Ezipt Lɔ Tulɛ'n 38 - NYANMIƐN NDƐ'N 1998

Nyanmiɛn i sɔwlɛ'n

¹ Be fali akasia waka yoli Nyanmiɛn i sɔwlɛ kun. I bue nnan'm be kwlaa be sɛ, be ti mɛtri nnyɔn nin sin. I nglo-nglo su'n ti mɛtri kun nin sin.

² Be yoli like kɛ nnɛn wɛ sa i cɔnjɔ nnan'm bé su. Nnɛn wɛ sɔ'm be nin Nyanmiɛn sɔwlɛ'n be sa su kunngba. Be kloli aaba be guɛli i Nyanmiɛn sɔwlɛ'n i wun.

³ Be yoli Nyanmiɛn sɔwlɛ sɔ'n i wun ninnge nga be o yɛ mun: kpongbo nga be fa tu nzuɛn'n, peli mun, klowa mun, atiɛ je mun, ɔ nin like nga be gua ansans nun be yrɛ i'n. Be fali aaba yɛ yoli be kwlaa sɔ mun-ɔn.

⁴ Be fali aaba yoli griazi, be fa sieli i Nyanmiɛn sɔwlɛ'n i nuan bui'n i bo lɛ kan sin yia nun. Kɛ ɔ fɛ i i bo ngua lɛ'n, ɔ ju Nyanmiɛn sɔwlɛ'n i afiɛn sɛsɛsɛ.

⁵ Be yoli i sa kukluuklu nnan, be fa tɛtɛli i aaba griazi'n i cɔnjɔ nnan'm bé su, kɛ ɔ ´yo nan b'a kwla fa waka floloflolo mun b'a wla be nun'n ti.

⁶ Be sɛli akasia waka floloflolo nnyɔn. Be kloli aaba guali bé wun.

⁷ Be fali waka sɔ'm be wlɛli i sa kukluuklu'm be nun. Waka'n kun o bue kun su, yɛ kun o bue kun ekun'n su lɔ. Waka sɔ mun yɛ be ´fa sua Nyanmiɛn sɔwlɛ nin-ɔn. Nyanmiɛn sɔwlɛ sɔ'n bɔ waka paplaapla yɛ be fa yoli'n, i klun lɛ kunman.

⁸ Be yoli aaba kpongbo dan'n, i bo'n ti aaba. Bla nga be di junman tannin sua nga Anannganman yi i wun nglo nun'n i anuan'n nun lɛ'n bé niannun'n yɛ be fa yoli-ɔ.

Nyanmiɛn i tannin sua'n i awlo klun'n

⁹ Nyanmiɛn i tannin sua'n lɛ awlo klun. Tannin tanmue nga lɛn b'ɔ sɔ kpa'n yɛ be fa yoli'n, be sin yia awlo klun sɔ'n. I ngua lɔ bue liɛ'n ti mɛtri ablenun.

¹⁰ Awa'n i ja ablaɔn'm be nin bé bo takawlɛ ablaɔn'm be ti aaba ngunmin. Like nga be fa tra tanmue'm be ase'n nin nga be fa suan bé bo'n be ti jɛtɛ ufue ngunmin.

¹¹ Like kunngba'n yɛ ɔ wo i bue ng'ɔ kpɛ nglo lɔ'n su-ɔ: lɔ tannin tanmue'm be kusu be tɛnndɛn nun'n ti mɛtri ablenun. Awa'n i ja ablaɔn'n be nin bé bo takawlɛ ablaɔn'n be ti aaba. Like nga be fa tra tanmue'm be ase'n nin nga be fa suan bé bo'n be ti jɛtɛ ufue.

¹² I bue ng'ɔ kpɛ wia atɔliɛ lɔ'n, i tannin tanmue'm be tɛnndɛn nun'n ti mɛtri ablaɔn-nin-nnun. Be kplannin sua ja blu ɔ nin be takawlɛ blu. Like nga be fa tra tannin tanmue'm be ase'n nin nga be fa suan bé bo'n be ti jɛtɛ ufue.

¹³ Wia afiliɛ lɔ bue liɛ'n su kan be wlu lɛ'n, i tɛtrɛ nun'n ti mɛtri ablaɔn-nin-nnun.

¹⁴ Anuan'n i bue ng'ɔ o fama su'n, ɔ lɛ tannin tanmue mun, be sasa su lele mɛtri nso nin sin. Sua ja nsan be o lɛ, be nin bé bo takawlɛ nsan mun.

¹⁵ Anuan'n i bɛ su lika liɛ'n nun'n, tannin tanmue'm be o lɛ wie, be kusu be sasa su lele mɛtri nso nin sin. Sua ja nsan nin bé bo takawlɛ nsan be o lɛ kusu.

¹⁶ Tannin tanmue ng'ɔ sin yia awlo'n be ti lɛn tannin b'ɔ sɔ kpa.

¹⁷ Sua ja nga be o awa'n nun'n be ti aaba. Tanmue'm be ase tralɛ like nin bé bo suanlɛ like'm be ti jɛtɛ ufue.

