Ezipt Lɔ Tulɛ'n 4 - NYANMIƐN NDƐ'N 1998

Nyanmiɛn yili i tinmin'n i nglo kleli Moiz

¹ Moiz seli Nyanmiɛn kɛ: «Nian, be su lafi-man min su, be su fa-man ndɛ nga n ´kan'n su. Be wa se min kɛ: ‹Anannganman ɔ'a yi-mɛn i wun nglo ɔ'a kle-man wɔ›.»

² Anannganman usɛli i kɛ: «?Nguɛ like yɛ ɔ o ɔ́ sa nun lɛ nin-ɔn?» I waan: «Kpɔnman-an.»

³ Anannganman seli i kɛ: «Yi i ase.» Yɛ ɔ yili i ase-ɔ, kpɛkuun kpɔnman'n ɔ'a kaci wuo. Moiz waan ɔ ´wanndi wuo'n i nyrun.

⁴ Nan Anannganman ɔ'a se i kɛ: «To ɔ́ sa'n, nan tra wuo'n i lua'n.» Moiz toli i sa'n, nan ɔ'a tra wuo'n, kpɛkuun wuo'n kacili kpɔnman i sa nun ekun.

⁵ Anannganman waan: «Like nga a wa yo nan b'a lafi su kɛ min Anannganman bɔ n ti be nannan Abraam, nin Izaak, nin Zakɔb be Nyanmiɛn'n, n yili min wun nglo n kleli wɔ'n yɛ ɔ o lɛ-ɔ.»

⁶ Anannganman seli i ekun kɛ: «Fa ɔ́ sa ngbabua'n wlɛ i ɔ wue'n nun ɔ tralɛ'n bo.» Yɛ Moiz yoli i sɔ-ɔ. Kɛ ɔ ´yi i sa'n, ɔ'a fɛn fitafita kpa. Kokowe ufue ɔ'a yo i sa'n.

⁷ Anannganman seli i kɛ: «Fa ɔ́ sa'n sie ɔ wue'n su ɔ tralɛ'n bo lɔ ekun.» Yɛ Moiz yoli i sɔ ekun-ɔn. Kɛ ɔ ´yi i sa'n, ɔ'a sin i osu'n nun ɔ'a yo weiin.

⁸ Anannganman waan: «Sɛ Izraɛlfuɛ'm b'a lafi-man ɔ su blɛ bɔ a yi atrɛ klikli'n, be wa lafi wɔ su atrɛ nnyɔn su bɔ a wa yi'n ti.

⁹ Sɛ a yi atrɛ'n i nnyɔn su'n nan be waan be lafi-man ɔ su ekun'n, nan be waan be tie-man ɔ ndɛ'n mlɔnmlɔn'n, sa nzue Nil nzue ba'n nun guɛ i asiɛ ba'n su. Nzue nga a sali'n ´kaci mmoja.»

Nyanmiɛn fali Aarɔn kɛ ɔ uka Moiz

¹⁰ Moiz seli Anannganman kɛ: «Min Min, n ´srɛ wɔ kpa ti-ɔ, n ti-man sran b'ɔ ti ijɔfuɛ-ɔ. N ti-man sran bɔ ijɔ nzra nun titi-ɔ, kɛ a nin min ijɔ yɛ'n bɔbɔ n tɛ o min osu'n nun. Mín nuan'n sin-man ndɛndɛ, min ijɔlɛ ti tankantankan.»

¹¹ Anannganman usɛli i kɛ: «?Wan yɛ ɔ man sran'n i nuan kpa nin-ɔn? ?Wan yɛ ɔ yo man sran yo bobofuɛ annzɛ sutrefuɛ nin-ɔn? ?Wan yɛ ɔ yo man sran wun ase annzɛ ɔ yo anyansifuɛ nin-ɔn? ?Nán m bɔbɔ min Anannganman nin-ɔn?

¹² Kɔ siɛn'n, kɛ a ´ijɔ'n, n ´uka wɔ, n ´kle wɔ ndɛ nga ɔ fata kɛ a kan'n.»

¹³ Moiz waan: «N ´srɛ wɔ kpa ti-ɔ, min Min, sunman sran uflɛ.»

¹⁴ Kpɛkuun Anannganman fali Moiz wun ya yɛ ɔ seli i kɛ: «?Ɔ niaan bian Aarɔn b'ɔ ti Levifuɛ'n nun-man lɛ? N si kɛ i liɛ ɔ si ijɔ kpa. Ɔ o atin nun ɔ su ba wɔ atin kpalɛ, sɛ ɔ wun wɔ'n ɔ ´yo i fɛ kpa.

