Ezipt Lɔ Tulɛ'n 39 - NYANMIƐN NDƐ'N 1998

Nyanmiɛn nyrun jranfuɛ i tralɛ'n bɔ be flɛ i Efɔd'n i ndɛ

¹ Be fali bua ndrɛ b'ɔ ti ɔkwlɛ srosrowa nin ɔkwlɛ kankankan nin ɔkwlɛ youun be yoli tralɛ nga be wla be di Nyanmiɛn sua nun junman'n. Be yoli Aarɔn i tralɛ mun b'ɔ fa jran Anannganman i nyrun'n kɛ Anannganman seli Moiz kɛ ɔ `yo'n sa.

² Lɛn nyanman ng'ɔ sɔ kpa'n nin bua ndrɛ nyanman b'ɔ ti ɔkwlɛ srosrowa nin ɔkwlɛ kankankan, ɔ nin ɔkwlɛ youun yɛ be fa yoli efɔd nin-ɔn. Be fali sika ɔkwlɛ nyanman be yoli nun nzɔliɛ mun.

³ Be kpɛkpɛli sika ɔkwlɛ fɛtɛfɛtɛ kpa'n nun tianman-tianman, be fa flɛnflɛnnin i bua ndrɛ nyanman b'ɔ ti ɔkwlɛ srosrowa nin ɔkwlɛ kankankan nin ɔkwlɛ youun, ɔ nin lɛn nyanman plili'm be nun.

⁴ Be yoli efɔd'n i sa nnyɔn i nuan'n su kɛ ɔ ´yo nan b'a kwlɛ wla'n ti.

⁵ Like kunngba'n nga be fa yoli Efɔd'n yɛ be fa yoli i nyanman nga be fa ci su mun-ɔn. I nyanman sɔ'm be nin i be sa su kunngba kɛ Anannganman fa kleli Moiz'n sa.

⁶ Be dili oniks yɛbuɛ wie'm be su junman yɛ be fa wlali sika ɔkwlɛ buati'm be nun. Yɛ be klɛklɛli Zakɔb i mma'm be dunman yɛbuɛ sɔ'm be su kɛ be fa klɛ nzɔliɛ su'n sa.

⁷ Be fa yɛbuɛ sɔ mun tatali efɔd'n i nyanman nga be o be wati su'n bé su kɛ Anannganman seli Moiz kɛ ɔ ´yo'n sa. Yɛbuɛ sɔ'n ɔ kle kɛ Izraɛl akpasua blu-nin-nnyɔn'm be o lɛ.

Pata kaan b'ɔ cici be wue nun'n

⁸ Be dili pata kaan b'ɔ cici be wue nun'n i su junman kpa kɛ be fa dili i efɔd'n su'n sa. Be yoli i nin lɛn nyanman nga be sɔ kpa'n. Bua ndrɛ nyanman b'ɔ ti ɔkwlɛ srosrowa nin ɔkwlɛ kankankan nin ɔkwlɛ youun'n, be fa flanflannin lɛn'n nun. Be fali sika ɔkwlɛ nyanman be yoli pata kaan'n nun nzɔliɛ mun.

⁹ Pata kaan sɔ'n i bue nnan'm be ngba be sɛ. I bue kun ti santimɛtri ablaɔn-nin-nnun.

¹⁰ Be siesieli su yɛbuɛ kpakpa nyanman nnan. Be yoli i nyanman klikli'n nin sarduani kun, nin topaz kun, ɔ nin emɛrɔd kun.

¹¹ Be yoli i nyanman nnyɔn su'n nin grenat kun, nin safir kun, ɔ nin diaman kun.

¹² Be yoli i nyanman nsan su liɛ'n nin yasɛnt kun, agat kun, ɔ nin ametist kun.

¹³ I nyanman nnan su liɛ'n, be yoli i nin krisɔlit kun, nin kɔrnalin kun, ɔ nin zasp kun.

¹⁴ Be klɛli Zakɔb i wa blu-nin-nnyɔn'm be dunman yɛbuɛ sɔ'm be su. Be klɛli be su kɛ be fa klɛ nzɔliɛ su'n sa. Be klɛli dunman kun yɛbuɛ kun su, kun yɛbuɛ kun su. Yɛbuɛ sɔ'm be ti Izraɛl akpasua blu-nin-nnyɔn'm bé nzɔliɛ.

