Ezipt Lɔ Tulɛ'n 5 - NYANMIƐN NDƐ'N 1998

Moiz nin Aarɔn be famiɛn'n wun lɔ kɔlɛ

¹ Kɛ ɔ yoli sɔ'n, Moiz nin Aarɔn be ko toli Ezipt famiɛn'n yɛ be seli i kɛ: «Ndɛ nga Anannganman b'ɔ ti Izraɛl Nyanmiɛn'n kan'n yɛ. I waan a yaci i sran'm be nun man be wɔ aawlɛ flɛnnɛn'n nun lɔ be ko di cɛn be mɛnmɛn i.»

² Ezipt famiɛn'n tɛli bé su kɛ: «?Wan yɛlɛ Anannganman bɔ mín nyin ko yi i bɔ i ti yɛ m man Izraɛlfuɛ'm be atin kɛ be wɔ-ɔ? N si-man Anannganman, yɛ n su man-man amun atin kɛ amun wɔ.»

³ Moiz nin Aarɔn be seli i kɛ: «Ebre'm be Nyanmiɛn'n, Anannganman e Nyanmiɛn'n fɛli i wun kleli ye. Man e cɛn nsan man e fa nanti e wɔ aawlɛ flɛnnɛn'n nun lɔ nan e ko yi tɛ e mɛn i. Sɛ ɔ'a yo-man sɔ'n, ɔ ´fa alɛ nin tukpacɛ bɔ sa ndɛndɛ wie nunnun ye.»

⁴ Famiɛn'n seli be kɛ: «?Moiz nin Aarɔn, nzu ti yɛ amun saci sran'm bé ti nun kɛ nán be di junman'n kun-ɔn? Amun `sa amún sin amun `ko di junman'n.

⁵ Siɛn liɛ'n, bɔ nvle sɔ nunfuɛ'm b'a sɔn'n, kpɛkuun amun waan amun ´yo nan nán man be di junman'n kun.»

Famiɛn'n wa ukali Izraɛlfuɛ'm be junman'n su

⁶ Cɛn kunngba sɔ nun'n, Ezipt famiɛn'n wlali Eziptfuɛ nga be ti plɔtrɔ junman difuɛ'm bé su nianfuɛ mun, ɔ nin Izraɛlfuɛ nga be ti junman difuɛ sɔ'm bé su kpɛnngbɛn kanngan'm be su nun kpa, ɔ seli be kɛ:

⁷ «Nán amun man Izraɛlfuɛ'm be ijre nga be fa kpɛ bliki'n kun kɛ laa'n sa, man be bɔbɔ be ko kunndɛ ijre'n.

⁸ Sanngɛ amun `mian be man be kpɛ bliki nga be kpɛ titi'n i nuan su. Nán amun ti su. Be ti fuɛnfuɛ, i sɔ'n ti yɛ be waan be man be atin nan be ´ko yi tɛ man be Nyanmiɛn nin-ɔn.

⁹ Amun `man be junman kekleekle mun. Kɛ junman'n ti be'n, be su nyan-man blɛ bu-man ato ndɛ nga'm be akunndan kun.»

¹⁰ Eziptfuɛ nga be ti plɔtrɔ junman difuɛ'm be su nianfuɛ mun, be nin Izraɛlfuɛ nga be ti junman'n su kpɛnngbɛn kanngan'm be fin Ezipt famiɛn'n i awlo lɔ be ɔli Izraɛlfuɛ'm bé sin be ko seli be kɛ: «Ndɛ nga Ezipt famiɛn'n ɔ'a kan'n yɛ: ‹Be su man-man amun ijre kun.

¹¹ Amun bɔbɔ amun `wɔ nan amun ko kunndɛ lika nga amun ko nyan ijre nun'n, sanngɛ nga ɔ fata kɛ amun si'n yɛlɛ kɛ be su ti-man amun junman'n su, bliki nga amun kpɛ titi'n, i nuan su yɛ amun ´kpɛ i ekun-ɔn.› »

¹² Nan Izraɛlfuɛ'm b'a sanndi Ezipt mɛn wunmuan'n nun. Be ɔli ijre ng'ɔ ko ju be'n i kunndɛlɛ.

¹³ Plɔtrɔ junman'n su nianfuɛ'm be jin be su, be mianmian be, be se be kɛ: «Amun `wie amún cɛn kun junman'n di kɛ laa bɔ be tɛ man amun ijre'n sa.»

¹⁴ Eziptfuɛ nga be ti plɔtrɔ junman'n su nianfuɛ sɔ'm be bo Izraɛlfuɛ nga be fa be sieli i junman'n su kpɛnngbɛn kanngan mun bɔbɔ. Kpɛkuun be se be kɛ: «?Nzu ti yɛ anunman nin ndɛ bliki liɛ nga amun kpɛli'n ju-man kɛ laa liɛ nga amun kpɛ i titi'n sa kun-ɔn?»

¹⁵ Junman'n su kpɛnngbɛn kanngan sɔ'm be ɔli Ezipt famiɛn'n i wun lɔ, be ko seli i kɛ be klun jɔ-man. Be usɛli i kɛ: «?Nannan, nguɛ ti yɛ a yo e sɔ-ɔ?

¹⁶ Be kunndɛ-man ijre be man-man e kun, sanngɛ be waan bliki nga e kpɛ'n i nuan ju kɛ laa liɛ nga e kpɛ'n sa. Be bo e bɔbɔ. Nga be ´yo i lɛ'n, nɛ́n i su-ɔ.»

¹⁷ Ezipt famiɛn'n tɛli be su kɛ: «Amun ti fuɛnfuɛ, nanwlɛ, amun ti fuɛnfuɛ, i sɔ'n ti yɛ amun se kɛ: ‹E `wɔ nan e ko yi tɛ e man e Nyanmiɛn nin-ɔn!›

¹⁸ Siɛn'n amun `wɔ ko di junman'n, be su man-man amun ijre kun, sanngɛ bliki nga amun ´kpɛ'n, man i nuan'n ju kɛ laa liɛ'n sa.»

¹⁹ Izraɛlfuɛ nga be ti junman'n su kpɛnngbɛn kanngan'm be wunnin kɛ be su kle be nyrɛnnɛn, afin be seli be kɛ: «Be ti-man bliki'n su, bliki nuan kunngba nga amun kpɛ laa'n i su yɛ amun `kpɛ-ɔ.»

²⁰ Kɛ be fin famiɛn'n i lika lɔ be ´fite'n, be toli Moiz nin Aarɔn gua su lɛ, be su minndɛ be.

²¹ Yɛ be seli be kɛ: «Man Nyanmiɛn wun nga amun yoli i lɛ'n, nan ɔ `bu amun fɔ. Amun ti'n, famiɛn'n nin i mantanfuɛ'm b'a kpɔ ye. Amu'an man be tokofi kɛ be fa kun ye.»

²² Moiz sɛli i sin Anannganman wun lɔ, ɔ ko seli i kɛ: «?Ee Anannganman, ɔ yo sɛ ti yɛ a yo sran nga'm be tɛ nin-ɔn? ?Ɔ yo sɛ ti yɛ a sunmannin min-ɔn?

²³ Kɛ ɔ fin cɛn bɔ n ko kannin ndɛ nga ɔ waan n kan kle famiɛn'n, yɛ ɔ sɔli Izraɛlfuɛ'm be nyrɛnnɛn klelɛ-ɔ. Ɔ kusu a o lɛ, a de-man ɔ nvle'n.»