Ezipt Lɔ Tulɛ'n 36 - NYANMIƐN NDƐ'N 1998

¹ «Bɛzaleɛl yɛ Ɔɔliab nin junman difuɛ kun nga mun bɔ be si junman di'n, bɔ Anannganman mannin be akunndan nin ngwlɛlɛ kɛ be fa di junman'n, be dili tannin sua nga Anannganman yi i wun nglo nun'n su junman'n i kwlaa kɛ Anannganman kan kleli be kɛ be `yo'n sa'n.»

² Moiz yiali Bɛzaleɛl, nin Ɔɔliab, yɛ junman difuɛ'm be kwlaa bɔ Anannganman mannin be ngwlɛlɛ'n bɔ be waan be ´tu be klun di be junman'n i kpa'n.

³ Ninnge nga Izraɛlfuɛ'm be yi bali kɛ be `fa di Nyanmiɛn i tannin sua'n i wun junman mun'n, Moiz fa mannin junman difuɛ mun. Sanngɛ kɛ ɔ ´yo sɔ'n, wuun nglɛmun kwlaa sran'm be tɛ tu be klun be tɛ fa ninnge mun tɛ blɛ Moiz.

⁴ Yɛ be kwlaa nga be o junman'n su be di'n, be jrannin junman nin-ɔn.

⁵ Be ko toli Moiz be seli i kɛ: «Ninnge nga sran'm bé sua bali yɛ'n, ɔ ju junman nga Anannganman waan e di'n i dilɛ lele i wie ka.»

⁶ Kpɛkuun Moiz sunmannin sran kɛ be bo ndolo ngblaliɛ wunmuan'n nun se kɛ: «Nán sran fi, i yasua o, i bla o, ɔ se kɛ ɔ ´kunndɛ like fa ba kɛ be `fa di Anannganman i sua'n su junman kun.» Kɛ ɔ fin i lɛ'n, b'a fa-man like b'a ba-man kun,

⁷ yɛlɛ kɛ ninnge nga be nyɛnnin i'n, ɔ ju junman'n i dilɛ lele i wie ka bɔbɔ.

Nyanmiɛn i tannin sua'n

⁸ Junman difuɛ nga be si junman di kpa'n be yoli tannin sua'n. Be yoli tannin tanmue blu. Be fali lɛn nyanman ng'ɔ sɔ kpa'n yɛ be yoli-ɔ. Bua ndrɛ ɔkwlɛ srosrowa nin ɔkwlɛ kankankan, nin ɔkwlɛ youun flanflan nun. Be yoli anz nga be nian Nyanmiɛn i ninnge'm be su'n be nzɔliɛ tannin'm be su.

⁹ Tannin tanmue sɔ'm be kwlaa be sɛ, be tɛnndɛn nun'n ti mɛtri blu-nin-nnan, yɛ be tɛtrɛ nun'n ti mɛtri nnyɔn.

¹⁰ Be sasali tannin tanmue nnun su, i sin be sasali tanmue nnun kun su.

¹¹ Nzasa klikli'n, be yoli i tanmue kasiɛn'n i nuan su kaa kaa ble mun, yɛ be yoli nzasa nnyɔn su'n i tanmue klikli'n i nuan su kaa kaa sɔ wie.

¹² Be yoli nzasa klikli'n i tanmue kasiɛn'n i nuan su kaa ablenun. Nzasa nnyɔn su'n i nuan su kaa'n kusu ti ablenun. Nzasa nnyɔn sɔ'm bé nuan su kaa'm be wɔ su nnyɔn nnyɔn nnyɔn.

¹³ Be yoli sika ɔkwlɛ tianman tianman sɔ ablenun be bliblili be ti nin be bo'n, nan b'a kan tannin nnyɔn'm b'a bo nun. Kpɛkuun tannin sua'n sali su kunngba.

¹⁴ I sin, be yoli tanmue blu-nin-kun. Be fali boli ndrɛ yɛ be yoli-ɔ. Tanmue sɔ mun yɛ be ´fa kata Nyanmiɛn i tannin sua'n su-ɔ.

¹⁵ Tanmue blu-nin-kun sɔ'm be kwlaa be sɛ: be tɛnndɛn nun'n ti mɛtri blu-nin-nnun, yɛ be tɛtrɛ nun'n ti mɛtri nnyɔn.

¹⁶ Be dun mmua fali tanmue nnun be sasali be wiengu su, i sin be fali nsiɛn kun nga mun be sasali be wiengu su.

¹⁷ Be yoli nzasa klikli'n i tanmue kasiɛn'n i nuan su kaa kaa ablenun, yɛ be yoli nzasa nnyɔn su'n i nuan su kaa kaa ablenun wie.

¹⁸ Be yoli aaba tianman tianman sɔ ablenun, be bliblili bé ti nin be bo'n, kpɛkuun be fali nzasa nnyɔn sɔ mun be sasali su nan tannin sua'n `yo klonglo kunngba.

¹⁹ Be fali bua nene kplo bɔ be kɛnnin i ayre ɔkwlɛ'n katali tannin sua'n su, yɛ be fali kplo ng'ɔ sɔ kpa'n be fa katali kun'n su.

