun. Be ninnge kpakpa'm be sɔnnin tratra su. Be nnɛn kpanngɔ be sɔnnin kpa. Be alɛ kakaklolo'm be ti kpokpaa sɔ ngbɛn .

⁸ Be di-man amuɛn'm be yalɛ bé mɛn'n nun. Be koto ninnge nga be fa bé sa be yi'n be bo. Be su ninnge nga be fa bé sama be yo'n mun.

⁹ I sɔ'n ti, be wa kan sran'm be ase, yɛ be wa gua be nyin ase. Yɛ wɔ Anannganman, nán yaci sa fi cɛ be!

¹⁰ Anannganman i ya dan'n, nin i nyrun b'ɔ yo sran sro'n ti, amun `wlu yɛbuɛ buɛ'm be nun, amun `fia kunman'm be nun asiɛ'n i bo lɔ.

¹¹ Sran nga be yo bé wun dandan'n, be wa gua be nyin ase, sran nga be tu bé wun'n, be ´kan be ase. Anannganman kunngba cɛ yɛ be ´mɛnmɛn i cɛn sɔ'n nun-ɔn.

¹² Anannganman b'ɔ sie mɛn wunmuan'n ɔ'a sie cɛn kun. Cɛn sɔ nun'n, ɔ ´kan be nga be tu bé wun'n be ase, ɔ ´kan be nga be yo bé wun dandan'n be ase, ɔ ´kan be nga be man bé wun su'n be ase .

¹³ Cɛn sɔ nun'n, Liban lɔ sɛdri waka bɔ be ti fleiinfleiin'n, ɔ nin be kwlaa'n be ´nyɛn i, ɔ nin Bazan lɔ sɛni waka mun be ´nyɛn i.

¹⁴ Cɛn sɔ nun'n, ɔ nin oka bɔ be ti nglo-nglo'n kwlaa be ´nyɛn i, ɔ nin kpɔlɛ fleiinfleiin'n kwlaa be ´nyɛn i.

¹⁵ Cɛn sɔ nun'n, klɔ'n i sasalɛ sua nga be ti fleiin'n, ɔ nin be be ´nyɛn i, ɔ nin klɔ'm bé wun talɛ dandan'm be ´nyɛn i.

¹⁶ Cɛn sɔ nun'n, ɔ nin Tarsis lɔ mmeli dandan'n be kwlaa be ´nyɛn i, ɔ nin mmeli nglanman'm be kwlaa be ´nyɛn i.

¹⁷ Klɔ sran'n i wun dandan yolɛ'n ɔ ´kan ase, i wun tulɛ'n ɔ ´go nun. Anannganman kunngba cɛ yɛ be ´mɛnmɛn i cɛn sɔ'n nun-ɔn.

¹⁸ Amuɛn wie fi su ka-man lɛ.

¹⁹ Anannganman i ya dan'n nin i nyrun b'ɔ yo sro'n ti'n, sran'm be wa wlu yɛbuɛ buɛ'm be nun, be ´fia kunman'm be nun asiɛ'n i bo lɔ, afin Anannganman ɔ wa jaso, ɔ ´wlanwlan asiɛ'n sufuɛ mun .

²⁰ I cɛn sɔ nun'n, sran'm be amuɛn mun bɔ be fa jɛtɛ ufue yoli be kɛ be ´koto bé bo'n, ɔ nin be amuɛn mun bɔ be fa sika ɔkwlɛ yoli be kɛ be ´koto be bo'n, be ´to be gua gbekle nin akpannin'm be bo.

²¹ Anannganman i ya dan'n nin i nyrun b'ɔ yo sro'n ti'n, sran'm be ´wlu yɛbuɛ buɛ'm be nun, be ´wanndi. Afin Anannganman ɔ wa jaso, ɔ ´wlanwlan asiɛ'n sufuɛ mun.

²² Amun `yaci amún wla'n klɔ sran su fa gualɛ, afin i nguan'n ti tika kpe kan sa. ?Wan yɛlɛ sran?