Ezipt Lɔ Tulɛ'n 35 - NYANMIƐN NDƐ'N 1998

TANNIN SUA NGA ANANNGANMAN YI I WUN NGLO NUN'N I KPLANLƐ Wunmiɛn-delɛ-cɛn'n

¹ Moiz yiali Izraɛlfuɛ'm be kwlaa nan ɔ'a se be kɛ: «Like nga Anannganman waan e yo'n yɛ.

² Amun `fa cɛn ba nsiɛn fa di junman, sanngɛ cɛn ba'n i nso su'n liɛ'n, ɔ ti Nyanmiɛn cɛn klonglo, be `de wunmiɛn. Sran kwlaa ng'ɔ di junman cɛn sɔ'n nun'n, man be kun i.

³ Nán amun trɔ sin awlo wie fi nun wunmiɛn-delɛ-cɛn'n nun.»

Izraɛlfuɛ'm be ninnge nga be fa man Anannganman'n be yilɛ

⁴ Moiz kan kleli Izraɛlfuɛ'm be kwlaa kɛ:

⁵ «Amun `yi like man Anannganman. Sran kwlaa ng'ɔ ti klun-ufuefuɛ'n, ɔ `yi like wafa-wafa nga be o yɛ mun `man Anannganman: sika ɔkwlɛ, jɛtɛ ufue, aaba,

⁶ bua ndrɛ ng'ɔ ti ɔkwlɛ srosrowa nin ɔkwlɛ kankankan nin ɔkwlɛ youun'n, lɛn nyanman kanngan plili, boli ndrɛ,

⁷ bua nene'm bé kplo nga be kan be ayre ɔkwlɛ'n, ɔ nin kplo b'ɔ sɔ kpa, akasia waka,

⁸ kannin'm be ngo, waka bue nzue fanninfannin nga be fa guɛ i bé ti su gualɛ ngo nin ansans nga be yrɛ i'n be nun'n,

⁹ oniks yɛbuɛ nin yɛbuɛ kpakpa uflɛ nga be fa siesie i efɔd nin pata kaan'n bé su'n.

¹⁰ Man amun nun sran nga bé sa si ngwlɛlɛ kpa'n be bla be wa yo like nga Anannganman waan be yo be yɛ mun:

¹¹ Nyanmiɛn i tannin sua'n, nin i su katalɛ like'n, i ase tratralɛ ninnge mun nin i kadri mun, i nun jajalɛ waka mun, i ja'm be takawlɛ mun,

¹² Nyanmiɛn alaka'n nin i waka floloflolo mun nin i su tre'n, rido nga be fa kpɛ Nyanmiɛn alaka'n i nyrun'n,

¹³ tabli'n nin i waka floloflolo mun nin i wun ninnge mun, ɔ nin kpaun nga be fa man Nyanmiɛn'n,

¹⁴ like bɔ be fa kannin'm be takataka su'n nin i wun ninnge mun, kannin mun, ngo nga be fa sɔ kannin'm bé nuan'n,

¹⁵ ansans yrawlɛ'n nin i waka floloflolo mun, ngo nga be fa gua bé ti su'n, ansans nga be yrɛ i'n, Nyanmiɛn tannin sua'n i anuan nun rido'n,

¹⁶ Nyanmiɛn sɔwlɛ'n nin i griazi nga be fa aaba yoli'n, ɔ nin i waka floloflolo mun, be wun fiɛn kplolɛ kpongbo dan'n nin i takawlɛ'n, awa'n i ja mun,

¹⁷ tannin tanmue dandan nga be sin yia awlo klun'n, ɔ nin awa'n i ja mun, ɔ nin awa'n i ja'm be takawlɛ mun, ɔ nin awa'n i anuan'n nun rido'n,

¹⁸ ɔ nin Nyanmiɛn tannin sua'n i kpɛngbɛ mun, yɛ awlo klun'n i wun siwlɛ'n i kpɛngbɛ mun nin be nyanman mun,

¹⁹ tralɛ nga be ti wafa ngunmin bɔ be fa di Nyanmiɛn i sua'n nun junman'n, Nyanmiɛn nyrun jranfuɛ Aarɔn i tralɛ mun, i mma nga be jran Nyanmiɛn nyrun wie'n be tralɛ mun. »

²⁰ Izraɛlfuɛ'm be kwlaa be yacili Moiz lɛ, be cuɛnnin bé wun kan.

²¹ I sin, be nga be ti klun-ufuefuɛ'm be kwlaa be tuli be klun be bali. Ninnge nga be fa man Anannganman'n be fa be blɛli i kɛ be fa wie di tannin sua'n i wun junman mun, nan be fa wie kusu di junman nga be o lɛ'n be kwlaa, yɛ be fa wie kpa Nyanmiɛn nyrun jranfuɛ'm be tralɛ.

