Ezai 1 - NYANMIƐN NDƐ'N 1998

EZAI FLUWA I AKPASUA KLIKLI'N

¹ Amɔz i wa Ezai i aolia nun like ng'ɔ wunnin i'n, ɔ nin ng'ɔ tili'n, b'ɔ ti Zida nin Zerizalɛm bé wun ndɛ'n. Ɔ wunnin i Ozias, nin Zɔtam, nin Akaz, ɔ nin Ezekias bɔ be ti famiɛn'n bɔ be fin Zida'n be blɛ su.

Izraɛl wun-man sa fi wlɛ

² Nyanmiɛn su lɔ lika'n, tie! Asiɛ, sie ɔ su kpa! Afin Anannganman su ijɔ. I waan: N tali ba wie mun, b'a nyin, sanngɛ b'a jaso min wun.

³ Nannin'n ɔ si sran ng'ɔ lɛ i'n, yɛ aflunmun'n kusu ɔ wun like nga i min'n ɔ fa sie i lɛ kɛ ɔ di nun'n i wlɛ, sanngɛ Izraɛl si-man sa, min nvle'n i nunfuɛ'm be wun-man sa fi wlɛ.

Like fi nun-man Zida mɛn'n nun kun b'ɔ ti kpa-a

⁴ Nvle b'ɔ ti sa tɛ yofuɛ, nvle bɔ sran kunlɛ'n ti i nzuɛn'n, nvle bɔ i nunfuɛ'm be ti kakajefuɛ ngunmin kokoko'n, amu'an wie wu mlɔnmlɔnmlɔnmlɔn, amun yako! Amu'an yi min Anannganman min ase, amu'an yo min bɔ n ti Izraɛl i Nyanmiɛn kunngba'n min finfin, amu'an kaci amun sin b'a si min.

⁵ ?Amun bɔ amun jin nyin kekle yolɛ'n su sa tititi'n, ninfan yɛ be fin amun like-ɔ ɔ yo ye ekun-ɔn? Amún ti'm be kwlaa be su ti kannin ngunmin kokoko. Yɛ amun keje amun wun-ɔn ɔ yo-man ye kun.

⁶ Kɛ ɔ fɛ i amún ja ngbabua'm be su lele b'ɔ fa ju amún ti'n su'n, amun wunnɛn'n i lika fi nun-man lɛ bɔ be kwla se kɛ ɔ ti kpa kan-an. Laa kannin mun nin amun wunnɛn bɔ b'a susu'n, ɔ nin kannin uflɛ-uflɛ mun, sran fi fua-man be, sran fi gua-man be nun ayre, yɛ sran fi cici-man be su.

⁷ Amun mɛn'n ɔ'a bo, sin'n ɔ'a di amun klɔ mun. Aofuɛ'm be fɛn amun bo ninnge mun amun bɔbɔ amun nyrun lɛ. Amun mɛn'n ɔ'a yo kɛ aawlɛ flɛnnɛn'n sa, ɔ ti kɛ sran wie mun b'a wlu mɛn kun nun b'a saci i sa.

⁸ Zerizalɛmfuɛ'm be ngunmin b'a ka lɛ kɛ kuku b'ɔ o vinyi fie kun nun'n sa, b'a ka lɛ kɛ kpata b'ɔ ɔ'a ka blo'n sa, b'a ka lɛ kɛ klɔ bɔ i sufuɛ'm be kpɔfuɛ'm b'a sin b'a yiɛ i'n sa.

⁹ Sɛ Anannganman b'ɔ sie mɛn wunmuan'n ɔ'a yaci-man e nun sran wie'm be lɛ'n, wuun e wieli nunnun kɛ Sodɔmfuɛ'm be sa, sɛ ɔ'a yaci-man be lɛ'n, wuun e wieli wu kɛ Gomɔrfuɛ'm be sa .

