Ezipt Lɔ Tulɛ'n 40 - NYANMIƐN NDƐ'N 1998

Nyanmiɛn waan be `kplan tannin sua nan be `fa wlɛ i sa nun

¹ Anannganman seli Moiz kɛ:

² «Anglo klikli'n i cɛn klikli'n su, yo man be kplan min tannin sua nga n ´yi mín wun nglo nun'n bɔ i nun yɛ be ´yia'n.

³ Man be fa min alaka'n be sie i nun lɔ, nan be kɛtɛ i nyin nin rido'n.

⁴ Man be fa min tabli'n be bla wie, be `fa kpaun nga be ´fa man min'n be `sie su. Man be fa like nga be fa kannin mun be siesie su'n be bla nan be sɔ kannin'm bé nuan.

⁵ Ansans yrawlɛ bɔ sika ɔkwlɛ yɛ be fa yoli'n, man be fa sie min alaka'n i nyrun lɛ. Man be sende min tannin sua'n i rido'n anuan'n nun.

⁶ Man be sie min sɔwlɛ'n tannin sua'n i nyrun lɛ.

⁷ Man be fa bé wun fiɛn kplolɛ nzue'n i kpongbo'n be sie i tannin sua'n nin min sɔwlɛ'n be afiɛn. Man be gua nun nzue nan ɔ `yi i.

⁸ Man be siesie awlo'n i wun tannin tanmue mun. Man be fa rido'n be sende i awlo klun'n i anuan'n nun.

⁹ Fa bé ti su gualɛ ngo'n guagua min tannin sua'n su. Guagua wie ninnge nga be o nun lɔ'n bé su. Kɛ a ko yo i sɔ'n, wuun min sa nun yɛ w'a fa tannin sua'n w'a wlɛ i lɛ-ɔ, kpɛkuun kɛ ɔ fɛ lɛ'n, ɔ ti min liɛ klonglo.

¹⁰ Fa ngo'n wie gua min sɔwlɛ'n nin i wun ninnge'm bé su. Kɛ a ko yo i sɔ'n, wuun min sa nun yɛ w'a fa wlɛ i lɛ-ɔ. Kɛ ɔ fɛ lɛ'n, ɔ ti min liɛ klonglo kpa.

¹¹ Fa ngo kunngba sɔ'n wie guagua bé wun fiɛn kplolɛ nzue'n i kpongbo'n nin i bo'n bé su nan ɔ `kaci min liɛ klonglonglo.

¹² Fa Aarɔn nin i mma mun kɔ tannin sua bɔ n yi min wun nglo nun'n i anuan'n nun lɔ, nan man be wunnzin.

¹³ Aarɔn i tralɛ ng'ɔ wla fa jran min nyrun'n, fa wlɛ i wun nan guɛ i ti su ngo. Fɛ i wlɛ mín sa nun nan ɔ `yo min nyrun jranfuɛ nan ɔ `di min junman'n.

¹⁴ Se Aarɔn i mma'm be kɛ be bla ɔ wun lɛ. Kɛ be ba'n, fa be tralɛ mun wla bé wun.

¹⁵ Fa ngo gua bé ti su kɛ a fa guali bé si i ti liɛ'n su'n sa. Yɛ be wa yo min nyrun jranfuɛ mun, be ´di min junman'n. Ngo sɔ bɔ a ´fa gua bé ti su'n ti, be nin bé osu nunfuɛ'm be wa yo min nyrun jranfuɛ tititi, ɔ lɛ-man kpɛ bo.»

Moiz yoli man be kplannin Nyanmiɛn i tannin sua'n

¹⁶ Like nga Anannganman seli Moiz kɛ ɔ yo'n, ɔ niannin i kwlaa'n su yoli be cɛ, i kun sa ɔ'a ka-man lɛ.

¹⁷ Afuɛ nnyɔn su'n, i anglo klikli'n i cɛn ba klikli'n su yɛ be kplannin Nyanmiɛn i tannin sua nin-ɔn.

¹⁸ Moiz yoli man be kplannin Nyanmiɛn i tannin sua'n: be yoli waka'm be takatakawlɛ mun, be kplannin waka paplaapla mun, yɛ be fali wie be jajali nun, be kplannin kofiaja'm be kusu.

¹⁹ Tannin tanmue nga be sasali be su'n, be tinngɛli be nun yɛ be fa yoli Nyanmiɛn i sua nin-ɔn. Kpɛkuun be fali sua'n i su katalɛ like'n be katali su kɛ Anannganman kan kleli Moiz kɛ ɔ `yo'n sa.

