Ezai 11 - NYANMIƐN NDƐ'N 1998

Sran kun wa jaso su Izai osu'n nun

¹ Sran kun ɔ ´jaso su Izai osu'n nun kɛ waka sama'n ɔ fɛfɛ waka'n i bo'n su'n sa. Ɔ wa jaso su kɛ waka nɔnman'n ɔ fɛfɛ waka i olui'n su'n sa .

² Anannganman i wawɛ'n wo i su. Wawɛ sɔ'n ɔ ti ngwlɛlɛ wawɛ, nin sa kpa'n yɛ sa tɛ'm be silɛ wawɛ, nin sa siesielɛ wawɛ, nin wawɛ b'ɔ kwla yo sa ng'ɔ siesie kɛ ɔ ´yo'n, ɔ ti wawɛ b'ɔ man be si Anannganman, b'ɔ man be ´nyin yi i.

³ Sran sɔ'n i nyin ´yi Anannganman. Sran sɔ'n ɔ su nian-man sran nyrun nan ɔ'a bu ndɛ, nán be waan yɛ ɔ ´fa kɛn i ndɛ liɛ nin-ɔn.

⁴ Be nga be ti yalɛfuɛ'n, ɔ ´di be ndɛ'm be kpa. Be nga be kle be yalɛ mɛn'n nun'n, ɔ ´bu be ndɛ mun kɛ ɔ fata'n sa. I ndɛ ng'ɔ fin i nuan ´fite'n ɔ ´yo kɛ waka bɔ be fa bo sran'n sa, ɔ ´fa bo mɛn'n nunfuɛ mun. Ndɛ ng'ɔ fin i nuan fite'n, ɔ ´yo man sran tɛ'm be wu.

⁵ Ɔ ´fa mmla'n i su falɛ'n ɔ ´fa cici i ti, yɛ ɔ ´fa nanwlɛ dilɛ'n ɔ ´fa ci i afiɛn kɛ bé bo kplo sa.

⁶ Gboklo nin bua bɔ ɔ'a kpɛ cro'n be ´tran likawlɛ. Kangale'n nin boli bɔ ɔ'a kpɛ cro'n be ´la likawlɛ, nannin ba'n nin asɔmɔli ba'n, ɔ nin nnɛn nga be tɛ i bé sa nun'n be ´di like likawlɛ. Yɛ ba kaan kun yɛ ɔ ´kankan be-ɔ.

⁷ Nannin bla'n nin nnɛn ngble bɔ be flɛ i urs'n bé ´didi likawlɛ. Be mma'm be ´la be ´mantan be wiengu. Asɔmɔli'n, ɔ ´di ijre kɛ nannin sa.

⁸ Bakan b'ɔ tɛ nɔn nyɔnflɛn'n, ɔ ´kan ngowa ɔnda'n i lawlɛ'n nun. Yɛ bakan'n ɔ ´kwla fɛ i sa ´wla wo'n i buɛ'n nun.

⁹ Be su yo-man sa tɛ Anannganman i oka'n su, be su saci-man like fi Anannganman i oka'n su. Kɛ jenvie'n i nzue'n ɔ kata i bo lɔ'n su'n ju'n, i kunngba nin-ɔn, asiɛ'n wunmuan'n su sran'm be ´si Anannganman lelele .

¹⁰ I cɛn sɔ nun'n, sran ng'ɔ wa jaso su Izai osu nun'n, ɔ wa yo sran'm be nzɔliɛ like. Nvle-nvle'm be nunfuɛ'm be ´kpɛ bé nyin i wun lɔ. Yɛ i tranwlɛ'n ´yo anyrunnyan lika.

Be nga be bo sanndili mɛnmɛn'm be nun'n bé sin salɛ

¹¹ I blɛ sɔ nun'n, Anannganman ɔ ´mɛn i sa'n su kpɛ nnyɔn su . Ɔ ´kpɔ i sran nga be kali lɛ'n bé ti. I sran nga be kali Asiri lɔ'n nin Ezipt lɔ'n, nin Etiopi lɔ'n, i sran nga be kali Elam lɔ'n nin Babilɔni lɔ'n, nin Amat lɔ'n, ɔ ´kpɔ bé ti. I sran bɔ be kali lika nga bɔ be o jenvie nuan'n, ɔ ´kpɔ bé ti.

¹² Ɔ ´kplan nzɔliɛ kun fa man nvle-nvle mun. Ɔ wa flɛflɛ Izraɛlfuɛ nga be kannin bé bo bé mɛn nun'n. Ɔ wa tian Zidafuɛ nga be bo sanndili asiɛ'n i bue nnan'n su'n be nuan.

¹³ Kɛ ɔ yo sɔ'n, Efraim i kwla silɛ'n ɔ ´wie, yɛ Zida i kpɔfuɛ'm be ´wie nunnun. Efraim i nyin su blo-man Zida wun kun, yɛ Zida i nyin su ci-man Efraim kun.

¹⁴ Bé bo ´yo kun, be ´tɔ Filistifuɛ mun bɔ be o wia atɔliɛ lɔ'n bé su. Yɛ be ´fɛn be nga be o wia afiliɛ lɔ'n bé bo ninnge mun. Bé sa ´kan Edɔmfuɛ mun nin Moabfuɛ mun. Yɛ Amɔnfuɛ'm be ´yo be kanga.

¹⁵ Anannganman ´yo man Ezipt jenvie'n ɔ `wie nun. Ɔ ´tinngɛ i sa Efrata nzue ba'n su. Ɔ ´fita su kekle kpa fuu, Ɔ ´kpacikpaci nzue ba sɔ'n nun nso, kpɛkuun sran'm be ´nanti be ja be ´kpɛ.

¹⁶ I sran nga be kali lɛ'n, bɔ Asirifuɛ'm b'a yo-man be like'n, be ´nyan atin kun be ´sin nun. Ɔ ´yo kɛ Izraɛlfuɛ'm be liɛ'n sa. Laa bɔ be ´tu Ezipt lɔ'n, be nyannin atin kun be fali su.