Ezai 15 - NYANMIƐN NDƐ'N 1998

Moab i wun ndɛ

¹ Sa ng'ɔ tɔli Moabfuɛ'm be su'n yɛ. Kɔnguɛ afiɛn kunngba bɔ be sacili Ar-Moab'n, ɔ kali lɛ nunnunnin. Kɔnguɛ afiɛn kunngba bɔ be sacili Kir-Moab'n, ɔ kali lɛ mlinnin sa weiin.

² Dibɔnfuɛ'm be kɔ amuɛn sua'm be nun be ko sun. Be kɔ sraka yiwlɛ mun bɔ be o kpɔlɛ'm be su'n be nun, be ko sun. Moabfuɛ'm be kɔ Nɛbo oka'n su be ko yi ngwlɛ. Be kɔ Medɛba klɔ lɔ be ko yi ngwlɛ. B'a yi bé ti'm be kwlaa, b'a yi be akanza'n kwlaa.

³ Klɔ'm be atin'm be nun'n, a ´wun sran mun-ɔn, bajɛ tralɛ yɛ ɔ wla bé wun-ɔn. Sran'm be fu sua'm bé ti gbagblagba'm be su, annzɛ be tran gua'm be su be yi ngwlɛ, yɛ be sun kpa piaan.

⁴ Ɛsbɔnfuɛ mun nin Elealefuɛ mun be kpan, be ti be ngan Zaaz lɔ. I sɔ'n ti yɛ Moab lɔ sonja'm be bo awuyomo dan nin-ɔn, be wawɛ'n ɔ'a tɔ blo.

⁵ N koko Moabfuɛ mun, be wanndi kɔ lele Zɔar, be wanndi kɔ lele Eglat-Sɛlisiza. Kɛ be ´fu Lisit oka'n, wuun be ´sun, afin sa kekle o be su. Kɛ be ´fa Kɔrɔnaim atin'n be ´kɔ'n, wuun be ´kpan kekle kpa.

⁶ Afin Nimrim nzue ba'n ɔ'a wie nun, afin ijre'n ɔ'a wu kee. Ijre mɔnnɛn fi nun-man lɛ kun, nnya-nnya fi nun-man lɛ kun.

⁷ I sɔ'n ti, bé bo ninnge nga be kali lɛ'n, bɔ be kwla sieli be kpa'n, be fa be kɔ mmua kpa nzue ba nga peplie waka'm be sɔnnin i nuan lɛ'n i sin lɔ.

⁸ Afin be kpanlɛ i nganniɛn'n ɔ kɔ lele ju Moab mɛn'n i bue kwlakwla su. Be ngwlɛ bɔ be yi'n ɔ kɔ lele ju Eglaim. Be ngwlɛ bɔ be yi'n ɔ kɔ lele ju Beɛr-Elim.

⁹ Dimɔn nzue ba'n ɔ ti mmoja ngunmin. N wa fa nyrɛnnɛn uflɛ n ´yi i Dimɔnfuɛ'm be su. Moabfuɛ nga be kali lɛ'n, asɔmɔli kun ɔ wa jaso bé wun, ɔ wa jaso be nga be kali Moab asiɛ'n su'n bé wun.