Nyanmiɛn i sɔlɛ wafa b'ɔ yo-mɛn i fɛ'n

¹⁰ ?Zerizalɛm kpɛnngbɛn mun, yoo amu'an kaci Sodɔm kpɛn siɛn'n? Amun `tie Anannganman i ndɛ b'ɔ kan'n! ?Zerizalɛmfuɛ mun, yoo kɛ ɔ o yɛ'n amu'an kaci Gomɔrfuɛ siɛn'n? Amun `sie amun su kpa be tie e Nyanmiɛn'n i mmla b'ɔ man'n!

¹¹ Anannganman wan yoo: «?Amun tɛ kpanngban bɔ amun yi'n, ɔ yo nzu ye yɛ ɔ man min-ɔn? Bua nene nga amun fa yi tɛ bɔ be yra be nnɛn'n kɔlikɔli'n, yɛ nannin nga b'a kpɛ cro bɔ amun fa yi bo kun yolɛ i su tɛ'n be lui'n, i kwlaa sɔ'n ɔ'a flan min. Nannin tola mun, nin bua nga b'a kpɛ cro'n mun, ɔ nin boli kpakpuɛ mun, bɔ amun fa yi afiɛn siesielɛ tɛ'n be mmoja'n, n kunndɛ-mɛn i kun.

¹² ?Kɛ amun ba tɛ'm be yilɛ'n, wan yɛ ɔ tu amun kɛ amun `nanti-nanti min awlo nun-ɔn?

¹³ Amun `yaci sraka ninnge ngbɛn'm be fa balɛ. Ansans bɔ amun yra be man min'n, ɔ yo min tɛ. Anglo le kun cɛn mun, nin wunmiɛn-delɛ-cɛn mun, ɔ nin cɛn dilɛ uflɛ nga sran'm be kwlaa be yia be di'n, n kwla suan-man bé bo kun sa tɛtɛ bɔ amun nyinfu amun yo be cɛn sɔ'm be nun'n ti.

¹⁴ Amun anglo le kun cɛn mun nin amun cɛn uflɛ nga amun di be'n, be yo min tɛ, be ti kɛ trɔ sa, be ti min, n kwla-man bé bo suan kun .

¹⁵ Kɛ amun man amún sa'm be su kɛ amun ´srɛ min'n, n kata min nyin kɛ ɔ ´yo nan m'an wun-man amun'n ti. Sɛ amun srɛ min bɔ lele'n, ɔ ti ngbɛn. N su sie-man min su. Afin sran'm be mmoja ase gualɛ'n yɛ ɔ ti amun junman-an.

¹⁶ Amun `wunnzin, amun `yo amún wun saun. Amun `yi amun sa tɛtɛ bɔ amun yo be'n min nyrun lɛ. Amun `yaci sa tɛ'n i yolɛ.

¹⁷ Amun `suan sa kpa'n i yolɛ, amun `yo sa'm be nuan su. Sran ng'ɔ kle sran'm be nyrɛnnɛn'n, amun `yo man ɔ kaci i sa. Amun `di aika mma'm be jɔlɛ'm be kpa, amun `jran angboti mmla'm bé sin.»

Sɛ amun ka nyin kekle yolɛ'n su'n, amun ´wu

¹⁸ Anannganman wan yoo: «Amun `bla man e ti é wun aniɛn. Sɛ amún sa tɛ bɔ amun yo'n be ti kɛ like ɔkwlɛ youun wie sa bɔbɔ'n, be ´fɛn fitafita kɛ jese fɔkɔ sa. Sɛ be ti kɛ like ble tikitiki wie sa bɔbɔ'n, be ´yo ufue fuai kɛ bua ndrɛ sa.

¹⁹ Sɛ amun sie amun su amun tie ndɛ nga n kan n kle amun'n, amun ´di mɛn nga nun ninnge kpakpa mun.

