Ezai 19 - NYANMIƐN NDƐ'N 1998

Sa ng'ɔ nyan Eziptfuɛ mun'n

¹ Ezipt i wun ndɛ. Amun `nian, Anannganman o nyanmiɛn ble kun b'ɔ ba luu kpa'n su, ɔ su ba Ezipt. Ezipt amuɛn'm be usu i nyrun sa tututu, yɛ Eziptfuɛ'm be wla'n ɔ bo bé wun.

² Anannganman waan: «N wa yo man Eziptfuɛ'm be ngunmin ngunmin be ´kun, sran kun nin niaan be ´tu, sran kun nin i janvuɛ be ´kan ndɛ, klɔ kun nunfuɛ'm be nin klɔ uflɛ nunfuɛ'm be ´kun, famiɛn kun wa jaso i wiengu famiɛn kun wun.

³ Eziptfuɛ'm be yakpa'n ɔ ´wie, n ´sanngan bé sa nga be siesie'n nun. Be ´kɔ amuɛn'm bé sin, be ´kɔ wunnzue yifuɛ fanunfanun'n bé sin.

⁴ N ´fa Eziptfuɛ mun n ´wla siefuɛ bɔ be like yolɛ yo ya kpa'n be sa nun. Famiɛn b'ɔ ti wlɛfuɛ kpa'n yɛ ɔ ´sie be-ɔ.» Ndɛ nga Anannganman b'ɔ sie mɛn wunmuan'n ɔ kan'n yɛ ɔ o lɛ-ɔ.

⁵ Jenvie'n i nzue'n ɔ ´wie nun, nzue ba'n ɔ ´wie nun, ɔ ´wu kee.

⁶ Nzue ba'm be nun nzue'n ɔ ´saci. Nil nzue'n i sama bɔ be gua jenvie nun'n, be nun nzue'n ɔ ´kan ase lele ɔ ´wie nun. Ndɛma nin papirus'm be ´glɔ.

⁷ Ijre nga be o Nil nzue'n i nuan'n nin kan Nil ɔ gua jenvie'n nun lɛ'n, yɛ ninnge nga be luali be Nil nzue'n i wun lɛ'n, be kwlaa be ´wu kee, aunngban'n ´fita be kwlaa kɔ. Like fi su ka-man lɛ.

⁸ Jue trafuɛ'm be ´yi ngwlɛ. Be kwlaa nga be to kowa Nil nzue'n nun'n, be ´yo kɛ sɛnvuɛ mun sa. Be nga kusu bɔ be gua lala nzue'n nun'n, bé wla ´bo bé wun.

⁹ Be nga be di lɛn bɔ be tu nun kɛ jese sa'n i wun junman'n, bɔ be wu tannin ufue'n, nyannzuɛn ´kun be.

¹⁰ Be nga be wu tannin'n, bé wla ´bo bé wun. Be nga be di junman bɔ be tua be kalɛ'n, be akunndan ´sanngan.

¹¹ Zɔan lɔ wlengbi'm be si-man ngwlɛlɛ mlɔnmlɔn, Ezipt famiɛn'n i awlo lɔ sran dandan mun bɔ be ngwlɛlɛ'n ti yɛ be fa be'n, be anyia'n i nunfuɛ'm be ti sinnglinfuɛ mun ngunmin kokoko. ?Ɔ yo sɛ yɛ amun kwla nyan atin se Ezipt famiɛn'n kɛ: «E ti ngwlɛlɛfuɛ'm be wa, e ti lalafuɛ famiɛn'm be wa» nin-ɔn?

¹² ?Ɔ ngwlɛlɛfuɛ'm be o nin? Man be yi sa nga be ti fiawa'm be nglo kle wɔ. Yɛ man be kan sa nga Anannganman b'ɔ sie mɛn wunmuan'n ɔ guguli kɛ ɔ ´fa yo Ezipt mɛn'n.

¹³ Zɔan lɔ famiɛn i awlo lɔ sran dandan'm b'a kaci sinnglinfuɛ mun, Nɔf lɔ wlengbi'm be su laka bé wun. Akpasua sɔ'm be su kpɛnngbɛn'm be su mlin Ezipt mɛn'n.

