Ezipt Lɔ Tulɛ'n 7 - NYANMIƐN NDƐ'N 1998

¹ Anannganman seli Moiz kɛ: «N wa yo man a ´yo kɛ Nyanmiɛn sa Ezipt famiɛn'n nyrun. Ɔ niaan bian Aarɔn yɛ ɔ ´ijɔ ɔ́ nuan-an.

² Ndɛ kwlaa nga n se wɔ kɛ a kan'n, kan kle Aarɔn nan i kusu ɔ kan kle Ezipt famiɛn'n kɛ ɔ ´yo nan ɔ'a yaci Izraɛlfuɛ'm be nun nan b'a wɔ'n ti.

³ Yɛ n kusu n wa kete Ezipt famiɛn i anwlɛn'n. N wa yo atrɛ ninnge nin abonuan sa mun kaka kpa i mɛn'n nun.

⁴ Famiɛn'n su sie-mɛn i su amún nuan bo. N wa yi min tinmin'n i nglo n ´fa kle Ezipt mɛn'n, n ´tu i nunfuɛ'm be fɔ. Kpɛkuun n ´fa Izraɛl b'ɔ ti min nvle'n n ´fa jaso Ezipt mɛn'n nun. Izraɛlfuɛ'm be ´kɔ nyanman su sɛsɛsɛ kɛ sonja mun sa.

⁵ N ´yi n tinmin'n i nglo n kle Eziptfuɛ mun. N ´fa Izraɛlfuɛ mun Eziptfuɛ'm be afiɛn n ´fite. Yɛ Eziptfuɛ'm be wa wun i wlɛ weiin kɛ min yɛ n ti Anannganman nin-ɔn.»

⁶ Ndɛ nga Anannganman kannin'n i su sa yɛ Moiz nin Aarɔn be yoli-ɔ.

⁷ Kɛ be ´ko kan ndɛ'n kle Ezipt famiɛn'n, wuun Moiz lɛ afuɛ ablaɔcuɛ yɛ Aarɔn lɛ afuɛ ablaɔcuɛ-nin-nsan.

Famiɛn'n waan ɔ tie-man Moiz nin Aarɔn be ndɛ'n

⁸ Anannganman seli Moiz nin Aarɔn be kɛ:

⁹ «Sɛ famiɛn'n se amun kɛ amun yi atrɛ'n, Moiz, kan kle Aarɔn man ɔ fɛ i kpɔnman'n nan ɔ `to yi i asiɛ wun famiɛn'n i nyrun lɛ, kpɛkuun kpɔnman'n wa kaci wuo.»

¹⁰ Moiz nin Aarɔn be ko toli famiɛn'n nan b'a yo like nga Anannganman seli be kɛ be yo'n. Aarɔn toli kpɔnman'n yili i ase famiɛn'n nin i mantanfuɛ'm be nyrun lɛ, kpɛkuun kpɔnman'n kacili wuo.

¹¹ Famiɛn'n flɛli Ezipt mɛn'n nun akunndanfuɛ mun nin tinwafuɛ mun. Yɛ be kusu, be fali be tinmin'n be yili atrɛ kunngba sɔ'n wie-ɔ.

¹² Be kwlaa be yili be kpɔnman'm be ase, kpɛkuun kpɔnman'm be kacili wuo, sanngɛ Aarɔn i kpɔnman liɛ'n mɛnmɛnnin be wuo liɛ mun.

¹³ Famiɛn'n i anwlɛn'n keteli ti ɔ'a sie-mɛn i su ndɛ nga Moiz nin Aarɔn be kannin'n i bo. Kɛ Nyanmiɛn dun mmua kɛnnin i sɔ-ɔ.

Nzue'n kacili mmoja

¹⁴ Anannganman seli Moiz kɛ: «Famiɛn'n su yo nyin kekle mín su, yɛ i waan ɔ man-man Izraɛlfuɛ'm be atin kɛ be wɔ.

¹⁵ Kɔ nan to i lɔ nglɛmun kɛ ɔ kɔ nzue'n i nuan lɔ'n. Ko jrɛn i nyrun Nil'n i nuan lɔ. Fa kpɔnman ng'ɔ kacili wuo'n tra nun.