²⁰ Sanngɛ sɛ amun fa-man min nuan ndɛ'n, yɛ sɛ amun yo nyin kekle'n, alɛ'n yɛ ɔ ´di amun-ɔn. Min Anannganman min yɛ n kan sɔ-ɔ.»

Zerizalɛm i saun yolɛ

²¹ ?Nguɛ sa yɛlɛ nga? ?Ɔ yo sɛ yɛ man Zerizalɛm ɔ'a kaci kɛ tekle bla sa-a? Laa ɔ ti klɔ kpa, i nunfuɛ'm be fa mmla'n su yɛ be yo sa mun i nuan su, sanngɛ siɛn'n, ɔ'a kaci sran kunfuɛ'm be klɔ.

²² Ɔ'a yo sa-a ɔ waan jɛtɛ ufue wie yɛ ɔ'a kpa sa. Ɔ'a yo sa-a ɔ waan nzan yɛ nzue ɔ'a bu i ti sa.

²³ Ɔ famiɛn'n i awlo lɔ sran dandan mun be yo nyin kekle Nyanmiɛn su. Be nin awiefuɛ'm bé bo ti kun. Adi ninnge'n yɛ be kunndɛ-ɔ, siɛn'n be bɔbɔ yɛ be su sran'm be su kɛ be `wla bé sa bo-ɔ. Be di aika mma'm be ndɛ kwlɛ, angboti mmla'n be ndɛ'n nga be fa blɛ be kɛ be di'n, ɔ ti-man be ndɛ.

²⁴ I sɔ'n ti, Izraɛlfuɛ mun, amun nun-man min sin, amun ti min kpɔfuɛ, n wa kle amun nun, n ´tu n klunngbɔ amun su, amun yako! Min bɔbɔ min Anannganman bɔ n sie mɛn wunmuan'n, bɔ n ti Izraɛl Nyanmiɛn'n bɔ be su min-ɔn ɔ su-man'n, min yɛ n kan sɔ-ɔ.

²⁵ Zerizalɛmfuɛ mun, e nin amun y'a nyɛn. N ´tu amun nun fiɛn'n kɛ be fa kpetre sanmlan be fa tu like nun fiɛn'n sa.

²⁶ N ´yo man amun jɔlɛ difuɛ'm be ´yo kɛ laa liɛ'm be sa, yɛ n ´yo man famiɛn'n i afɔtuɛ manfuɛ'm be kusu be ´yo kɛ be nga be o lɛ laa'n be sa. Kpɛkuun be ´flɛ amun klɔ'n kɛ Klɔ bɔ be yo sa i nuan su nun'n, nin Nanwlɛ Klɔ.

²⁷ Zerizalɛm i sa b'ɔ yo i i nuan su'n ti, ɔ ´fite nun. Yɛ i nunfuɛ'm bɔ be kaci be nzuɛn'n, be ´nyan be ti mmla bɔ be fa su'n ti.

²⁸ I nyin keklefuɛ mun o, i sa tɛ yofuɛ mun o, nyrɛnnɛn'n ´tɔ be kwlaa be su. Be kwlaa nga be yi Anannganman i ase'n, be ´wie nunnun.

²⁹ Waka dandan bɔ amun klo be sɔlɛ'n, amún sa sin wa bubu amun be ti. Amuɛn bo bɔ amun kpɛ be'n, nyannzuɛn wa kun amun be dunman nun.

³⁰ Afin amun wa yo kɛ waka dandan bɔ be nnya'n ɔ glɔ'n sa. Amun wa yo kɛ asa b'ɔ nzue nun-man nun kun'n sa.

³¹ Sran b'ɔ lɛ wunmiɛn'n, ɔ ´yo kɛ nyan-man b'ɔ ti futrɛ-futrɛ'n sa. Yɛ i junman'n, ɔ ´kaci kɛ sin taaman sa. Ɔ nin i junman'n be nnyɔn be ´yra likawlɛ, sran fi su nuan-man be.