¹⁴ Anannganman ɔ'a fa sannganlɛ wawɛ'n ɔ'a yi Eziptfuɛ'm be afiɛn, kɛ ɔ ´yo nan b'a wun-man sa nga be yo'n be wlɛ, nan b'a yo kɛ sran b'ɔ nɔn nzan bo kpɛkuun kɛ ɔ ´nanti'n ɔ bo nvaka'n, wuun ɔ ´fi'n sa.

¹⁵ Ezipt mɛn'n nun'n, kɛ ɔ fɛ i sran kaklaakla'm be nun lele b'ɔ ´fa ju be kanngan'm be nun'n, be su nyan-man sran kun b'ɔ kwla yo sa kpa kun-ɔn.

Ezipt mɛn'n i agualiɛ'n

¹⁶ I blɛ sɔ nun'n, kɛ Eziptfuɛ'm be wa wun kɛ Anannganman b'ɔ sie mɛn wunmuan'n ɔ nin be ɔ'a nyɛn i'n, be ´kaci kɛ bla sa, be ´usu yɛ srɛ ´kun be.

¹⁷ Zida mɛn'n ɔ ´yo Eziptfuɛ'm be ndawlɛ. Blɛ'n kwlaa bɔ be ´bo i dunman'n be nyrun'n, srɛ ´kun be, yɛlɛ kɛ Anannganman b'ɔ sie mɛn wunmuan'n ɔ guguli kɛ ɔ ´yo be like.

¹⁸ I blɛ sɔ nun'n, Ezipt lɔ klɔ nnun'm be sufuɛ'm be ´kan ebre aniɛn'n, yɛ be ´ta nda kɛ be ti Anannganman b'ɔ sie mɛn wunmuan'n i liɛ. Be wa flɛ klɔ sɔ'm be nun kun kɛ Wia-Klɔ.

¹⁹ I blɛ sɔ nun'n, be wa kplan Nyanmiɛn sɔwlɛ kun Ezipt mɛn'n i afiɛn, yɛ be wa kplan yɛbuɛ kun anyialiɛ'n su Nyanmiɛn i dunman nun.

²⁰ I sɔ'n ɔ wa yo nzɔliɛ b'ɔ kle kɛ Anannganman b'ɔ sie mɛn wunmuan'n wo Ezipt mɛn'n nun. Blɛ bɔ be ´kle Eziptfuɛ'm be yalɛ'n, sɛ be kpan flɛ Anannganman kɛ ɔ de be'n, ɔ ´blɛ be defuɛ kun b'ɔ ´jran bé sin, yɛ ɔ ´de be.

²¹ I blɛ sɔ nun'n, Anannganman ´yi i wun ´kle Eziptfuɛ mun. Be ´si i, be ´yi tɛ be mɛn i, yɛ be ´yi sraka be mɛn i. Be ´ta nda kɛ be ´yo like be mɛn i, yɛ be ´nian su be ´yo.

²² Anannganman i sa ´kan Eziptfuɛ mun, kɛ ɔ wie be bo'n, ɔ ´nian be lika. Be bɔbɔ be ´ba Anannganman sin. Ɔ ´sɔ be nun, yɛ ɔ ´nian be lika.

²³ I blɛ sɔ nun'n, atin kun ´fɛ i Ezipt ɔ ´kpɛn Asiri. Asirifuɛ'm be ´kɔ Ezipt, yɛ Eziptfuɛ'm be ´kɔ Asiri. Yɛ be kwlaa be su Anannganman likawlɛ.

²⁴ I blɛ sɔ nun'n, mɛn nsan be ti yɛ Anannganman ɔ ´yo asiɛ'n sufuɛ'm be ye-ɔ: kun yɛlɛ Ezipt, kun ekun yɛlɛ Asiri, yɛ be nsan su'n yɛlɛ Izraɛl.

²⁵ Anannganman b'ɔ sie mɛn wunmuan'n, ɔ ´yra mɛn nunfuɛ'm be nguan ´se kɛ: «Man Eziptfuɛ'm bɔ be ti min sran'n be nyan ye! Man Asirifuɛ'm bɔ min yɛ n yili be'n, be nyan ye! Man Izraɛlfuɛ'm bɔ be ti min aja difuɛ'n, be nyan ye!»