Ezai 10 - NYANMIƐN NDƐ'N 1998

Be nga be klɔklɔ Anannganman'n

¹ Be nga be kpɛ mmla tɛtɛ mun, bɔ be kpli be klɛ mmla nga be kle sran'm be nyrɛnnɛn'n, be yako!

² Be di-man yalɛfuɛ'm be ndɛ liɛ mun. Like ng'ɔ ti min nvle nun yalɛfuɛ'm be liɛ'n, be fa man-man be. Angboti mmla'm b'a kaci kɛ bé nuan nun nnɛn sa, be di be lufle pɔɔ, yɛ be de aika'm bé sa nun ninnge mun.

³ ?Fɔ bulɛ cɛn nun'n, nin nyrɛnnɛn ng'ɔ fin mmua ba'n i cɛn nun'n, amun ´yo i sɛ? ?Wan yɛ amun ´wanndi ko talo i-ɔ? ?Yɛ nin yɛ amun ´yaci amun anyanbeun ninnge mun-ɔn?

⁴ San bisuafuɛ'm be afiɛn kunngunlɛ nin be nga b'a kun be'n be afiɛn tɔlɛ yɛ ɔ nin amun a ka-a. Sanngɛ ɔ nin i sɔ'n ngba'n, Anannganman i ya'n ɔ su jɔ-man, ɔ nin amun ´nyɛn i tititi.

Asirifuɛ'm be yoli sa tra trali su

⁵ Asirifuɛ'm bɔ be ti kɛ min nyantiaan sa'n, be yako! Waka'n b'ɔ o bé sa nun'n, yɛ n ´fa di min ya'n i su junman-an.

⁶ Min waan be wɔ nan be ko kle sran nga be bu-man min like fi'n, be nyrɛnnɛn. Min waan be `ko tɔ sran nga be fɔkɔ min anwlɛn'n be su nan be `fɛn bé bo ninnge'n be `fa. Min waan be tiatia be su kɛ be tiatia atin nun nnɔtiɛ'n nun'n sa.

⁷ Sanngɛ be liɛ'n, nán kɛ be bu i sɔ-ɔ, be akunndan liɛ'n, nɛ́n i yɛlɛ ng'ɔ o lɛ'n. Like dan sacilɛ nin sran kpanngban kpa be kunlɛ'n yɛ ɔ o be klun-ɔn .

⁸ Afin be se kɛ: «?E famiɛn i awlo lɔ sran dandan'm be nin famiɛn'm be sɛ-man?

⁹ ?Sa kunngba nga e fa yoli Kalne'n, nɛ́n i kunngba'n yɛ e fa yoli Karkemis-ɔ? ?Nga e fa yoli Amat'n, nɛ́n i yɛ e fa yoli Arpad-ɔ? ?Nán sa kunngba'n yɛ e fa yoli Samari nin Damas-ɔ?

¹⁰ Mɛn nga be amuɛn'm be sɔnnin tra Zerizalɛmfuɛ mun nin Samarifuɛ'm be liɛ'n, e sa kannin be.

¹¹ ?Sa nga e fa wlali Samarifuɛ mun nin be amuɛn'm be nun'n, e kwla fa wla-man Zerizalɛmfuɛ mun nin be amuɛn liɛ'm be nun wie?»

¹² Sɛ Anannganman ko wie i junman'n kwlakwla di Siɔn oka'n su lɔ nin Zerizalɛm lɔ'n, ɔ nin Asiri famiɛn'n be ´yia nun i wun tulɛ'n nin i wun dandan yolɛ'n ti.

¹³ Afin Asiri famiɛn'n seli kɛ: «Min bɔbɔ min wunmiɛn'n yɛ n fa n dili junman ng'ɔ o lɛ'n kwlakwla-a. Min ngwlɛlɛ'n yɛ n fa yoli i kwlakwla-a, afin n ti akunndanfuɛ. N sieli nvle-nvle'm be anyialiɛ'm be uflɛ. N fali nvle-nvle'm be nunfuɛ'm bé anwlɛn su ninnge mun. Kɛ bɔ n lɛ nyrun'n ti'n, n yoli man famiɛn'm be tɔli.

¹⁴ N fali nvle-nvle'm be nunfuɛ'm be anyanbeun kɛ be fa anunman sua'n sa. N fali asiɛ wunmuan'n kɛ be isa klenzua ng'ɔ o lɛ ngbɛn'n sa. Sran fi ɔ'a keje-mɛn i wun, sran fi ɔ'a tike-mɛn i nuan, sran fi ɔ'a kpan-man.»

¹⁵ ?Kpɛliɛ'n ɔ tu i wun gua sran ng'ɔ fɛ i di junman'n i su? ?Annzɛ bese'n ɔ yo i wun kpakpa sran ng'ɔ fɛ i kpɛ like'n i su? ?Ngble'n kwla fa sran ng'ɔ trɛ i nun yo like? Kannzɛ e fa sran sunnzun waka'n, sanngɛ nyantiaan'n ɔ kwla mɛn-mɛn i su.

¹⁶ I sɔ'n ti, Nyanmiɛn Kpli'n, Anannganman b'ɔ sie mɛn wunmuan'n, ɔ man Asiri famiɛn'n i sran mun bɔ be wunnɛn o nun'n, be ´yo koklo, yɛ i sran kpakpa mun'n, like wie ɔ ´jue be afiɛn, ɔ ´yra kɛ sin sa.