¹⁵ Be wɔli sika ɔkwlɛ jrɛiin'n jrɔkɔ mun kɛ nyanman sa. Be fali jrɔkɔ sɔ mun sendeli pata kaan'n su.

¹⁶ Be yoli sika ɔkwlɛ buati nnyɔn nin sika ɔkwlɛ nga kukluuklu nnyɔn. Yɛ be fa be sieli pata kaan'n i nuan nnyɔn nga be o nglo'n be su.

¹⁷ Be fali sika ɔkwlɛ nyanman nnyɔn'm be cicili nga kukluuklu'm bɔ be o pata kaan'n i nuan nnyɔn'm be su'n be su.

¹⁸ Yɛ be fali bé ti kun nga mun be cicili sika ɔkwlɛ buati nnyɔn nga be o efɔd'n i sa'm be su'n be su, kɛ ɔ ´yo nan pata kaan'n ɔ'a ka bé nyrun wa'n ti.

¹⁹ Be yoli sika ɔkwlɛ nga kukluuklu nnyɔn, nan b'a fa be b'a sie pata kaan'n i nuan nnyɔn nga be o ngua'n be su, be o pata kaan'n i bue ng'ɔ kan efɔd'n i su.

²⁰ Be yoli sika ɔkwlɛ nga kukluuklu nnyɔn ekun, nan b'a fa be b'a sie efɔd'n i nyanman nnyɔn bɔ be sin be wati su'n be bo ngua efɔd'n i nyrun wa, i ngbaliɛ'n su lɛ. Nga sɔ'm be o efɔd i cisu'n su.

²¹ Be fali nyanman ɔkwlɛ srosrowa kun be cicili pata kaan'n i nuan nga kukluuklu mun nan b'a fa cici efɔd'n i liɛ mun. Kɛ be cici be sɔ'n, i liɛ'n efɔd'n nin pata kaan'n be nun su ti-man. Nga Anannganman'n kan kleli Moiz kɛ ɔ `yo'n i su yɛ be yoli-ɔ.

Tralɛ kun fuɛ'm bɔ be wla be di Anannganman i nyrun jranlɛ junman'n

²² Tralɛ tɛnndɛn ng'ɔ o efɔd'n i bo'n ti bua ndrɛ ɔkwlɛ srosrowa.

²³ Bé ti wluwlɛ'n wo i afiɛn sɛsɛ. Be buli i nuan'n kpa sin yiali nun kɛ ɔ ´yo nan ɔ'a titi-man'n ti.

²⁴ Be yoli grenadie i mma nzɔliɛ ɔ nin bua ndrɛ ɔkwlɛ srosrowa nin ɔkwlɛ kankankan nin ɔkwlɛ youun. Be fali nzɔliɛ sɔ mun siesieli tralɛ'n i ngua lɔ i nuan buwlɛ'n su tɛɛn sin yiali nun.

²⁵ Be yoli sika ɔkwlɛ glein mun. Be fa be wlawlali grenadie mma'm be afiɛn tɛɛn sin yia nun.

²⁶ Be sie glein'n kun kpɛkuun be sie grenadie mma kun, be sie glein'n kun kpɛkuun be sie grenadie mma kun. Be yoli i sɔ trilili tralɛ dan'n i ngua lɔ sin yiali nun kɛ Anannganman'n kan kleli Moiz kɛ ɔ `yo'n sa.

²⁷ Be yoli Aarɔn i lɛn tralɛ tɛnndɛn kplɔkɔɔ'n ɔ nin i mma'm be liɛ'n.

²⁸ Be fali lɛn tannin kplɔkɔɔ be yoli kle, yɛ be fali lɛn tannin kplɔkɔɔ be yoli kle kanngan mun nin cɛkoto mun.

