Ezipt Lɔ Tulɛ'n 33 - NYANMIƐN NDƐ'N 1998

Nyanmiɛn seli Moiz kɛ be `tu bé bo

¹ Anannganman seli Moiz kɛ: «A nin Izraɛlfuɛ'm bɔ a fali be Ezipt lɔ bali'n, amun `jaso lika nga nun wa, nan amun `wɔ mɛn nga n tali nda kleli Abraam nin Izaak, nin Zakɔb kɛ n ´fa man be osu nunfuɛ mun'n, i nun.

² N ´sunman min anz'n ɔ ´dun mmua amun nyrun, yɛ n ´fuan Kanaanfuɛ mun, nin Ɛtfuɛ mun, nin Ferezfuɛ mun, nin Zɛbisfuɛ mun, ɔ nin Evfuɛ mun.

³ N ´fa amun n ´kɔ mɛn bɔ lɔ asiɛ'n yo like ye kpa'n, bɔ i kunngba'n ti nnɛn tawlɛ klanman'n i nun lɔ. Sanngɛ m bɔbɔ e nin amun e su kɔ-man, n su tran-man amun afiɛn, afin amún nyin su ti kekle dan. Ɔ cɛ-man nan m'an nunnun amun atin afiɛn.»

⁴ Kɛ sran'm be tili nyrɛnnɛn ndɛ sɔ'n, be yoli kɛ sɛnvuɛ mun sa. Awlaboɛ'n kunnin be kpo. Sran fi ɔ'a kwla wlɛ-mɛn i blɛ dilɛ ninnge mun kun.

⁵ Anannganman seli Moiz kɛ: «Kan kle Izraɛlfuɛ'm be kɛ: ‹Amun ti sran bɔ amun nyin su ti kekle. Sɛ e nin amun e kɔ kaan sa-a, n ´wie amun nunnun. Amun `yiyi amun blɛ dilɛ ninnge mun nan m'an wun nga n ´fa yo amun'n.› »

⁶ Kɛ Izraɛlfuɛ'm be jasoli Orɛb oka'n wun lɛ bɔ be ´kɔ'n, be yiyili be wun blɛ dilɛ ninnge mun.

Tannin sua nga Nyanmiɛn yi i wun nglo nun'n

⁷ Kɛ be yoli ngblaliɛ'n, Moiz fali Nyanmiɛn i tannin sua'n nan ɔ'a ko kplɛn i klɔ'n sin mmua lɔ kan. Be flɛ i kɛ tannin sua nga Nyanmiɛn yi i wun nglo nun'n. Sran kwlaa nga i waan ɔ ´si Anannganman i klun sa'n, ɔ jaso ngblaliɛ'n nun lɔ kɔ tannin sua sɔ'n i wun lɔ.

⁸ Yɛ kɛ Moiz ´kɔ i liɛ'n, sran'm be kwlaa be jaso, be jranjran bé tannin sua kunngun'm be anuan'm be nun yɛ be niɛn i-ɔ. Be niɛn i lele san ɔ ´wlu tannin sua'n nun.

⁹ Blɛ bɔ Moiz ko wlu tannin sua'n nun'n, wɛnsrɛn tianman kun fɛ i nglo lɔ wa jran tannin sua'n i anuan'n nun. Kpɛkuun Anannganman nin Moiz be su koko yalɛ.

¹⁰ Kɛ Izraɛlfuɛ'm be wun wɛnsrɛn'n, anyinyiɛ'n ti be kwlaa be kan be wun ase lele asiɛ wun be bɔbɔ bé tannin sua'm bé wun lɛ.

¹¹ Moiz o sa, Anannganman o sa, yɛ be ijɔ kɛ sran kun nin i janvuɛ be su koko yalɛ sa. I sin kpɛkuun Moiz su sɛ i sin ngblaliɛ'n nun lɔ. Sanngɛ Nɛn i wa Zozie b'ɔ ti gbanflɛn kan'n, b'ɔ ti Moiz i sufuɛ'n, ɔ tu-mɛn i bo tannin sua'n nun lɔ.

Nyanmiɛn nin Moiz be yalɛ kokolɛ ndɛ

¹² Moiz seli Anannganman kɛ: «Anannganman, a seli min kɛ n dun mmua sran nga'm be nyrun, sanngɛ w'a kle-man min sran nga a ´sunmɛn i b'ɔ ´uka min'n. I kusu a seli min kɛ a si min dunman'n, yɛ a ´yo min ye.

¹³ Sɛ ɔ ti sɔ'n, wuun yi wɔ akunndan'm be nglo kle min. I sɔ nun yɛ n ´si wɔ yɛ n ´nyan ye ɔ́ sa nun-ɔn. Nian, nvle nga nunfuɛ'm be ti ɔ sran mun.»

¹⁴ Anannganman tɛli i su kɛ: «M bɔbɔ e nin wɔ e ´nanti yɛ n ´yo man a ´de wunmiɛn.»

¹⁵ Yɛ Moiz waan: «Sɛ ɔ bɔbɔ a nin e su kɔ-man'n, nán se e kɛ e `tu e bo wa.

¹⁶ ?Ɔ ´yo sɛ nan sran'm b'a si kɛ a su yo min nin min nvlefuɛ mun e ye? ?Nán kɛ a nin ye ´nanti bɔ ngbaciɛ tran min nin min nvle'n e nin nvle kun nga mun ye afiɛn nin-ɔn?»

¹⁷ Anannganman seli Moiz kɛ: «Like nga a srɛli'n, n ´yo i su sɛsɛ yɛlɛ kɛ n waan n ´yo wɔ ye, yɛ n si wɔ dunman'n.»

¹⁸ Yɛ Moiz waan: «N ´srɛ wɔ kpa ti-ɔ, yi ɔ wun nglo kle min.»

¹⁹ Anannganman tɛli i su kɛ: «N ´sin ɔ nyrun lɛ, n ´yi min aklunye'n i nglo n ´kle wɔ, yɛ m ´bo min dunman'n kɛ: Anannganman, Sran nga n waan n ´yo i ye'n, n ´yo i ye. Sran nga n waan n ´si i aunnvuɛ'n, n ´si i aunnvuɛ .»

²⁰ Kpɛkuun Anannganman kan guali su kɛ: «Sanngɛ a su kwla wun-man min nyrun fuɛ'n, afin sɛ klɔ sran kun sa wun min nyrun'n, ɔ su kwla tran-man nguan nun kun.»

²¹ Anannganman seli i ekun kɛ: «Nian, lika kun yɛ ɔ o mín wun koko wa yɛ, jran yɛbuɛ'n su lɛ.

²² Kɛ bɔ n ´sin bɔ n ´yi min dunman dan'n i nglo'n, n ´fa wɔ n ´fia yɛbuɛ'n i buɛ'n nun, n ´fa mín sa n ´kata ɔ́ su lele san n ´wie sin.

²³ I sin n ´yi mín sa'n, kpɛkuun a ´kwla wun min kɔminsin fuɛ'n, sanngɛ a su kwla wun-man min nyrun'n.»