Ezipt Lɔ Tulɛ'n 9 - NYANMIƐN NDƐ'N 1998

Nnɛn'm be wulɛ

¹ Anannganman seli Moiz kɛ: «Kɔ ko to famiɛn'n lɔ nan se i kɛ: ‹Anannganman b'ɔ ti Ebre'm be Nyanmiɛn'n waan a yaci i sran'm be nun nan be wɔ be ko su i.

² Sɛ ɔ waan a yaci-man be nun be kɔ-man nan a tra be ase ekun'n,

³ Anannganman i sa wa kan ɔ nnɛn nga be didi blo lɔ'n mun. Tukpacɛ b'ɔ sa ndɛndɛ wie wa tɔ i nnɛn kpanngɔ o, i aflunmun o, i nyɔnngɔnmɛn o, i nannin o, i bua o, i boli o, be kwlakwla be su.

⁴ Sanngɛ ɔ wa sie nnɛn nga be ti Izraɛlfuɛ'm be liɛ'n ɔ nin nga be ti Eziptfuɛ'm be liɛ'n be afiɛn ngbaciɛ. Izraɛlfuɛ'm be nnɛn'm be nun kun sa su wu-man.

⁵ Ng'ɔ o su ekun'n yɛlɛ kɛ Anannganman kleli blɛ'n, i waan ainman yɛ ɔ ´yo i sɔ abonuan sa liɛ nin-ɔn.› »

⁶ Kɛ aliɛ cɛnnin cɛ'n, Nyanmiɛn yoli nga i waan ɔ ´yo'n. Eziptfuɛ'm be nnɛn'm be kwlaa be wieli wu, sanngɛ Izraɛlfuɛ'm be nnɛn'm be nun kun sa ɔ'a wu-man.

⁷ Famiɛn'n sunmannin sran ko niannin Izraɛlfuɛ'm be wun lɔ, be wunnin kɛ Izraɛlfuɛ'm be nnɛn ba kun sa ɔ'a wu-man. Sanngɛ famiɛn'n i anwlɛn'n keteli ekun, kpɛkuun i waan ɔ yaci-man be nun nan be kɔ-man.

Yra tru guali sran nin nnɛn'm bé wun

⁸ Anannganman seli Moiz nin Aarɔn be kɛ: «Amun `fa gbo nun nzuɛn, man amún sa buɛ'm be yi piɛ, kpɛkuun man Moiz sanndi nun nglo famiɛn'n nyrun lɛ.

⁹ Nzuɛn sɔ'n ´kaci ndutre, ɔ ´tru Ezipt mɛn wunmuan'n nun. Mɛn'n i lika kwlaa nun'n, ndutre sɔ'n ´man sran nin nnɛn'm be tukpacɛ wie b'ɔ ti kɛ yra sa, kɛ ɔ ´kɔ i nyrun'n, yra sɔ'n ´kaci kannin.»

¹⁰ Moiz nin Aarɔn be fali nzuɛn'n nan b'a ko to famiɛn'n. Moiz sanndili nzuɛn'n nun nglo. Yɛ ɔ yoli sran nin nnɛn'm bé wun tukpacɛ wie kɛ yra sa, kpɛkuun kɛ ɔ kɔ i nyrun'n ɔ kacili kannin .

¹¹ Ezipt lɔ atrɛ yifuɛ'm b'a kwla fite-man Moiz nyrun yra sɔ'n dunman nun ti. Afin yra'n yoli be wie.

¹² Anannganman yoli man Ezipt famiɛn'n i anwlɛn'n keteli kɛ Anannganman bɔbɔ dun mmua kan kleli Moiz'n sa. Ɔ'a fɛ-mɛn i su ɔ'a sie-mɛn i Moiz nin Aarɔn be ndɛ'n bo.

Nzraama bɔ kɛ nzue tɔ-ɔ, ɔ gua'n

¹³ Anannganman seli Moiz kɛ: «Ainman nglɛmun ndɛ kpa'n, jaso ko to famiɛn'n lɔ nan se i kɛ: ‹Anannganman b'ɔ ti Ebre'm be Nyanmiɛn'n, i waan a yaci i sran'm be nun nan be ko su i.

¹⁴ Afin siɛn liɛ'n, ɔ wa fa nyrɛnnɛn wafa'n kwlaa ɔ ´fa yi wɔ nin ɔ mantanfuɛ mun, ɔ nin ɔ nvle'n nunfuɛ mun amun kwlaa amún su, kɛ ɔ ´yo nan w'a wun kɛ be kwla fa-man sran fi sunnzun-mɛn i asiɛ wunmuan'n su'n ti.

¹⁵ Sɛ ɔ ti kɛ ɔ mɛnnin i sa'n su yɛ ɔ fali tukpacɛ b'ɔ sa ndɛndɛ wie yoli wɔ nin ɔ sran mun'n, wuun amun nunnunnin asiɛ'n su wa mlɔnmlɔn.

¹⁶ Sanngɛ ɔ yacili wɔ lɛ kɛ ɔ ´yo nan w'a wun i tinmin'n, nan kusu i dunman'n ɔ'a fu asiɛ'n su'n ti .

