Ezai 17 - NYANMIƐN NDƐ'N 1998

Damas nin Izraɛl be sacilɛ

¹ Damas i wun ndɛ. Damas su yo-man klɔ kun bɔbɔ, ɔ ´kaci klɔ nvuɛn.

² Sran'm b'a tu Arɔɛr klɔ'm be su. Klɔ sɔ'm be o nnɛn'm bé sa nun siɛn'n, b'a kaci be lawlɛ. Sran fi kle-man be yalɛ.

³ Klɔ nga be si bé wun'n, wie fi su tran-man Efraim akpasua'n su kun. Damas su yo-man famiɛn diwlɛ'n i klɔ dan'n kun. Yɛ Siri mɛn'n i bue ng'ɔ ka lɛ'n, ɔ su nyan-man nyrun kun, ɔ ´yo kɛ Izraɛlfuɛ'm be anyrunnyan b'ɔ wieli'n sa. Ndɛ nga Anannganman b'ɔ sie mɛn wunmuan'n ɔ kan'n yɛ ɔ o lɛ-ɔ.

⁴ I cɛn sɔ nun'n, sɛ Izraɛl mɛn'n ti sran'n, wuun e ´se kɛ i nɔnnin'n i su ´kpɛ, yɛ ɔ ´yo koklo.

⁵ Ɔ wa yo kɛ ble'n i kpɛlɛ nun'n, bɔ be kpɛ kpɛkuun be isa'n sa. Ɔ wa yo kɛ ble'n bɔ be kpɛ i Rɛfafuɛ'm be kongo'n nun lɔ'n sa.

⁶ Ble ja kunngun yɛ ɔ ´ka lɛ-ɔ. Ɔ wa yo kɛ olivie bɔ be fa waka be ti gua'n sa. Sɛ mma nnyɔn o annzɛ sɛ mma nsan o, be ´ka olivie'n i ti'n su lɔ. Yɛ sɛ mma nnan o annzɛ sɛ nnun o, be ´ka i sama'm be su. Ndɛ nga bɔ Anannganman b'ɔ ti Izraɛl Nyanmiɛn'n ɔ kan'n yɛ ɔ o lɛ-ɔ.

⁷ I cɛn sɔ nun'n, sran'n ɔ ´kpɛ i nyin sran b'ɔ yili i'n i su, ɔ ´mɛn i nyin su nian Izraɛl Nyanmiɛn'n.

⁸ Ɔ su kpɛ-mɛn i nyin amuɛn sɔwlɛ nga i bɔbɔ yoli'n be su. Amuɛn b'ɔ fɛli i bɔbɔ sa yoli be'n nin waka b'ɔ takali be'n, ɔ nin ansans yrawlɛ mun, ɔ su fɛ-mɛn i nyin sie-man be su kun.

⁹ I cɛn sɔ nun'n, Izraɛl klɔ nga be sili bé wun'n, be ´ka lɛ ngbɛn. Be ´yo kɛ laa nga bo mun nin kacɛ'm be nun tɔli koun blɛ bɔ Izraɛlfuɛ'm be juli lɛ'n sa. Lika'n ɔ ´yo srolololo.

¹⁰ Afin Izraɛlfuɛ mun, amun wla fili Nyanmiɛn b'ɔ deli amun'n i su. Amun wla ɔ'a kpɛn-man Anannganman b'ɔ ti kɛ yɛbuɛ sa b'ɔ man amun fanngan'n i su. I ti amun dili fie be mannin amun amuɛn'n. Waka kanngan bɔ be bo nnyrɛ'n, bɔ be wu ndɛndɛ'n, yɛ amun luali be fie sɔ'n be su-ɔ. Yɛ amun luali mɛn uflɛ'm be nun waka mma mun fie sɔ'm bé su wie.

¹¹ Cɛn kunngba nga amun luali waka mma'n, ɔ fifili, kpɛkuun i nglɛmun kunngba'n nun ɔ boli nnyrɛ. Sanngɛ blɛ bɔ nyrɛnnɛn cɛn'n juli'n, fie'm be su ninnge'm be fili ɔ́ sa. Yɛ afɛ ng'ɔ tɔli ɔ su'n, ɔ'a nyan-man ayre.

Mɛnmɛn'm be nunfuɛ'm be kplinlɛ

¹² Ee! Be nian kɛ sran kpanngban kpa be su kplin-ɔn, be kplinlɛ'n ɔ tɛ kɛ jenvie'n yɛ ɔ su bo sa. Be nganniɛn'n ɔ tɛ kɛ nzue dan b'ɔ sonji kekle kpa b'ɔ klu wuu'n sa.

¹³ Sran kaka sɔ'n be nganniɛn'n ɔ klu kɛ nzue dan wie yɛ ɔ su bo sa. Anannganman wlanwlan be, yɛ be wanndi kɔ mmua. Be kɔ kɛ oka'm be su lɔ ijre'n bɔ aunngban'n ɔ fita be kɔ'n sa. Be kɔ kɛ ndutre bɔ seke'n ɔ fa kɔ'n sa.

¹⁴ Kɛ nnɔsua wa ju'n, srɛ kun be, nglɛmun'n kɛ aliɛ'n ɔ wa cɛn'n, be wun-man be kun. Agualiɛ ng'ɔ ´gua be nga be fɛn é bo ninnge mun'n, bɔ be saci e bo ninnge mun'n yɛ ɔ o lɛ-ɔ .