²⁹ Be fali lɛn nyanman plili ng'ɔ sɔ kpa'n be wuli cisu, be dili nun aba, bua ndrɛ b'ɔ ti ɔkwlɛ srosrowa nin ɔkwlɛ kankankan nin ɔkwlɛ youun'n flanflan nun. Be yoli i kɛ Anannganman kan kleli Moiz kɛ be `yo'n sa.

³⁰ Be kloli sika ɔkwlɛ jrɛiin'n be fa yoli like kɛ waka nyrɛ sa. Be klɛli su kɛ: «Anannganman i liɛ klonglo-ɔ.» Be klɛli su kɛ be fa klɛ tanpɔn su'n sa.

³¹ Be fali nyanman ɔkwlɛ srosrowa be fa trali waka nyrɛ sɔ'n i ase kle dan'n i nyrun lika'n su kɛ Anannganman kan kleli Moiz kɛ ɔ `yo'n sa.

Junman'n wieli

³² Kɛ Nyanmiɛn i tannin sua bɔ be flɛ i tannin sua nga Nyanmiɛn yi i wun nglo nun'n i wun junman'n kwlaa wieli kɛ nga sa. Like nga Anannganman seli Moiz kɛ ɔ `yo'n, Izraɛlfuɛ'm be niannin su be yoli i sekeseke kpan.

³³ Be fali Nyanmiɛn i tannin sua'n nin i wun ninnge'm be kwlaa blɛli Moiz. Like nga be fa bali mun'n yɛ: tannin'n bɔbɔ, i ase tralɛ ninnge mun, i waka paplaapla mun, waka nga be fa jaja nun'n mun, i kofiaja'm be nin be takatakawlɛ mun,

³⁴ bua nene kplo dan nga be fa kata su bɔ be kɛnnin i ayre ɔkwlɛ'n, nnɛn uflɛ kplo b'ɔ sɔ kpa'n bɔ be fa kata i su wie'n, yɛ rido b'ɔ kpɛ sua'n nun nnyɔn'n,

³⁵ Nyanmiɛn i alaka'n nin i waka floloflolo mun ɔ nin i su tre'n,

³⁶ Nyanmiɛn i tabli'n nin i su ninnge mun, yɛ kpaun nga be fa man Nyanmiɛn'n,

³⁷ like nga be fa kannin mun siesie su'n, bɔ sika ɔkwlɛ jrɛiin yɛ be fa yoli'n, ɔ nin kannin siesiewlɛ sɔ'n i kannin mun nin bé wun ninnge mun, yɛ ngo nga be fa sɔ kannin mun'n,

³⁸ ansans yrawlɛ bɔ sika ɔkwlɛ yɛ be fa yoli'n, bé ti su gualɛ ngo'n, ansans nga be yrɛ i'n, yɛ tannin sua'n i anuan'n nun rido'n,

³⁹ Nyanmiɛn sɔwlɛ b'ɔ ti aaba'n nin i su aaba griazi'n, ɔ nin i waka floloflolo mun, kpongbo nga be gua nun nzue kplo bé wun fiɛn'n nin kpongbo sɔ'n i bo'n,

⁴⁰ awlo'n i wun sisilɛ tannin mun, awa'n i waka'm be takawlɛ mun, ɔ nin awlo'n i anuan'n nun rido'n, nin i nyanman mun, yɛ i kpɛngbɛ mun, ɔ nin ninnge'm be kwlaa bɔ be fa di Nyanmiɛn i tannin sua b'ɔ yi i wun nglo nun'n i nun junman'n,

⁴¹ tralɛ nga be sieli be ngunmin kɛ be `fa di Nyanmiɛn i sua'n nun junman'n, yɛ Aarɔn b'ɔ ti Nyanmiɛn nyrun jranfuɛ be su kpɛn'n i tralɛ nin i mma'm be tralɛ nga be wla di Nyanmiɛn nyrun jranlɛ junman'n.

⁴² Junman nga Anannganman seli Moiz kɛ be di'n, Izraɛlfuɛ'm be niannin i kwlaa'n su be dili.

⁴³ Kɛ Moiz wunnin i kɛ i kwlaa'n ɔ'a wie kɛ Anannganman fa kleli be'n sa'n, ɔ yrali Izraɛlfuɛ'm be nguan.