²⁰ I sin Moiz fali yɛbuɛ paplaapla nga mmla blu'm be klɛ su'n wlɛli i Nyanmiɛn i alaka'n nun. Be fali waka floloflolo mun wlali alaka'n i sa'm be nun, yɛ be fɛli i su tre'n be katali su.

²¹ Be fali alaka'n be wlɛli i tannin sua'n nun lɔ, i sin be sendeli rido nga b'ɔ kata alaka'n i nyrun'n kɛ Anannganman kan kleli Moiz kɛ ɔ `yo'n sa.

²² Be fali Anannganman i tabli'n be sieli i tannin sua'n nun lɔ i bue ng'ɔ kpɛ nglo lɔ'n su. Be sieli i rido ng'ɔ kpɛ lika'n nun'n i nyrun lɛ.

²³ Be fali kpaun nga be fa man Anannganman'n be siesieli su kɛ Anannganman kan kleli Moiz kɛ ɔ `yo'n sa.

²⁴ Be fali kannin'm be siewlɛ'n be sieli tannin sua'n nun lɔ i bue ng'ɔ kpɛ ngua lɔ'n su, tabli'n i nyrun sɛsɛ.

²⁵ Be sɔli kannin'm bé nuan Anannganman nyrun kɛ Anannganman kan kleli Moiz kɛ ɔ `nian su yo'n sa.

²⁶ Be fali ansans yrawlɛ b'ɔ ti sika ɔkwlɛ'n be sieli i rido ng'ɔ kpɛ lika nun'n i nyrun lɛ.

²⁷ Be yrali Anannganman i ansans i su kɛ ɔ kan kleli Moiz kɛ ɔ `yo'n sa.

²⁸ Be sendeli tannin sua'n i anuan'n nun rido'n.

²⁹ I sin be sieli Nyanmiɛn i sɔwlɛ'n tannin sua'n i nyrun koko lɛ. Yɛ be yili tɛ nga be yrɛ i nnɛn kɔlikɔli'n i su. Be yrali ble annzɛ like ng'ɔ ti kɛ ble sa nga be fa yi sraka'n i su ekun. Nga Anannganman kan kleli Moiz'n, i su yɛ be niannin be yoli-ɔ.

³⁰ Be takali kpongbo dan'n tannin sua'n nin Nyanmiɛn sɔwlɛ'm be afiɛn lɛ, yɛ be guali nun nzue kɛ be `fa kplo bé wun fiɛn.

³¹ Moiz nin Aarɔn, ɔ nin i mma mun, be fa nzue sɔ'n be wunnzin bé sa nin bé ja mun.

³² Blɛ kwlaa nun kɛ be ´wlu tannin sua nga Nyanmiɛn yi wun nglo nun'n nun, annzɛ kɛ be ´mantan Nyanmiɛn i sɔwlɛ'n, be kplo bé wun fiɛn kɛ nga sa. Nga Nyanmiɛn kan kleli Moiz'n, i su yɛ be nian be yo-ɔ.

³³ Moiz yoli man be sili awa ng'ɔ sin yia awlo klun'n nin tannin sua'n nin Nyanmiɛn sɔwlɛ'n. Be sendeli rido'n awlo klun'n i anuan'n nun. Kɛ be guaguali junman'm bé bo kɛ nga sa.

Nyanmiɛn i nyrun nyannyan'n deli i tannin sua wunmuan'n

³⁴ I blɛ sɔ nun'n, sin wɛnsrɛn'n wa katali tannin sua nga Nyanmiɛn yi i wun nglo nun'n su. Anannganman i nyrun nyannyan'n deli tannin sua wunmuan'n .

³⁵ I sɔ'n ti Moiz kwla wlu-man tannin sua nga Nyanmiɛn yi wun nglo nun'n i nun lɔ, afin sin wɛnsrɛn'n wo nun yɛ Anannganman i nyrun nyannyan'n ɔ'a de i wunmuan'n.

³⁶ Kan kwlaa nga be ju lɛ'n, sɛ sin wɛnsrɛn'n nian jaso-man Nyanmiɛn i tannin sua'n i ti su'n, Izraɛlfuɛ'm be kɔ-man be nyrun.

³⁷ Sɛ sin wɛnsrɛn'n tu-mɛn i bo'n, be kɔ-man. Be minndɛ cɛn nga b'ɔ ´jaso'n.

³⁸ Sin wɛnsrɛn ng'ɔ kata tannin sua'n su wia nun'n, ɔ nin sin ng'ɔ jue kɔnguɛ'n, be nun yɛ Anannganman yi i wun nglo kle Izraɛlfuɛ mun lele yɛ be fa juli be juwlɛ-ɔ.