¹⁶ Kan kle famiɛn'n kɛ: ‹Anannganman b'ɔ ti Ebre'm be Nyanmiɛn'n sunmannin min kɛ n se wɔ kɛ: Yaci min sran'm be nun man be ko su min aawlɛ flɛnnɛn'n nun lɔ. Lele b'ɔ ´fa ju ndɛ'n, a klo-man kɛ ɔ́ su ti i sɔ ndɛ'n mlɔnmlɔn.

¹⁷ I sɔ'n ti Anannganman waan ɔ wa kle wɔ siɛn'n kɛ ɔ fa ti'n. Nian, n wa fa waka nga n fin Nil nzue'n i nyin su yɛ nzue'n wa kaci mmoja.

¹⁸ Kpatra nga be o nzue'n nun'n be ´wu, yɛ nzue'n i sacilɛ b'ɔ wa saci'n ti Eziptfuɛ'm be su kwlɛ-mɛn i nɔn kun.› »

¹⁹ Anannganman seli Moiz kɛ: «Se Aarɔn kɛ ɔ fɛ i kpɔnman'n nan ɔ tinngɛ i sa nzue nga be sonji Ezipt mɛn'n nun'n be kwlaa be su: i nzue ba dandan mun o, i kanngan mun o, i fɛtɛ mun o, be kwlaa be wa kaci mmoja. Mmoja wa tran mɛn wunmuan'n nun, waka sɛ nin yɛbuɛ sɛ'm be nun ´yo mmoja.»

²⁰ Moiz nin Aarɔn be yoli nga Anannganman seli be kɛ be yo'n. Aarɔn mannin i kpɔnman'n su, kpɛkuun ɔ fa finnin Nil nzue'n i nyin su, famiɛn'n nin i mantanfuɛ'm be nyrun lɛ, yɛ nzue'n kwlaa kacili mmoja-a.

²¹ Kpatra'm be wuli. Nzue'n sacili, Eziptfuɛ'm b'a kwla nɔn-mɛn i kun. Mɛn wunmuan'n i nun ti mmoja'n ngunmin.

²² Ezipt lɔ atrɛ yifuɛ'm be fali be tinmin liɛ'n be yili atrɛ kunngba sɔ'n wie. Famiɛn'n i anwlɛn'n keteli, i sɔ'n ti, atin nga Moiz nin Aarɔn be srɛli'n, i waan ɔ man-man be. Kɛ Nyanmiɛn dun mmua kɛnnin i sɔ-ɔ.

²³ Famiɛn kacili i sin sili be, ɔ ɔli i awlo, ɔ'a bu-man ndɛ sɔ'n i ndɛ.

²⁴ Yɛ kɛ ɔ ´yo nan Eziptfuɛ'm b'a nyan nzue kpa b'a nɔn'n ti be kwlaa be tɔli gbo'm be kpɛlɛ su Nil'n wun koko lɛ, afin be kwla nɔn-man Nil nzue'n mlɔnmlɔn.

²⁵ Kɛ Nyanmiɛn i sa kannin Nil nzue'n, nzue'n kali sɔ lele cɛn ba nso.

Klɛ mun

²⁶ I sin'n, Anannganman seli Moiz kɛ: «Kɔ ko to Ezipt famiɛn'n nan se i kɛ: ‹Anannganman waan a yaci i sran'm be nun nan be ko su i.

²⁷ Sɛ ɔ waan a kplin-man su'n, ɔ wa yo man klɛ'm be tru ɔ mɛn'n nun.

²⁸ Be wa sɔn Nil nzue'n nun, yɛ be ´jaso Nil'n nun lɔ be ´wlu wɔ awlo'n nun lɔ. Ɔ sua ba nga a la nun'n, nin ɔ bɛ nga a la su'n, be ´yo klɛ ngunmin. Be wie'm be ´ko wlu ɔ mantanfuɛ mun nin ɔ nvle'n nunfuɛ'm be awlo'm be nun. Be ´wlu kpaun tɔnwlɛ mun nin ble sanmlɛn yiwlɛ'm be nun.

²⁹ Be ´kɔ lele be ´ko fu wɔ su, be ´fu wɔ mantanfuɛ'm be nin ɔ nvle'n nunfuɛ'm be su.› »