Ezipt Lɔ Tulɛ'n 31 - NYANMIƐN NDƐ'N 1998

Tannin sua nga Anannganman yi i wun nglo nun'n i nun junman difuɛ mun

¹ Anannganman seli Moiz kɛ:

² «Nian, n kpali Bɛzaleɛl b'ɔ ti Iri i wa'n nin Ir i anunman'n. Ɔ fin Zida akpasua'n su'n.

³ N fali min wawɛ'n m mɛnnin i kɛ ɔ `sie i yɛ ɔ `mɛn i akunndan nin ngwlɛlɛ, ɔ nin sa silɛ kɛ ɔ `si junman wafa-wafa kwlaa di.

⁴ Ɔ si like nga be o yɛ'm be yo: ninnge'm be yilɛ, sika ɔkwlɛ nin jɛtɛ ufue nin aaba'm bé su ajuin dilɛ,

⁵ yɛbuɛ kpakpa'm be sɛlɛ, nin be like nun fa wlalɛ, waka sɛlɛ, ɔ nin junman wafa-wafa'm be kwlaa be dilɛ.

⁶ Ɔɔliab b'ɔ ti Aizamak i wa'n, b'ɔ ti Dan akpasua'n sufuɛ'n, n fɛli i ukɛli i su. Yɛ amun ajuin difuɛ'm be kwlaa nga be si like yo'n, min bɔbɔ yɛ m mannin be i sɔ ngwlɛlɛ nin-ɔn, kɛ ɔ ´yo nan b'a kwla yo i kwlaa nga n seli wɔ kɛ a yo'n ti.

⁷ Like nga min waan a `se be man be yo'n be yɛ: tannin sua, nin min alaka'n nin i su tre'n, ɔ nin tannin sua'n i nun ninnge'm be kwlaa,

⁸ tabli'n, ɔ nin i su ninnge'm be ngba, kannin'm be siewlɛ bɔ sika ɔkwlɛ jrɛiin yɛ be ´fa yoli'n, ɔ nin i wun ninnge'm be kwlaa, min sɔwlɛ nga be ´yra ansans su'n,

⁹ min sɔwlɛ nga be ´yra nnɛn nin ble annzɛ like ng'ɔ ti kɛ ble sa'n be su'n, ɔ nin i wun ninnge mun, kpongbo dan'n nin i takawlɛ'n,

¹⁰ ɔ nin tralɛ nga be ti wafa ngunmin bɔ be ´fa di min sua nun junman'n, ɔ nin min nyrun jranfuɛ Aarɔn nin i mma'm be tralɛ nga be ´wla fa di min junman'n,

¹¹ ɔ nin ngo nga be ´fa gua sran'm bé ti su'n nin ninnge'm be su'n, ɔ nin min tannin sua'n nun lɔ parfɛn b'ɔ bɔn fannin'n. Man be nian nga n seli kɛ a `yo'n su be yo.»

Wunmiɛn-delɛ-cɛn'n

¹² Anannganman seli Moiz kɛ:

¹³ «Kan kle Izraɛlfuɛ'm be kɛ yoo: Amun `bu wunmiɛn-delɛ-cɛn i akunndan nan amun `nian su. Afin blɛ kwlaa nun'n, wunmiɛn-delɛ-cɛn sɔ'n yɛ ɔ wa yo aenguɛ nga e nin amun nin amun osu'n nunfuɛ mun e trali'n i nzɔliɛ-ɔ. I sɔ nun'n sran'm be ´si kɛ min Anannganman yɛ n fali amun kɛ amun `yo min nvle-ɔ.

¹⁴ Amun `bu wunmiɛn-delɛ-cɛn'n i akunndan nan amun `nian su, afin ɔ ti min liɛ klonglo. Sran ng'ɔ di-man wunmiɛn-delɛ-cɛn su'n, man be kun i. Sran kwlaa ng'ɔ di junman cɛn sɔ'n nun'n, man be fuɛn i i nvlefuɛ'm be afiɛn, kpɛkuun be `kun i.

¹⁵ Man be fa cɛn ba nsiɛn be di junman, sanngɛ cɛn ba'n i nso su fuɛ'n, ɔ ti wunmiɛn-delɛ-cɛn. Ɔ ti min cɛn klonglo. Sran kwlaa ng'ɔ di junman cɛn sɔ nun'n, man be kun i.

¹⁶ Man Izraɛlfuɛ'm be bu wunmiɛn-delɛ-cɛn'n i akunndan nan be `nian su. Blɛ kwlaa nun'n man be nin be osu'n nunfuɛ'm be si kɛ wunmiɛn-delɛ-cɛn sɔ'n ti aenguɛ nga e nin be e tra'n i su like, ɔ ´ka lɛ tititi.

¹⁷ Ɔ ti nzɔliɛ kun b'ɔ o e nin Izraɛlfuɛ mun ye afiɛn b'ɔ ´tran lɛ tititi. Afin min Anannganman, n fali cɛn ba nsiɛn yɛ n fa yili nglo'n nin asiɛ nin-ɔn, sanngɛ i cɛn ba nso'n su n jrannin min junman'n, yɛ n deli wunmiɛn.»

Yɛbuɛ Paplaapla nnyɔn'n nin Nyanmiɛn i mmla mun

¹⁸ Blɛ bɔ Anannganman kannin ndɛ kleli Moiz Sinai oka'n su lɔ wieli'n, ɔ mɛnnin i yɛbuɛ paplaapla nnyɔn, bé su yɛ Nyanmiɛn bɔbɔ fɛli i sama klɛli i mmla mun nin-ɔn.