Ezipt Lɔ Tulɛ'n 8 - NYANMIƐN NDƐ'N 1998

¹ Anannganman seli Moiz kɛ: «Kan kle Aarɔn kɛ ɔ fa kpɔnman'n nan ɔ man i sa'n su nzue ba mun nin nzue sama mun, ɔ nin fɛtɛ'm be su kɛ ɔ ´yo nan klɛ'm b'a fa Ezipt mɛn wunmuan'n ti.»

² Aarɔn tinngɛli i sa Ezipt lɔ nzue nga be sonji'n be su, kpɛkuun klɛ'm be fiteli, be truli mɛn wunmuan'n nun gbee.

³ Ezipt lɔ atrɛ yifuɛ'm be fali be tinmin'n be yili atrɛ kunngba sɔ'n wie. Be yoli man klɛ'm be fiteli Ezipt mɛn'n i lika'n kwlaa.

⁴ Famiɛn'n yiali Moiz nin Aarɔn nan ɔ'a se be kɛ: «Amun `kpata Nyanmiɛn nan ɔ yo man klɛ'm be jaso e nin min nvlefuɛ mun é wun lɛ be wɔ mmua, kpɛkuun n wa man amun sran'm be atin nan be ko yi tɛ be man Anannganman.»

⁵ Moiz seli famiɛn'n kɛ: «Nannan, kle min blɛ nga i nun yɛ n `srɛ Nyanmiɛn m `man wɔ nin ɔ mantanfuɛ mun ɔ nin ɔ nvle'n. N ´srɛ Nyanmiɛn kɛ ɔ nunnun klɛ nga be o wɔ awlo'n nin ɔ́ sua'm be nun'n. San klɛ nga be o Nil nzue'n nun'n yɛ be ´ka lɛ-ɔ.»

⁶ Ezipt famiɛn'n tɛli i su kɛ: «Yo i ainman.» Yɛ Moiz waan: «M'an ti, n wa yo kɛ a fa usali'n sa nan a wun kɛ be kwla fa-man sran fi sunnzun-man Anannganman e Nyanmiɛn'n.

⁷ Klɛ'm be wa jaso ɔ́ wun lɛ, be ´jaso ɔ́ sua'm be nun, be ´jaso ɔ mantanfuɛ mun nin ɔ nvlefuɛ'm be wun lɛ be kɔ. San Nil nzue'n nun lɔ liɛ'm be yɛ be ´ka lɛ-ɔ.»

⁸ Moiz nin Aarɔn be fin Ezipt famiɛn'n i awlo'n nun lɔ fiteli. Moiz ko srɛli Anannganman kɛ ɔ de famiɛn'n klɛ'm be yalɛ bɔ be kle i'n nun.

⁹ Anannganman yoli nga Moiz usɛli i'n. Klɛ'm be wuli awlo'm be nun, be wuli sua'm be nun nin fie'm be su.

¹⁰ Sran'm be tiantiannin klɛ'm be nuan kwlekwle dandan kpa, yɛ be nvan'n fali mɛn wunmuan'n.

¹¹ Kɛ famiɛn'n ´nian bɔ lika'n ɔ'a tɔ fɔun kan'n, kpɛkuun ɔ yoli nyin kekle ekun kɛ Nyanmiɛn dun mmua kannin'n sa. Ɔ'a sie-mɛn i su Moiz nin Aarɔn be ndɛ'n bo.

Kplekple mun

¹² Anannganman seli Moiz kɛ: «Se Aarɔn kɛ ɔ man i kpɔnman'n su nan ɔ fa fin asiɛ wun ndutre'n nun. Asiɛ'n su ndutre'n wa kaci kplekple Ezipt mɛn wunmuan'n nun.»

¹³ Be yoli i sɔ. Aarɔn mannin i kpɔnman'n su, ɔ fa finnin asiɛ wun ndutre'n nun. Kpɛkuun ndutre'n kacili kplekple, be truli sran nin nnɛn'm be su sa woo. Ezipt mɛn wunmuan'n nun'n, asiɛ wun ndutre'n kwlakwla kacili kplekple.

¹⁴ Ezipt lɔ atrɛ yifuɛ'm be nin be tinwa bɔ be waan b'a tin'n i ngba'n, b'a kwla yi-man kplekple'n wie. Kplekple'm be trannin sran nin nnɛn'm be su.

¹⁵ Blɛ sɔ'n nun yɛ atrɛ yifuɛ'm be seli Ezipt famiɛn'n kɛ: «Nyanmiɛn i tinmin'n yɛ ɔ su di junman ng'ɔ o lɛ nin-ɔn.» Sanngɛ kɛ Nyanmiɛn fa dun mmua kannin'n i su yɛ ɔ yoli-ɔ. Famiɛn'n i anwlɛn'n keteli, ɔ'a sie-mɛn i su Moiz nin Aarɔn be ndɛ'n bo.