²² Be kwlaa nga be klun ti ufue'n be bali: i bla o, i yasua o. Be fali ninnge nga be o yɛ mun bali: asunmanndi mun, nga wie mun, be sama ti nga mun, be sa kɔmin nun nga mun, ɔ nin ninnge wafa-wafa kwlaa nga be fa sika ɔkwlɛ yoli'n mun. Be ninnge nga be sieli be kɛ be ´fa man Anannganman'n, be kwlaa be fa be bali.

²³ Be kwlaa nga be lɛ bua ndrɛ b'ɔ ti ɔkwlɛ srosrowa, annzɛ ɔkwlɛ kankankan'n, annzɛ ɔkwlɛ youun'n, ɔ nin be bɔ be lɛ lɛn nyanman kanngan plili'n, nin boli ndrɛ'n, nin bua nene kplo nga be kɛn i ayre ɔkwlɛ'n, annzɛ nnɛn uflɛ kplo b'ɔ sɔ kpa'n, be fa be bali.

²⁴ Be nga be fali jɛtɛ ufue annzɛ aaba be sieli kɛ ɔ ti Anannganman liɛ'n, be fa bali. Be nga be lɛ akasia waka nga be kwla fa di junman'n, be fa bali.

²⁵ Bla nga be sa si ngwlɛlɛ'n, be toli lɛn nyanman plili'n kɛ be fa to jese'n sa be fa bali. Yɛ be toli bua ndrɛ ɔkwlɛ srosrowa nin ɔkwlɛ kankankan, ɔ nin ɔkwlɛ youun, be fa bali ekun.

²⁶ Bla wie'm be kusu bɔ be sa si ngwlɛlɛ ekun'n, be toli boli ndrɛ kɛ be fa to jese'n sa, be fa bali.

²⁷ Nvle'n nun kpɛnngbɛn'm be fali oniks yɛbuɛ nin yɛbuɛ nga be fa sie efɔd nin pata kaan'n bé su'n be bali,

²⁸ ɔ nin parfɛn ng'ɔ bɔn fannin'n, ɔ nin ngo nga be fa gua kannin'm be nun'n, ɔ nin ayre nga be fa gua be ti su gualɛ ngo nun'n, yɛ nga be fa gua ansans bɔ be yrɛ i'n nun'n.

²⁹ Izraɛlfuɛ kwlaa nga be klun ti ufue'n, bla o, yasua o, be tuli be klun be fali be klun klo ninnge mun be blɛli Anannganman kɛ be `fa di junman nga Anannganman seli Moiz kɛ ɔ `di'n.

Ajuin difuɛ'm be kpalɛ

³⁰ Moiz seli Izraɛlfuɛ'm be kɛ: «Amun `nian, Anannganman kpali Bɛzaleɛl, b'ɔ fin Zida akpasua'n su'n, Iri i wa-a, yɛ ɔ ti Ir i anunman.

³¹ Ɔ fɛli i wawɛ'n mɛnnin i kɛ wawɛ'n sɔ'n `sie i, yɛ ɔ `mɛn i akunndan nin ngwlɛlɛ nin sa silɛ, kɛ ɔ `si junman wafa'n kwlaa di.

³² Ɔ mɛnnin i ngwlɛlɛ kɛ ɔ `si ninnge nga be wa klekle be yɛ'n be yo: junman'm be jajalɛ, sika ɔkwlɛ nin jɛtɛ ufue nin aaba'm bé su junman dilɛ,

³³ yɛbuɛ kpakpa'm be sɛlɛ nin be wlawlalɛ, ɔ nin waka sɛlɛ. E `kpɛ kpo e `se kɛ ɔ si junman wafa-wafa kwlaa di.

³⁴ Anannganman fali Ɔɔliab b'ɔ ti Aizamak i wa'n, b'ɔ fin Dan akpasua liɛ'n su'n ukɛli i su. Ɔ mannin be nnyɔn sɔ'n be sran like klelɛ'n i cɛlɛ.

³⁵ Ɔ mannin be ninnge wafa-wafa'm be yolɛ i wun cɛlɛ kɛ be `fa di junman kwlaa. Junman sɔ'm be wie yɛ: yɛbuɛ kpakpa'm be sɛlɛ, ninnge uflɛ wie'm be sɛlɛ, tannin ɔkwlɛ srosrowa nin ɔkwlɛ kankankan, ɔ nin ɔkwlɛ youun, yɛ lɛn nyanman kanngan plili'n be wulɛ nin be nun klɛklɛlɛ. Ɔ mannin be ngwlɛlɛ kɛ be fa di junman wafa-wafa'm be kwlaa, nan be bɔbɔ be `kwla kpɛ bé ti nun like be yo.»