Ezipt Lɔ Tulɛ'n 30 - NYANMIƐN NDƐ'N 1998

Ansans yrawlɛ

¹ «Man be yo min sɔwlɛ kun bɔ be ´yra ansans su. Man be fa akasia waka yɛ be `fa yo-ɔ.

² Man i tɛnndɛn nun'n nin i tɛtrɛ nun'n be `sɛ, man kun yo santimɛtri ablenun, kun yo santimɛtri ablenun, yɛ man i nglo-nglo su'n yo mɛtri kun. Man be yo i cɔnjɔ'm be su like kɛ nnɛn wɛ sa. Man nnɛn wɛ sɔ'm be nin i sa su kunngba.

³ Man be fa sika ɔkwlɛ jrɛiin'n, be klo i. Man be fa kata min sɔwlɛ'n su, i nglo lɔ o, i sin i sin'n be su o, nnɛn wɛ'm be su o. Man be ci i nuan'n su sika ɔkwlɛ tɛɛn `sin yia nun.

⁴ Man be fa sika ɔkwlɛ jrɛiin, be fa yo nga kukluuklu mun, nan be fa wla min sɔwlɛ'n i nuan ciwlɛ'n i bo. Be `wlɛ i bue kun su nnyɔn, i bue kun su nnyɔn. I sa sɔ'm be nun yɛ be ´wla waka floloflolo nga be ´fa sua nin-ɔn.

⁵ Man be fa akasia yɛ be `sɛ waka floloflolo mun-ɔn. Be `sɛ nnyɔn nan be klo sika ɔkwlɛ gua bé wun.

⁶ Man be sie min sɔwlɛ sɔ'n rido ng'ɔ kpɛ min alaka'n i nyrun'n i nyrun lɛ, be `sie i alaka'n i su tre nga be fa kata su'n i nyrun lɛ kan e nin wɔ e ´yia lɛ'n.

⁷ Man Aarɔn yra ansans b'ɔ bɔn fannin'n i su. Man ɔ yrɛ i sɔ nglɛmun kwlakwla blɛ b'ɔ wa nunnun kannin'm be nun'n .

⁸ Ɔ `yrɛ i nnɔsua kwlakwla blɛ b'ɔ wa sɔ kannin'm bé nuan'n. Nán be yaci ansans sɔ i yralɛ le, ɔ ti min manmanlɛ like.

⁹ Nán be fa ansans uflɛ b'ɔ ti-man min liɛ'n be yrɛ i su. Nán be yi tɛ nga be yra be nnɛn'n kɔlikɔli'n i su. Nán be fa ble annzɛ like ng'ɔ ti kɛ ble sa'n be yi sraka su. Nán be gua nzan bɔ be fa man'n i ase min sɔwlɛ nga fuɛ'n su.

¹⁰ Afuɛ nuan kun nun'n, man Aarɔn yo min sɔwlɛ'n i saun kpalɛ kun. I ti nnɛn nga be kun i'n i mmoja'n bɔ man be nyan sa tɛ i yaci cɛlɛ'n, ɔ fa wasa min sɔwlɛ'n i wɛ'm be su. Afuɛ nuan kwlakwla'n, man amun osu nunfuɛ'm be yo i sɔ tititi. Min sɔwlɛ nga, be ´sie i ngunmin'n, ɔ ti min liɛ klonglo.»

Tannin sua nga Anannganman yi i wun nglo nun'n i su lapo'n

¹¹ Anannganman seli Moiz ekun kɛ:

¹² «Blɛ bɔ a ´ka Izraɛlfuɛ mun bɔ a ´klɛ be dunman'n, man sran kun fɛ i nguan'n i ti tolɛ like man min. Kɛ ɔ yo sɔ'n liɛ'n, sran'm be kalɛ'n nun'n, nyrɛnnɛn sa fi su tɔ-man amun su.

¹³ Like ng'ɔ fata kɛ be nga be ´tran sran nga be ´ka be'n be nun'n be yi'n yɛ: sran kun ´yi jɛtɛ ufue gram nnun. Be `nian min tannin sua'n nun lɔ sika'n i sunnzunliɛ'n su yɛ be `sunnzun-ɔn. Be `bu lɔ sunnzunliɛ nun sɛsɛ yɛ be `fa-a .