¹⁸ Be nga be di tannin nun aba'n be sieli rido awlo'n i anuan'n nun, be fali lɛn nyanman ng'ɔ sɔ kpa'n yɛ be fa yoli-ɔ, be fali bua ndrɛ b'ɔ ti ɔkwlɛ srosrowa nin ɔkwlɛ kankankan nin ɔkwlɛ youun flanflannin nun. Rido sɔ'n i tɛnndɛn nun'n ti mɛtri blu, yɛ i nglo-nglo su'n ti mɛtri nnyɔn nin sin. I nglo-nglo nin awa'n i tannin tanmue'm be sɛ.

¹⁹ Rido i ja nnan'm be nin bé bo takawlɛ nnan'm be ti aaba. Like nga be fa tra tanmue'm be ase'n nin nga be fa suan bé bo'n be ti jɛtɛ ufue. Rido i ja'm bé ti su nglo gbagblagba'm be ti jɛtɛ ufue.

²⁰ Nyanmiɛn i tannin sua'n i ja'm be nin awa'n i ja'm be ti aaba.

Ninnge nga be fa dili junman'n bé nuan

²¹ Nyanmiɛn i tannin sua b'ɔ ti i bɔbɔ i alaka'n i siewlɛ'n i kplanlɛ'n wun ninnge'n kwlaa bé nuan'n yɛ: Moiz yɛ ɔ seli Levifuɛ'm be kɛ be `ka ninnge sɔ mun nan be `si bé nuan-an. Aarɔn i wa yasua Itamar b'ɔ ti Nyanmiɛn nyrun jranfuɛ'n yɛ ɔ ti ninnge'm be kalɛ sɔ'n i su kpɛnngbɛn nin-ɔn.

²² Iri i wa Bɛzaleɛl b'ɔ ti Ir i anunman'n, b'ɔ fin Zida akpasua'n su'n, ɔ dili junman nga Anannganman seli Moiz kɛ ɔ `di'n.

²³ Sran ng'ɔ ukɛli i su'n yɛlɛ Aizamak i wa Ɔɔliab b'ɔ fin Dan akpasua'n su'n. Ɔ ti yɛbuɛ sɛfuɛ nin ninnge'm be su klɛklɛfuɛ, yɛ tannin nga be fa bua ndrɛ b'ɔ ti ɔkwlɛ srosrowa nin ɔkwlɛ kankankan nin ɔkwlɛ youun be wu'n, ɔ di nun aba. Ɔ di lɛn nun aba wie.

²⁴ Sika ɔkwlɛ'n i kwlakwla nga Izraɛlfuɛ'm be yili bɔ be fa dili Nyanmiɛn i tannin sua'n i wun junman'n ti kilo ya mɔcuɛ kilo ableso-nin-nso ɔ nin i su gram ya nsan. Be sunnzunnin i tannin sua'n i ninnge sunnzunliɛ'n nun.

²⁵ Jɛtɛ ufue'n kwlakwla nga kɛ be ´klɛ sran'm be dunman bɔ be yili'n i nuan'n yɛ: ɔ ti kilo akpi nsan kilo blu-nin-nso (3.017) ɔ nin i su gram ya nso gram ablenun, be niannin Nyanmiɛn i tannin sua'n nun lɔ ninnge sunnzunliɛ'n su yɛ be sunnzunnin-ɔn.

²⁶ Sran kun i jɛtɛ ufue ng'ɔ yili kɛ be ´klɛ sran'm be dunman'n ɔ ti gram nnun. Sran nga be klɛli be dunman'n be ti sran akpi-akpi ya nsiɛn sran akpi nsan sran ya nnun sran ablenun (603.550).

²⁷ Be kloli sika ɔkwlɛ kilo akpi nsan yɛ be fa yoli tannin sua'n ɔ nin rido ng'ɔ o i klun lɔ'm be ja'm be takawlɛ ya mun-ɔn. Be ja'm be takawlɛ sɔ'n, kun i wun jɛtɛ ufue'n ti kilo ablasan, kun i wun jɛtɛ ufue'n ti kilo ablasan.

²⁸ Jɛtɛ ufue kilo blu-nin-nso ɔ nin gram ya nso nin gram ablenun ng'ɔ kali lɛ'n, be fa yoli sua ja'm be pɔndi mun nin bé ti su gbagblagba'm bé wun katalɛ like'n, ɔ nin like floloflolo nga be o sua ja'm be afiɛn'n.

²⁹ Izraɛlfuɛ'm be aaba nga be yili'n i nuan'n ti kilo akpi nnyɔn kilo ya kun kilo ablaɔn-nin-nnan (2.124).

³⁰ Be fali aaba sɔ'n yoli tannin sua i anuan'n nun waka'm bé takawlɛ mun, ɔ nin Nyanmiɛn i sɔwlɛ'n i wun griazi'n nin i wun ninnge mun,

³¹ nin awa'n i waka'm be takawlɛ mun, ɔ nin anuan'n nun waka'm be takawlɛ mun, ɔ nin Nyanmiɛn i tannin sua'n nin awa'n i kpɛngbɛ'n be kwlaa.