Ezipt Lɔ Tulɛ'n 6 - NYANMIƐN NDƐ'N 1998

¹ Anannganman seli Moiz kɛ: «Blɛ li yɛ a wa wun like nga n wa fa yo Ezipt famiɛn nin-ɔn. N wa miɛn i kɛ ɔ `yaci Izraɛlfuɛ'm be nun man be wɔ. Kɛ n wa miɛn i'n, ɔ wa kan bé bo kɛ be jaso i mɛn'n nun bɔbɔ.»

Nyanmiɛn seli Moiz kɛ ɔ ´de Izraɛl nvle'n

² Nyanmiɛn seli Moiz ekun kɛ: «N ti ‹Anannganman›.

³ Laa, n yili min wun nglo n kleli Abraam, nin Izaak, nin Zakɔb. Min dunman nga n fa kleli be'n yɛlɛ ‹Nyanmiɛn b'ɔ kwla like kwlaa yo'n,› sanngɛ b'a si-man kɛ be flɛ min ekun kɛ: ‹Anannganman›.

⁴ E nin be e trali aenguɛ. N tali be nda kɛ Kanaan mɛn nga be trannin nun laa kɛ aofuɛ mun sa'n, n ´fa man be.

⁵ M bɔbɔ n tili Izraɛlfuɛ'm be kplinlɛ nga be kplin Eziptfuɛ'm be yalɛ bɔ be kle be'n ti'n. Mín wla ɔ'a kpɛn aenguɛ nga e nin be e trali'n su.

⁶ I sɔ'n ti, n ´kan kle wɔ kɛ a `se be kɛ: ‹N ti Anannganman, n wa yo man amun ´nyan amún ti junman kekleekle nga Eziptfuɛ'm be mian amun kɛ amun di'n be nun. Min tinmin dan bɔ sran kwla jrɛn-mɛn i nyrun'n ti'n, m ´bu be fɔ, kpɛkuun n ´de amun.

⁷ N ´fa amun nvle'n n ´yo min nvle, n ´yo amun Nyanmiɛn, yɛ amun wa wun i wlɛ jrɛin kɛ n ti Anannganman amun Nyanmiɛn ng'ɔ ´de amun Eziptfuɛ'm be junman kekleekle nga be mian amun kɛ amun di be'n be nun.

⁸ N ´fa amun n ´kɔ mɛn nga n tali Abraam, nin Izaak, nin Zakɔb be nda kɛ n ´fa man be'n i nun lɔ. M bɔbɔ min Anannganman, n ´fa mɛn sɔ'n ´man amun.› »

⁹ Moiz ko kannin ndɛ sɔ mun kleli Izraɛlfuɛ mun, sanngɛ afɛ b'ɔ o bé su'n ti'n, kanga junman dilɛ'n ti'n, b'a sie-man bé su i bo.

¹⁰ Anannganman seli Moiz ekun kɛ:

¹¹ «Kɔ nan ko se Ezipt famiɛn'n kɛ ɔ yaci Izraɛlfuɛ'm be nun man be jaso i mɛn'n nun.»

¹² Moiz tɛli i su kɛ: «?Izraɛlfuɛ'm bɔbɔ b'a tie-man mín nuan ndɛ'n, yɛ famiɛn'n i li yɛ ɔ wa tie min bɔ n si-man ijɔ'n min ndɛ nin-ɔn?»

¹³ Anannganman seli Moiz nin Aarɔn be kɛ be `san nun nan be wɔ be ko wun Izraɛlfuɛ mun nin Ezipt famiɛn'n be wun, kɛ ɔ ´yo nan Izraɛlfuɛ'm b'a jaso Ezipt lɔ'n ti.

Moiz nin Aarɔn be nannan mun

¹⁴ Izraɛlfuɛ'm be awlobo kpɛnngbɛn'm be yɛ. Ribɛn b'ɔ ti Zakɔb i mma'm be kpɛnngbɛn'n, i mma mun yɛ: Enɔk, Pali, Ɛzrɔn, ɔ nin Karmi. Be yɛ be ti Ribɛn akpasua sufuɛ mun-ɔn.

¹⁵ Simeɔn i mma mun yɛ: Zɛmiɛl, Zamɛn, Zakɛn, Ɔad, Zosar, yɛ Sail b'ɔ ti Kanaan bla'n i wa'n. Be yɛ be ti Simeɔn akpasua sufuɛ mun-ɔn.

¹⁶ Levi i mma'm be nin be mma mun yɛ: Levi wuli ba nsan. Be yɛ: Gɛrsɔn, Keat, Mɛrari. Levi dili afuɛ ya afuɛ ablasan-nin-nso.

¹⁷ Gɛrsɔn i mma mun yɛ: Libni, yɛ Simɛi. Be yɛ be ti be akpasua su sran liɛ'm be kpɛnngbɛn mun-ɔn.

¹⁸ Keat i mma mun yɛ: Amram, Zizear, Ebrɔn, yɛ Iziɛl. Keat dili afuɛ ya afuɛ ablasan-nin-nsan.

¹⁹ Mɛrari i mma mun yɛ: Makli, ɔ nin Misi. Levifuɛ'm be akpasua su kpɛnngbɛn mun nin be mma mun nin be anunman'm be yɛ be o lɛ-ɔ.

²⁰ Amram jali i si i niaan bla Zokebɛd, ɔ nin i be wuli ba nnyɔn. Be yɛlɛ Aarɔn nin Moiz. Ɔ dili afuɛ ya afuɛ ablasan-nin-nso.

²¹ Zizear i mma mun yɛ: Kɔre, Nefɛg yɛ Zikri.

²² Iziɛl i mma mun yɛ: Mikaɛl, Ɛlzafan, yɛ Sitri.

²³ Aarɔn jali Eliseba b'ɔ ti Aminadab i wa bla'n, b'ɔ i kunngba'n ɔ ti Naksɔn i niaan bla'n. Ɔ nin i be wuli ba nnan, be dunman mun yɛ: Nadab, Abii, Eleazar, Itamar.

²⁴ Kɔre i mma mun yɛ: Asir, Ɛlkana, ɔ nin Abiazaf. Be yɛ be ti Kɔre akpasua'n su kpɛnngbɛn mun-ɔn.

²⁵ Aarɔn i wa Eleazar jali Pitiɛl i wa bla'n kun. Ɔ nin i be wuli ba kun, be flɛ i Fine. Be nga e boboli be dunman lɛ mun be yɛ be yoli Levi akpasua'n su awlobo kpɛn mun-ɔn.

²⁶ Aarɔn nin Moiz yɛ Nyanmiɛn seli be kɛ: «Amun `fa Izraɛlfuɛ mun Ezipt lɔ fite awlobo-awlobo sɛsɛsɛ» nin-ɔn.

²⁷ Moiz nin Aarɔn yɛ be ko seli Ezipt famiɛn'n kɛ ɔ yaci Izraɛlfuɛ'm be nun nan be `jaso i mɛn'n nun nin-ɔn.

Nyanmiɛn waan ɔ ´de Izraɛlfuɛ mun

²⁸ Kɛ Anannganman ´kan ndɛ'n kle Moiz Ezipt lɔ'n,

²⁹ ɔ seli i kɛ: «N ti Anannganman. Ko kan ndɛ nga n ´kan kle wɔ yɛ'n kwlaa kle Ezipt famiɛn'n.»

³⁰ Yɛ Moiz tɛli Anannganman su kɛ: «Min yɛ n wo yɛ, n si-man ijɔ. ?N ´yo sɛ nan famiɛn'n ɔ'a ti min ndɛ nga n ´kan'n?»