Ngɔnsiɛn bɔ be nuan yo ya'n

¹⁶ Anannganman seli Moiz kɛ: «Jaso ainman nglɛmun ndɛ kpa'n nan ko to famiɛn'n kɛ ɔ ´fite kɔ nzue nuan lɔ'n. Se i kɛ Anannganman wan yoo: ‹Man min sran'm be atin nan be ko su min.

¹⁷ Sɛ w'a yaci-man min sran'm be nun'n, n wa yaci ngɔnsiɛn wie bɔ be nuan yo ya'n be nun, be ´kle wɔ nin ɔ mantanfuɛ mun nin ɔ nvle nunfuɛ mun, ɔ nin wɔ awlo'n nunfuɛ'm be nyrɛnnɛn. Eziptfuɛ'm be sua'm be nun wa yo ngɔnsiɛn sɔ'm be ngunmin kokoko. Be su di-man be yalɛ asiɛ nga amun nanti su'n i su.

¹⁸ Sanngɛ cɛn sɔ'n nun'n, n ´yi Gozɛn i lika'n nun, afin lɔ yɛ min nvle nunfuɛ'm be tran-an. Ngɔnsiɛn'm be su tran-man lɔ wie. N ´yo i sɔ nan a si kɛ min Anannganman n wo mɛn nga nun.

¹⁹ N wa yo man nyrɛnnɛn ng'ɔ ´ju amún su'n, ɔ su ju-man min sran liɛ'm be su wie. Abonuan sa sɔ'n wa ju ainman.› »

²⁰ Anannganman yoli i kɛ ɔ fa kannin'n sa. Ngɔnsiɛn bɔ be nuan yo ya'n be bali kaka kpa, be fali Ezipt mɛn wunmuan'n, be wluli famiɛn'n i sua'n nun lɔ, ɔ nin i mantanfuɛ'm be liɛ'm be nun. Ngɔnsiɛn sɔ'm be sacili Ezipt mɛn'n.

²¹ Famiɛn'n flɛli Moiz nin Aarɔn nan ɔ'a se be kɛ: «Amun `kɔ yi tɛ'n be man amun Nyanmiɛn'n, sanngɛ amun `yi i Ezipt mɛn'n nun wa.»

²² Moiz tɛli i su kɛ: «Cɛcɛ, e kwla yo-mɛn i sɔ, afin nnɛn nga bɔ e fa yi tɛ man e Nyanmiɛn'n ti tete like Eziptfuɛ'm be nyrun. ?Yɛ sɛ e yi i sɔ tɛ ng'ɔ ti be nyrun tete like'n be nyrun wa'n, be su to-man e yɛbuɛ?

²³ Ɔ fata kɛ e fa cɛn nsan e nanti aawlɛ flɛnnɛn'n nun nan y'a ko yi tɛ nga e Nyanmiɛn'n ´kle ye'n y'a mɛn i.»

²⁴ Ezipt famiɛn'n waan: «M'an ti, n wa yaci amun nun amun ko yi tɛ'n be man amun Nyanmiɛn'n aawlɛ flɛnnɛn'n nun lɔ, sanngɛ nán amun wɔ mmua ngboko. Amun `srɛ Nyanmiɛn kusu be man min.»

²⁵ Moiz seli i kɛ: «Kɛ n ´jaso ɔ́ wun wa n ´kɔ yɛ'n, n ko srɛ Anannganman. Ainman, wɔ o, ɔ mantanfuɛ mun o, ɔ nvlefuɛ mun o, amun su wun-man ngɔnsiɛn'm be kun, be ´kɔ. Sanngɛ nán laka e kun. Nán tannin Izraɛlfuɛ'm be atin kɛ nán be wɔ be ko yi tɛ'n be man be Nyanmiɛn'n.»

²⁶ Moiz tuli i bo famiɛn'n i wun lɛ, ɔ ko kpatali Nyanmiɛn.

²⁷ Anannganman yoli nga Moiz srɛli i kɛ ɔ yo'n. Ɔ fuannin ngɔnsiɛn sɔ mun be jasoli famiɛn'n nin i mantanfuɛ mun, ɔ nin be nvle'n nunfuɛ'm bé wun lɛ be ɔli mmua. Ngɔnsiɛn tɛtɛ sɔ'n, ba kun sa ɔ'a ka-man lɛ.

²⁸ Kɛ ɔ yoli sɔ'n, famiɛn'n wa keteli i anwlɛn'n ekun. I waan ɔ yaci-man Izraɛlfuɛ'm be nun nan be kɔ-man.