Ezai 14 - NYANMIƐN NDƐ'N 1998

Be nga be fali be yoli kanga'n bé sin salɛ

¹ Anannganman wa si Zakɔb osu'n nunfuɛ'm be aunnvuɛ. Sran'm be ´wun nun ekun kɛ kannzu ɔ kpali Izraɛlfuɛ mun, yɛ ɔ ´yo man be ´tran be lika'n nun ekun. Aofuɛ'm be wa uka be su, yɛ be nin Zakɔb i nvle'n nunfuɛ'm be ´yo kun.

² Aofuɛ'm be wa fa Izraɛlfuɛ mun ba Izraɛl asiɛ'n su. Izraɛlfuɛ'm be ´sɔ aofuɛ sɔ'm be nun kɛ be aja like sa Anannganman i asiɛ'n su. Be ´fa be ´yo kanga bla mun nin kanga yasua mun. Be nga bɔ be wlali Izraɛlfuɛ'm be bisua'n, be ´wla be bisua wie. Yɛ be wa sie be nga be tinnin be su laa'n.

Babilɔni famiɛn'n i agualiɛ'n

³ Izraɛlfuɛ mun, cɛn nga Anannganman yo nan amún wun jɔ amun fɔun'n, sɛ amun afɛ'n nin amun nyrɛnnɛn'm be wie'n, sɛ be yaci amun nun bɔ amun ti-man kanga kun'n,

⁴ amun `sro jue ng'ɔ o yɛ'n wɔ Babilɔni famiɛn'n. Amun `se kɛ: Ai! ?Sran ng'ɔ sie sran mun bɔ tin be su'n, i liɛ a wie? ?Mianlɛ bɔ be mian sran mun kplɔlɔlɔ'n, i blɛ'n ɔ'a sin?

⁵ Klunwifuɛ mun bɔ be sie sran mun klunwi su'n, Anannganman ɔ'a bu be sielɛ'n i bue. Be nga be tin sran'm be su'n, Anannganman ɔ'a bubu be nyantiaan'm be nun.

⁶ Sran b'ɔ fali ya'n, b'ɔ di sran'm be tɛtɛ'n, b'ɔ bo be tititi'n, sran sɔ'n b'ɔ fali ya'n, b'ɔ tinnin nvle-nvle'm be nunfuɛ'm be su kplɔlɔlɔ'n, be nin i be lɛ i, be yo-mɛn i blɛblɛ.

⁷ Asiɛ wunmuan'n ɔ'a jɔ fɔuun, sran'm be klun ti jɔwa, be bo sro.

⁸ Sɛ e ´kwla se'n, waka'm be bɔbɔ be klun ti jɔwa sran'n b'ɔ tin sran'm be su'n i agualiɛ'n ti. Siprɛs waka mun nin Liban lɔ sɛdri waka mun be se sran sɔ'n kɛ: «Kɛ ɔ fin cɛn bɔ a tɔli'n, be ba-man kɛ be wa kpɛ e bo kun.»

⁹ Sɛ e ´kwla se'n, asiɛ'n bo lɔ'n, ɔ nun sɔlɛ'n ti, blɔlɔ lɔ lika'n ɔ keje. Asiɛ'n su sran dandan nga b'a wu'n be kwlaa be tinnge. Ɔ yo man famiɛn nga be o nvle'm be kwlaa be nun'n be jaso be famiɛn bia'm be su.

¹⁰ Be kwlaa be se wɔ kɛ: «Ɔ kusu, a lɛ-man wunmiɛn kɛ ye sa, w'a kaci kɛ ye sa!»

¹¹ Ɔ wun kpakpa bɔ a yo'n, nin ɔ jru'm be tɛlɛ'n, i kwlaa sɔ'm ɔ'a ɔ blɔlɔ lɔ. Kakaa mma mun yɛ be ti ɔ bɛ bɔ a la su nin-ɔn. Yɛ kakaa mma mun yɛ be ti ɔ kondro bɔ a fa kata ɔ su nin-ɔn.

¹² Ai! ?Nan nzu sa yɛlɛ nga? ?Nja, wɔ bɔ a ti kɛ awɛ nzraama b'ɔ kpaja nglɛmun'n sa'n, kɛ ɔ o yɛ'n w'a fin nyanmiɛn su lɔ w'a tɔ? ?Wɔ bɔ a sie nvle-nvle mun'n, bɔ a tin be su kplɔlɔlɔ'n, kɛ ɔ o yɛ'n, b'a su ɔ bo b'a yi i asiɛ'n su wa ?

¹³ A seli ɔ klun lɔ kɛ: «N ´fu lele n ju nyanmiɛn su lɔ. N ´fa min famiɛn bia'n n ´sie i Nyanmiɛn i nzraama'm be su nglo. N ´ko tran oka bɔ ninnge nga be su be'n be kwlakwla be yia su'n i su. N ´ko tran be oka su'n wie.

¹⁴ N ´fu nyanmiɛn ble'n i su lɔ, e nin Nyanmiɛn b'ɔ like fi nun-mɛn i sin'n e ´sɛ.»

¹⁵ Sanngɛ be suli ɔ bo yili i blɔlɔ lɔ, be suli ɔ bo yili kunman dan'n i bo lɔ kpa crɔcrɔcrɔ.

¹⁶ Be nga be wun wɔ'n, be nian wɔ kpa siin, kɛ be wun wɔ'n, be nian wɔ lelele, be tu-man be nyin. Yɛ be usa kɛ: «?Sakpa, sran ng'ɔ yo bɔ asiɛ'n keje'n, b'ɔ yo man famiɛn diwlɛ'm bé nyin utu ase'n, yɛ ɔ o yɛ?

