Ezai 13 - NYANMIƐN NDƐ'N 1998

Babilɔni i agualiɛ'n

¹ Sa nga Anannganman waan ɔ ´fa wla Babilɔnifuɛ'm be nun'n, bɔ Amɔz i wa Ezai wunnin i, b'ɔ tili'n yɛ:

² «Amun `kplan nzɔliɛ kun oka bɔ like fi fifi-man su'n i su, amun `kpan kekle be flɛ be, amun `fa amún sa flɛ be. Man be sin Babilɔni anuan'm be nun be bla.

³ Be nga be ti min liɛ'n, n kleli be like wie kɛ be `yo. N flɛli min sonja'm be nun safunyrɛn bɔ be kun alɛ bɔ man n nyan nyrun'n. Min waan be `tu n klunngbɔ man min.»

⁴ Amun `sie amún su be tie nganniɛn ng'ɔ tɛ oka'm be su lɔ'n, ɔ waan sran kpanngban kpa be nganniɛn-ɔn. Amun `tie famiɛn diwlɛ mun nin nvle-nvle'm be nun sran bɔ b'a yia'n be nganniɛn b'ɔ tɛ'n. Anannganman b'ɔ sie mɛn wunmuan'n, ɔ su nian-nian be nga be su wa kɔ alɛ'n i kunlɛ mun ´sin.

⁵ Be fin mɛn kun nun mmua kpa, be fin asiɛ'n i tiwa lɔ yɛ be ba-a. Anannganman nin be ng'ɔ fa be yi i ya'n i nglo'n be ´fa nyrɛnnɛn be ´yi mɛn wunmuan'n su.

⁶ Amun `bo awuyomo, afin Anannganman i cɛn'n ɔ'a mantan koko. Ɔ ´ba kɛ Anannganman b'ɔ kwla like'n kwlaa yo'n i like b'ɔ saci like'n kwlaa'n sa .

⁷ I sɔ'n ti sran'm bé sa'm be kwlaa b'a glɔ bé wun. Yɛ be kwlaa bé sa sin ɔ'a bubu be.

⁸ Srɛ'n ɔ'a kun be kpo. Be wunnɛn'n ɔ'a yo be sa zizrizi, bé kplo'n nun yo be ya, be kluklu kɛ bla bɔ ɔ'a koto awuliɛ'n sa. Be nian be wiengu siin, srɛ kun be, bé nyrun'n ɔ'a kpa fuaii.

⁹ Amun `nian, Anannganman i cɛn'n ɔ su ba, i ya dan'n i cɛn'n su ba, i ya ble'n i cɛn'n su ba, cɛn sɔ'n ti-man blɛblɛ. Anannganman ´yo man asiɛ'n su ´tɔ koun, ɔ ´nunnun sa tɛ yofuɛ mun .

¹⁰ Nglo lɔ nzraama'm be su kpaja-man kun. Kɛ wia'n ɔ fite cɛ'n, kpɛkuun ɔ'a nuan, yɛ anglo'n ɔ su ta-man kun .

¹¹ Anannganman waan: «Mɛn'n nunfuɛ'm be klunwi'n ti, m ´bu be fɔ, yɛ be bɔ be sro-man Nyanmiɛn'n, bé sa tɛ bɔ be yo'n ti, m ´bu be fɔ. N ´jran wun tufuɛ'm bé wun dandan bɔ be yo'n, yɛ be nga bɔ kɛ be ´sie sran'm be tin be su'n, bé wun ngbli-ngbli yolɛ'n, n ´kɛn i ase.

¹² N ´yo man sran'm be kaci kɛ sika ɔkwlɛ jrɛin bɔ be tɛ-mɛn i nyan'n sa. N ´yo man be su wun-man sran'm be kplakpla, ɔ ´yo kɛ Ɔfir lɔ sika ɔkwlɛ bɔ be nyɛn-mɛn i finfin'n sa.»

¹³ I sɔ'n ti, min Anannganman bɔ n sie mɛn wunmuan'n, min ya dan bɔ m'an fa'n nin min anwlɛn bɔ fita min klun'n ti, n wa keje nyanmiɛn su lɔ'n, yɛ n ´keje asiɛ'n kusu.

¹⁴ Kɛ ɔ ko yo sɔ'n, be ´sa bé sin be nvle'n nunfuɛ'm bé sin, be wanndi kɔ bé mɛn'n nun. Be ´yo kɛ wannzannin bɔ b'a wlanwlan be'n be sa. Be ´yo kɛ bua bɔ be lɛ-man sran nian-man be su'n sa.

¹⁵ Be nun sran kwlaa nga be to i'n, be ´fa ta be ´srɛn-srɛn i, be kwlaa nga be tra be'n, be ´kun be nin tokofi.

¹⁶ Sran wie'm be ´yi sran sɔ'n bé wa nɔnman'm be ase, be ´tiatia be su be bɔbɔ be nyrun lɛ, sran wie'm be nin sran sɔ'm bé yi mun be ´la kekle nun.

¹⁷ Anannganman waan: «Medifuɛ bɔ be ndɛ nun-man jɛtɛ ufue ndɛ nun'n, bɔ be bu-man sika ɔkwlɛ'n i like fi'n, n ´yo man be jaso sran sɔ'm bé wun.

¹⁸ Be ´fa be ta'm be ´to gbanflɛn'm bé wun, be ´gua be ase fɛiin, be su yaci-man ba nɔnman'm be lɛ. Ba kanngan'm be su yo-man be annvɔ.»

¹⁹ Yɛ Babilɔni b'ɔ ti kɛ famiɛn diwlɛ'm be afle klanman sa'n, b'ɔ ti kɛ Kaldefuɛ'm bé wun fafalɛ like sa'n, bɔ be fa di bé nuan'n, ɔ wa yo kɛ Sodɔm nin Gomɔr bɔ Nyanmiɛn sacili be laa'n sa.

²⁰ Sran'm be su tran-man nun mlɔnmlɔn kun, sran'm be su tran-man lɛ kun nan kɛ ɔ ´yo-ɔ ɔ'a yo. Arabfuɛ'm be su kplan-man be tannin sua'n lɛ, yɛ bua kankanfuɛ'm be su jran-man lɛ.

²¹ Sanngɛ blo jɛkuajo'm be ´fa yo be ´fiawlɛ, yɛ akpatue'm be ´yi lɔ sua mun, klɔnsoklo'm be ´fa sua sɔ mun yo be tranwlɛ, yɛ boli kpakpuɛ'm be ´si able nun.

²² Gboklo'm be ´nyan tranwlɛ klɔ'n nun sua dandan'm be nun, yɛ nsoso'm be ´nyan tranwlɛ sua kpakpa'm be nun. Babilɔni i blɛ'n wa mantan, ɔ su ba, be su tu-mɛn i cɛn'n kɔ-mɛn i sin kun.