¹⁷ Sanngɛ, ɔ nin i sɔ'n ngba'n, a tɛ si i nvle'n i nyrun ce, ɔ waan a yaci-mɛn i sran'm be nun man be kɔ-man.

¹⁸ I sɔ'n ti'n, ainman dɔ kɛ nga sa su'n, ɔ wa gua nzraama bɔ kɛ nzue tɔ-ɔ ɔ gua'n i ase. Ɔ wa yo dan kpa. Kɛ be yili Ezipt mɛn'n lele b'ɔ ´fa ju ndɛ yɛ'n, i sɔ nzraama nian gua-man wa le.› »

¹⁹ Moiz seli Ezipt famiɛn'n ekun kɛ: «Siɛn liɛ'n, sunman sran mun nan be ko sie ɔ nnɛn'm be kpa, nan be yiayia ɔ ninnge nga be o fie'm be su lɔ'n be su: i sran mun o, i nnɛn mun o, sɛ b'a fia-man sua'm be nun'n, nan be ka fie'm be su lɔ'n, kɛ nzraama'n ´gua'n, ɔ ´kun be.»

²⁰ Famiɛn'n i mantanfuɛ'm be nun wie'm be buli be jɔ bɔ Nyanmiɛn boli be'n i nanwlɛ, nan b'a se be sufuɛ'm be kɛ be nin nnɛn mun be fia sua'm be nun.

²¹ Be nga b'a bu-man Anannganman i ndɛ'n kɛ ɔ ti ndɛ'n, be yacili be sufuɛ'm be nin nnɛn mun fie'm bé su lɔ.

²² Anannganman seli Moiz kɛ: «Man ɔ́ sa'n su nglo man nzraama gua Ezipt mɛn wunmuan'n su. Man ɔ tɔ, i sran o, i nnɛn o, i ninnge nga be luali mun o, annzɛ nga be tali mun o, be kwlaa bé su.»

²³ Moiz mɛnnin i kpɔnman'n su nglo. Anannganman yacili ngblannan'n nin nzraama'n nun, ngblannan'n dun mmua kpɛnnin asiɛ'n su, i sin, Nyanmiɛn yoli man nzraama guali.

²⁴ Kɛ Ezipt mɛn'n takali lele b'ɔ ´fa ju cɛn sɔ nun'n, b'a wun-man nzraama b'ɔ gua dan kɛ nga sa bɔ ngblannan ´kpɛn tɛtɛ kɛ nga sa le .

²⁵ Ezipt mɛn wunmuan'n nun'n, nzraama guali sran'm be kwlaa nga be o fie'm bé su lɔ'n, ɔ nin nnɛn'm bé su. Ɔ sacili ninnge nga sran'm be luali annzɛ be tali'n. Ɔ bubuli waka mun.

²⁶ San Gozɛn lika liɛ'n, kan Izraɛlfuɛ'm be tran lɔ'n cɛ yɛ ɔ kali lɛ-ɔ.

²⁷ Ezipt famiɛn yiali Moiz nin Aarɔn nan ɔ'a se be kɛ: «Nga liɛ'n, m'an fɔn, e nin min nvle'n yɛ y'a fɔn-ɔn. Anannganman liɛ'n, sa ng'ɔ yo'n ɔ ti i su.

²⁸ Amun `kpata Nyanmiɛn be man min nan ngblannan nin nzraama'n be jran. N su tra-man amun ase kun. M ´man amun atin amun ´kɔ.»

²⁹ Moiz tɛli i su kɛ: «Kɛ n fin klɔ'n nun n ´fite cɛ'n, m ´manman mín sa'm bé su n ´srɛ Anannganman. Ngblannan'n nin nzraama'n be ´jran, kɛ ɔ ´yo nan w'a si kɛ asiɛ'n ti Anannganman liɛ'n ti.

³⁰ Sanngɛ n si kɛ a nin ɔ mantanfuɛ mun amun nyin su yi-man Anannganman Nyanmiɛn'n ka.»

³¹ Ɔrz nin lɛn'n be sacili, afin i blɛ sɔ nun'n, wuun ɔrz'n ɔ'a su mma yɛ lɛn'n ɔ'a bo nyrɛ.

³² Ble i mma mun, yɛ alowa'n, be liɛ bɔ be kali siɛn, b'a saci-man wie.

³³ Moiz tuli i bo famiɛn'n i wun lɔ, ɔ fin klɔ'n nun fiteli. Ɔ ko mannin i sa'm bé su, ɔ srɛli Nyanmiɛn. Kpɛkuun fɔuun ngblannan'n ɔ'a tɛ-man kun, yɛ nzraama'n yacili gualɛ-ɔ. Nzue'n kusu kpɛli kpe.

³⁴ Kɛ famiɛn'n wunnin kɛ nzue'n ɔ'a kpɛ nan nzraama ɔ'a yaci gualɛ'n, ɔ yoli sa tɛ kunngba ng'ɔ yoli i laa'n. Ɔ nin i mantanfuɛ'm be keteli be anwlɛn'n.

³⁵ Kɛ Anannganman man Moiz fa dun mmua kannin'n sa, famiɛn'n keteli i anwlɛn. I waan ɔ man-man Izraɛlfuɛ'm be atin kɛ be wɔ.