¹⁷ ?Sran b'ɔ yo man mɛn'n ɔ kaci kɛ aawlɛ flɛnnɛn sa'n, sran b'ɔ saci klɔ mun'n, sran b'ɔ kplin-man su kɛ ɔ ´yaci i bisuafuɛ'm be nun'n, sran sɔ'n yɛ ɔ o yɛ?»

¹⁸ Nvle'm be famiɛn'm be kwlakwla, be kwlakwla kpan, be nyannin nyrun. Kɛ e ´se yɛ'n, be la be ndia'm be nun sɛsɛsɛ.

¹⁹ Sanngɛ ɔ liɛ'n, be yili ɔ saka'n i blo. A ti kɛ tete ba bɔ wa wu i nin klun'n sa, w'a nyan-man asieliɛ. A ti kɛ fuɛn b'ɔ b'a tiatia su'n sa. A ti kɛ be nga be fali tokofi be kunnin be'n, bɔ be suli be saka'm bé bo guali kunman wie nun lɔ yɛbuɛ'm be su'n sa.

²⁰ Sanngɛ ɔ liɛ'n, a su to-man be asieliɛ lɔ, afin a sacili ɔ mɛn'n, a kunnin ɔ nvle'n nun sran mun. Ɔ osu'n nunfuɛ mun, klunwifuɛ sɔ mun, be su bo-man be dunman be di-man jɔlɛ kun le.

²¹ Amun `bu ba'm be kunlɛ akunndan bé si bɔ be kunnin sran mun'n be ti. Amun `yo i sɔ, kɛ ɔ ´yo nan b'a man-man bé wun su kun, nan b'a fa-man asiɛ'n nan b'a kplan-man klɔ mun i lika kwlaa'n ti.

²² Anannganman b'ɔ sie mɛn wunmuan'n wan yoo: «N wa jaso bé wun, n wa nunnun Babilɔni i dunman'n nin sran nga be kali nun lɛ'n mun. N wa nunnun Babilɔnifuɛ mun nin be nga be wa jaso su'n.» Anannganman'n yɛ ɔ se sɔ-ɔ.

²³ «N wa yo man Babilɔni ɔ ´yo kɛ fɔkɔ sa, ɔ ´yo jukunin'm be lawlɛ. N ´nunnun i, be su wun-mɛn i osu'n kɛ b'a fa kuanwla b'a cuan-cuan lika sa.» Anannganman b'ɔ sie mɛn wunmuan'n yɛ ɔ kan sɔ-ɔ.

Anannganman ɔ ´yo man Asirifuɛ'm be sielɛ'n ɔ ´wie

²⁴ Anannganman b'ɔ sie mɛn wunmuan'n ɔ tali nda kɛ: «Sa nga n guguli kɛ n ´yo'n, san ɔ ´kpɛn su, like nga n kannin kɛ ɔ ´ju'n, san i nuan ´yia.

²⁵ N ´saci Asirifuɛ'm be tinmin'n min mɛn'n nun, n ´tiatia be su min oka'm be su. Sielɛ kekle nga be fa sie amun'n, ɔ ´wie. Be trɔ ng'ɔ wo amun wati su'n, ɔ ´foli tɔ.»

²⁶ Like nga Anannganman ɔ'a fua kɛ ɔ ´fa yo asiɛ wunmuan'n i sufuɛ mun'n yɛ ɔ o lɛ-ɔ. Sa nga i waan ɔ ´fa wlɛ i nvle-nvle'm be nunfuɛ'm be kwlaa be nun'n yɛ ɔ o lɛ-ɔ.

²⁷ ?Sa nga Anannganman b'ɔ sie mɛn wunmuan'n ɔ gugu kɛ ɔ ´yo'n, wan yɛ ɔ ´kwla jrɛn i-ɔ? ?Sɛ ɔ mɛn i sa'n su kɛ ɔ ´yo sran like'n, wan yɛ ɔ kwla kpalo i sa sɔ nin-ɔn?

Be kannin ndɛ nga kleli Filistifuɛ mun

²⁸ Afuɛ nga bɔ famiɛn Akaz wuli nun'n, be kannin ndɛ ng'ɔ o yɛ'n:

²⁹ Amun Filistifuɛ mun kwlaa, nán amun klun jɔ waka nga be fa boli amun'n i bubulɛ bɔ ɔ'a bubu'n ti! Yɛlɛ kɛ ɔnda ´fite wuo'n i osu'n nun, yɛ dragɔn b'ɔ tu'n, ɔ ´fin i nun fite.

³⁰ Be nga be lɛ-man like'n, bé wa klikli'm be ´nyan like be ´di, yɛ be nga be ti yalɛfuɛ'n, sa tɛ fi su nyan-man be. Sanngɛ amun Filistifuɛ mun, awe'n ɔ ´kun amun osu'n nunfuɛ mun, yɛ amun nun sran nga be ´ka lɛ'n, be ´kun be.

³¹ Anuan nga amun wo klɔ bɔ be si bé wun'n be nun'n, amun ´bo awuyomo, amun ´kpan kekle kpa. Filistifuɛ'm be kwlaa bé sa sin ɔ'a bubu be, afin sin wɛnsrɛn'n fin mɛn'n i nglo lɔ ba. Be kpɔfuɛ'm bé nuan ti yiawa, sran fi a ka-man siɛn.

³² ?Be ´tɛ Filistifuɛ'm be sunmanfuɛ'm be su sɛ? Be ´tɛ be su kɛ: «Anannganman kplannin Siɔn klɔ'n, ɔ man be nga be ti yalɛfuɛ i sran'm be nun'n, be ´nyan fiawlɛ lɔ.»