²⁰ Be sɛli akasia waka paplaapla mun yɛ be kplankplannin be-ɔ. Kɛ ɔ ´yo nan b'a suan Nyanmiɛn i tannin sua'n i bo'n ti-ɔ.

²¹ Waka paplaapla sɔ'm be tɛnndɛn nun'n ti mɛtri nnun, yɛ be tɛtrɛ nun'n ti santimɛtri ableso-nin-nnun.

²² Waka paplaapla'm be kwlaa be ngua lika'n be lɛ ja tianman tianman nnyɔn, be kan-man be wiengu.

²³ Be yoli waka paplaapla ablaɔn, be ti Nyanmiɛn i tannin sua'n i bue ng'ɔ kpɛ ngua lɔ'n i liɛ.

²⁴ Be kloli jɛtɛ ufue be fa yoli waka paplaapla'm be takawlɛ ablanan. Waka paplapa kun bo nnyɔn, kun bo nnyɔn.

²⁵ Tannin sua'n i bue ng'ɔ kpɛ nglo lɔ'n i waka paplaapla liɛ'm be ti ablaɔn.

²⁶ Bé bo takawlɛ'm be ti sɔ ablanan. Waka kun bo nnyɔn, kun bo nnyɔn.

²⁷ Nyanmiɛn i tannin sua'n i bue ng'ɔ kpɛ wia atɔliɛ lɔ'n, be yoli i waka paplaapla liɛ'n nsiɛn.

²⁸ Be yoli i cɔnjɔ nga'm be o i sin lɔ'm be waka paplaapla nnyɔn.

²⁹ Cɔnjɔ'm bé su waka paplaapla nnyɔn sɔ mun, bé bo lika lɔ'n ti nun kan, sanngɛ be nglo-nglo lɔ'n mantan su kpa, sika ɔkwlɛ nga kun yɛ ɔ man be mantan su-ɔ. Waka nnyɔn sɔ'm bɔ be ti wafa kunngba, be yɛ be ti sua'n i cɔnjɔ'm bé su waka mun-ɔn.

³⁰ Nyanmiɛn i tannin sua'n i bue ng'ɔ o siɛn lɔ'n i waka paplaapla'm be ti mɔcuɛ, yɛ waka sɔ'm be takawlɛ bɔ be fa jɛtɛ ufue yɛ be yoli'n, be ti blu-nin-nsiɛn. Waka kun i takawlɛ'n be ti nnyɔn, kun i takawlɛ'n be ti nnyɔn.

³¹ Be sɛli akasia waka nnun, be fa be jɛjɛli i Nyanmiɛn i tannin sua'n i bue kun su waka paplaapla'm bé su kɛ be `tra be nun.

³² Bue kun'n su lɔ'n, akasia waka nnun o lɔ. Wia atɔliɛ i bue liɛ'n su lɔ'n, akasia waka nnun kusu o lɔ.

³³ Akasia waka ng'ɔ sin afiɛn sɛsɛ'n, ɔ kpɛ waka paplaapla'm be afiɛn sɛsɛ kɛ ɔ fɛ i tannin sua'n i bue kun lɔ b'ɔ ´fa ju bue kun'n su lɔ'n.

³⁴ Be kloli sika ɔkwlɛ guali waka paplaapla nga be kplannin be'n nin nga be kpɛ kun'm be nun'n bé su. Be yoli sika ɔkwlɛ kukluuklu kɛ nga sa, be nun yɛ waka nga be fa jaja nun'n be sin-ɔn. Be kloli sika ɔkwlɛ guɛli i waka sɔ'm bé wun.

³⁵ Be yoli rido kun. Lɛn nyanman ng'ɔ sɔ kpa'n yɛ be fa yoli-ɔ. Be fali bua ndrɛ ɔkwlɛ srosrowa nin ɔkwlɛ kankankan nin ɔkwlɛ youun be flanflannin nun. Be yoli rido sɔ nun anz'm be nzɔliɛ mun.

³⁶ Be sɛli akasia waka mlomlo nnun, be kloli sika ɔkwlɛ guali bé su. Be yoli bé su sika ɔkwlɛ kpɛngbɛ mun, bé su yɛ be sendeli rido nin-ɔn. Be kloli jɛtɛ ufue be fa yoli waka mlomlo'm be takawlɛ nnan.

³⁷ Tannin sua'n i anuan nun lɛ'n, be nga be di tannin nun aba'n be yoli rido kun. Lɛn nyanman ng'ɔ sɔ kpa'n yɛ be fa yoli-ɔ. Be fa bua ndrɛ b'ɔ ti ɔkwlɛ srosrowa nin ɔkwlɛ kankankan nin ɔkwlɛ youun be flanflannin nun.

³⁸ Be sɛli akasia waka mlomlo nnun uflɛ nga be ´fa rido'n sie su'n, be yoli kpɛngbɛ nga bé su yɛ be ´sende rido'n. Be yoli blalɛ floloflolo nga be ´fa suan rido'n i bo'n, be yoli waka mlomlo'm be ti su gbagblagba mun, be kloli sika ɔkwlɛ be guali bé wun. Be kloli aaba yɛ be fa yoli waka mlomlo'm be takawlɛ nnun mun-ɔn.