¹⁵ Kan ndɛ'n kle i, ndɛ nga ɔ fata kɛ ɔ kan'n, kan kle i. Blɛ bɔ amun ´ijɔ'n, m bɔbɔ n ´jran amun sran nnyɔn'n amun sin. N wa kle amun like nga ɔ fata kɛ amun yo'n.

¹⁶ I yɛ ɔ wa kan ɔ́ nuan su ndɛ kle nvlefuɛ mun-ɔn. Ɔ ´ijɔ ɔ́ nuan, ɔ kusu a ´kaci kɛ i Nyanmiɛn sa yɛ a ´kan ndɛ'n ´kle i-ɔ.

¹⁷ Fa kpɔnman nga, i yɛ a wa fa yi atrɛ mun-ɔn.»

Moiz sɛli i sin i nvlefuɛ'm be wun lɔ

¹⁸ Moiz sɛli i sin i sia Zetro wun lɔ, ɔ seli i kɛ: «Ɔ fata kɛ n wɔ min niaan Izraɛlfuɛ nga be o Ezipt lɔ'n be osu nianlɛ. N ´ko nian sɛ be tɛ o nguan nun o.» Zetro seli Moiz kɛ: «N tili. Nanti ye o!»

¹⁹ Anannganman seli Moiz Madian mɛn'n nun lɔ kɛ: «Kɔ, sa ɔ́ sin Ezipt lɔ sakpa, afin sran nga be waan be ´kun wɔ'n b'a wie wu.»

²⁰ Moiz fɛli i yi nin i mma mun be fuli aflunmun su, yɛ ɔ sɛli i sin Ezipt lɔ-ɔ. Kɛ ɔ ´kɔ'n, ɔ fali kpɔnman nga Nyanmiɛn seli i kɛ ɔ fa'n.

²¹ Anannganman seli i ekun kɛ: «Abonuan ninnge wafa-wafa nga n yoli man a kwlali be yo lɛ'n, kɛ a ´sa ɔ́ sin Ezipt lɔ yɛ'n, yo i sɔ abonuan sa mun Ezipt famiɛn'n i nyrun. N wa yo man ɔ su sie-mɛn i su ɔ ndɛ'm bé bo, ɔ su yaci-man Izraɛlfuɛ'm be nun kɛ be wɔ.

²² I blɛ sɔ nun'n, se i kɛ: ‹Ndɛ nga Anannganman kan'n yɛ: Izraɛl nvle'n ti kɛ min wa yasua sa, min wa yasua klikli nin-ɔn.

²³ N seli wɔ kɛ a yaci i nun nan ɔ ko su min, sanngɛ a kplin-man su. I sɔ'n ti, n wa yo man ɔ klun ba yasua klikli'n ´wu.› »

²⁴ Kɛ be ´kɔ bɔ be juli atin afiɛn'n, Moiz lali lika kun nun kɔnguɛ. Anannganman bali i wun lɛ, i waan ɔ yo nan ɔ wu.

^25-26 Kpɛkuun be ja nun lɛ, i yi Sefora fali yɛbuɛ kun b'ɔ la kɛ kue sa'n, ɔ fa kpɛli i wa'n i yasua lika'n i ti kplo'n, nan ɔ'a fa kan Moiz i yasua lika'n, ɔ seli kɛ: «A ti min mmoja nun bian.» Klɛn b'ɔ wlali bakan'n ti yɛ ɔ seli sɔ-ɔ. Kɛ ɔ yoli sɔ'n, nan Anannganman ɔ'a jaso Moiz i wun lɛ.

²⁷ Anannganman seli Aarɔn kɛ: «Kɔ aawlɛ flɛnnɛn'n nun lɔ ko kpa Moiz i atin.» Aarɔn ɔli, ɔ ko toli i niaan bian'n Nyanmiɛn i oka'n su lɔ, kpɛkuun ɔ tɔli i nun.

²⁸ Moiz kannin jasin nga Nyanmiɛn fa wlɛli i nuan'n kleli Aarɔn, yɛ ɔ kannin atrɛ nga Nyanmiɛn waan ɔ yi be'n be ndɛ.

²⁹ I sin be nnyɔn'n be sannin nun be ɔli. Be ko yiali Izraɛl kpɛnngbɛn mun.

³⁰ Aarɔn kannin jasin nga Nyanmiɛn fa wlɛli i Moiz nuan kɛ ɔ `bo kle be'n. Yɛ Aarɔn yili atrɛ mun Izraɛlfuɛ'm be nyrun-ɔn.

³¹ Kpɛkuun sran'm be lafili su, be wunnin i wlɛ kɛ Anannganman wunnin bé su afɛ'n, nan i waan ɔ ´yi i wun nglo nan ɔ ´de be. Be kotoli nan b'a su i.