¹⁷ Izraɛl'n i kpajalɛ b'ɔ kpaja'n ɔ ´kaci sin, yɛ i Nyanmiɛn'n ɔ ´yo kɛ sin taaman sa, ɔ wa sɔ, ɔ ´yra susrɛ mun nin owie mun, ɔ ´yra be cɛn kunngba lekeleke.

¹⁸ Ɔ ´nunnun i bo nglanman-nglanman mun nin i fie bɔ be yo ye mun. Be wa yo kɛ tukpacɛfuɛ bɔ wunmiɛn nun-mɛn i nun kun'n sa.

¹⁹ Bo'n nun waka nga be ´ka lɛ'n, be su sɔn-man kun, bakan kun kwla ka be si bé nuan bɔbɔ.

Izraɛlfuɛ nga be kali lɛ'n

²⁰ I cɛn sɔ nun'n, Izraɛlfuɛ onga mun nin Zakɔb i osu'n nunfuɛ nga be kali lɛ'n, be wa yaci sran ng'ɔ kleli be yalɛ'n i su kisalɛ. Be wa fa bé wla'n ngba be ´guɛ i Anannganman b'ɔ ti Izraɛl Nyanmiɛn'n i su.

²¹ Zakɔb i osu'n nunfuɛ onga kan'n, be ´sa bé sin Nyanmiɛn b'ɔ kwla'n i sin.

²² Izraɛlfuɛ mun, kannzɛ amun sɔnnin kɛ jenvie nuan aunnyan sa'n, amun nun sran kaan nga be kali lɛ'n be yɛ be ´sa bé sin be ba Anannganman sin-ɔn. Sran'm be nunnunlɛ'n, kɛ ɔ yoli yɛ ɔ yoli-ɔ, san ɔ ´ju, san mmla'n i su sa'n ɔ ´yo .

²³ Anannganman b'ɔ sie mɛn wunmuan'n, sran'm be nunnunlɛ b'ɔ guguli kɛ ɔ ´yo'n, ɔ'a bo i bo mɛn wunmuan'n nun.

Anannganman waan nán Izraɛlfuɛ'm be sro Asirifuɛ mun

²⁴ I sɔ'n ti, ndɛ nga Anannganman b'ɔ sie mɛn wunmuan'n ɔ kan'n yɛ, i waan: «Min sran mun, amun bɔ amun wo Siɔn'n, nán amun sro Asirifuɛ mun bɔ be fa waka bo amun, bɔ be fa ngble fin amun kɛ Eziptfuɛ'm be yoli i laa'n sa'n.

²⁵ Afin ɔ cɛ kan-an, min ya nga n fɛli i amun wun'n, ɔ ´wie. Ɔ ´kaci tɔ be su, ɔ ´nunnun be mlɔnmlɔn.»

²⁶ Anannganman b'ɔ sie mɛn wunmuan'n ɔ wa mɛn i ngble'n su ɔ ´fa bo be kɛ ɔ fa boli Madianfuɛ mun Orɛb yɛbuɛ'n su lɔ'n sa. Ɔ ´mɛn i waka'n su jenvie'n su kɛ ɔ yoli i Ezipt lɔ'n sa.

²⁷ I cɛn sɔ nun'n, be trɔ ng'ɔ o amun wati su'n, ɔ ´foli tɔ, yɛ sielɛ kekle nga be fa sie amun'n, ɔ ´wie. Lui kpanngban nga amun wa nyɛn i ti'n, be su sie-man amun kun.

Izraɛlfuɛ'm be kpɔfuɛ'm be su mantan Zerizalɛm

²⁸ Izraɛlfuɛ'm be kpɔfuɛ'm be juli Azat lɛ, be sinnin Migrɔn lɛ, be yacili be trɔ mun Mikmas lɛ.

²⁹ Be sinnin lika fii'n nun, be lali Gɛba lɛ. Srɛ kunnin Ramafuɛ mun, be usuli, Gibea b'ɔ ti Sail i klɔ'n, i sufuɛ'm b'a wie wanndi.

³⁰ Galimfuɛ mun, amun `kpan! Laisfuɛ mun, amun `nian amún wun. Anatɔtfuɛ mun, amun yako!

³¹ Madmenafuɛ'm be su bo sanndi. Gebimfuɛ'm be su kunndɛ fiawlɛ.

³² Ndɛkɛn kpɔfuɛ'm be ´ju Nɔb, be ´jran lɛ, be ´fa be sa be ´wlanwlan be bɔ be o Siɔn oka'n su'n, be ´wlanwlan Zerizalɛmfuɛ mun bɔ be o kpɔlɛ'n su'n.

³³ Amun nian, Anannganman Nyanmiɛn b'ɔ sie mɛn wunmuan'n, ɔ ´fɛ i wunmiɛn'n kwlaa kpɛkpɛ waka sama mun. Waka nga be ti fleiinfleiin'n, ɔ ´kpɛ bé bo, nga be ti ndɛnndɛn kpa'n, ɔ ´bu bé bo gua.

³⁴ Waka sɛsɛ nga be o bo nun'n, ɔ ´fa kpɛliɛ kpɛ bé bo gua. Anannganman b'ɔ yo sro'n ti Liban'n ɔ'a tɔ.