Ezai 16 - NYANMIƐN NDƐ'N 1998

Moabfuɛ'm be waan Zerizalɛmfuɛ'm be `uka be

¹ Amun `fa mɛn'n i siefuɛ'n i bua bɔ ɔ'a kpɛ cro'n Sela lɛ ko mɛn i Siɔn oka'n su lɔ. Amun `sin aawlɛ'n nun lɔ nan amu'an wɔ .

² Arnɔn nzue ba'n i wun lɔ'n, Moab bla'm be ´yo kɛ anunman bɔ be wlan-wlan be tu be sin'n sa. Be ´yo kɛ anunman ba kanngan bɔ b'a kan bé bo bé sua'n nun'n sa.

³ Moab bla'm be se Zerizalɛmfuɛ'm be kɛ: «E waan amun man ye afɔtuɛ. Amun `yo sa wie man ye. Wia klengle kpa nun'n, amun `kata e su kɛ lika tuun'n ɔ kata ninnge'm be su kɔnguɛ'n sa. Be nga mianlɛ ti be su kunndɛ sikewlɛ'n, be nga be su wanndi be kunndɛ fiawlɛ'n, nán amun yi be man.

⁴ Amun `kplin su kɛ e sran nga mianlɛ ti be su kunndɛ lika be tran nun'n be `nyan kisawlɛ amún wun lɛ. Amun `sasa be sran ng'ɔ saci like'n i lika. Kɛ sran'm be mianlɛ bɔ be mian be'n ko wie'n, kɛ sran'm be bo ninnge fɛnlɛ'n ko wie'n, kɛ sran b'ɔ tin sran'm be su kplɔlɔlɔ'n ɔ ko tu mɛn'n nun'n,

⁵ i blɛ sɔ nun'n, amun klun kpa'n ti, amun famiɛn diwlɛ'n ɔ ´taka kpa. Yɛ jɔlɛ difuɛ kun b'ɔ ti sran kpa'n, ɔ ´tran famiɛn bia'n su David i awlo'n nun. Jɔlɛ difuɛ sɔ'n, ɔ ´yo sa ng'ɔ ti i nuan su'n tititi, ɔ ´nian mmla'n su, ɔ ´fa cici i ti .»

Zerizalɛmfuɛ'm be kwla yo-man like fi be man-man Moabfuɛ mun

⁶ E tili Moabfuɛ'm bé wun tulɛ ndɛ'n. E tili bé wun kpakpa yolɛ ndɛ'n, ɔ nin bé wun dandan yolɛ'n, nin be nuan dilɛ'n, ɔ nin be wun ngbli-ngbli yolɛ'n.

⁷ I sɔ'n ti Moabfuɛ be sun be bɔbɔ bé wun. Be kwlaa be yi ngwlɛ. Amun sun Kir-Arezɛt i sacilɛ'n b'ɔ sacili'n ti, ɔ yo amun ya lele tra su.

⁸ Ɛsbɔn lɔ bo'n nin kacɛ'n b'a wie saci. Sibma lɔ vinyi fie bɔ be kɔ lele ju Zaɛzɛr nin aawlɛ flɛnnɛn'n nun lɔ'n, mɛn-mɛn'm be siefuɛ'm b'a saci be nun vinyi bɔ bé sama'm be trɛ lele ju jenvie'n i sin lɔ'n.

⁹ I sɔ'n ti, e nin Zaɛzɛrfuɛ mun e sun Sibma lɔ vinyi fie'm be ti. Ɛsbɔnfuɛ mun, Elealefuɛ mun, min nyinmuɛn'n ɔ gua amun ti. Afin amun fie'm be su ninnge bɔ amun nyannin be'n, alɛ'n ɔ wa sacili be kwlaa kpan.

¹⁰ Kɛ amun wo amun fie'm be su'n, be wun-mɛn i kɛ amun klun jɔ kun, be wun-mɛn i kɛ amún wun kpaja amun kun. Be ti-mɛn i kɛ amun to jue vinyi fie'm be nun kun, be ti-mɛn i kɛ amun bo sro kun. Be nga be yi nzan'n, be yi-man guɛ-mɛn i nzan guawlɛ dandan'm be nun kun. Be srolɛ'n kwlaa ɔ'a wie.

¹¹ I sɔ'n ti, min anwlɛn'n ɔ keje min klun kɛ jru nyanman sa Moabfuɛ'm be ti. Min anwlɛn'n kpɛ min klun Kir-Erɛsfuɛ'm be ti.

¹² Moabfuɛ'm be fu kɔ sraka yiwlɛ lika mun bɔ be o kpɔlɛ'm be su'n be nun lɔ, be ko kle bé wun yalɛ ngbɛn. Be kɔ amuɛn sua'n nun be ko srɛ, sanngɛ ngbɛn-ɔn .

¹³ Ndɛ nga bɔ Anannganman kan mannin Moabfuɛ mun lalaa'n yɛ ɔ o lɛ-ɔ.

¹⁴ Siɛn'n Anannganman wan yoo: «Kannzɛ Moabfuɛ'm be sɔnnin bɔbɔ'n, ɔ'a ka afuɛ nsan sɛsɛsɛ be anyrunnyan'n ɔ ´wie. Be ´yo sran kaan nga be ´ka lɛ'n be finfin, be nyrun'n ɔ ´wie.»