¹⁴ Sran kwlakwla ng'ɔ o dunman klɛlɛ sɔ'n nun wie'n, kɛ ɔ fɛ i be nga be lɛ afuɛ ablaɔn'n su b'ɔ ´fa ju be nga be tra afuɛ ablaɔn'n bé su'n, man ɔ yi i sɔ sika liɛ'n man min.

¹⁵ Anyanbeunfuɛ'm be liɛ nga be ´yi'n, nán man ɔ tra nga n kleli'n su, yalɛfuɛ'n kusu i liɛ ng'ɔ ´yi'n, nán man gram nnun'n i su kpɛ. Man sran kun yi nga n kleli'n su sɛsɛ kɛ ɔ ´yo nan m'an yaci i nguan nun'n ti.

¹⁶ Blɛ bɔ ɔ́ sa ko kan Izraɛlfuɛ'm bé sa nuan sika bɔ be ´fa to be nguan'n i ti'n, fa di min tannin sua'n i nun junman. I sɔ'n nun mín wla wa kpɛn Izraɛlfuɛ'm bé su, yɛ n ´sasa be nguan'n.»

Kpongbo nga be gua nun nzue be kplo fiɛn'n

¹⁷ Anannganman seli Moiz ekun kɛ:

¹⁸ «Man be yo aaba kpongbo kun bɔ i takawlɛ'n ti aaba. I nun yɛ be ´kplo fiɛn'n nin-ɔn. Man be sie i tannin sua'n nin min sɔwlɛ'n be afiɛn'n nun, yɛ man be gua nun nzue.

¹⁹ Nzue sɔ'n yɛ Aarɔn nin i mma'm be ´fa wunnzin bé sa nin bé ja mun-ɔn.

²⁰ Be `yo i sɔ kwlaa nan b'a wlu tannin sua'n nun, annzɛ kwlaa nan b'a mantan min sɔwlɛ'n kɛ be ´yi tɛ be ´man min'n. Kɛ ɔ yo sɔ'n, i liɛ be su wu-man.

²¹ Ɔ fata kɛ be wunnzin bé sa nin bé ja mun nan b'a wu-man. Mmla sɔ'n ´ka lɛ tititi, ɔ ti be nin bé osu'n nunfuɛ'm be liɛ.»

Nyanmiɛn i ngo'n

²² Anannganman seli Moiz ekun kɛ:

²³ «Fa parfɛn nga be ti kpakpa mun: mir kilo nnun, sinamɔm b'ɔ bɔn fannin'n i kilo nnyɔn nin sin, kanɛl b'ɔ bɔn fannin'n i kilo nnyɔn nin sin,

²⁴ kas kilo nnun. Man be sunnzun be min sua'n nun lɔ like'm be sunnzunliɛ'n nun. Fa olivie ngo litri nsiɛn.

²⁵ Sran ng'ɔ ti parfɛn yifuɛ'n, man ɔ fa parfɛn sɔ mun nin olivie ngo sanngan-sanngan nun, nan ɔ `yo ngo nga kɛ be ´fa sran annzɛ like be wlɛ min sa nun'n be fa guɛ i ti su'n annzɛ be fa gua su'n.

²⁶ Fa guɛguɛ i tannin sua'n su, ɔ nin min alaka'n su.

²⁷ Guagua wie min tabli nin i wun ninnge'm be kwlakwla bé su. Guagua wie kannin'm be siewlɛ nin i wun ninnge'm be kwlaa bé su, guagua wie ansans yrawlɛ'n su.

²⁸ Guagua wie min sɔwlɛ nin i wun ninnge'm be kwlaa bé su. Guagua wie kpongbo dan'n nin i takawlɛ'n bé su.

²⁹ Blɛ bɔ a ko gua bé su ngo ko wie'n, be ´yo min liɛ klonglo, ɔ man like kwlaa annzɛ sran kwlaa ng'ɔ kan be'n, ɔ ´fɛ i su afɛ'n.

³⁰ Fa ngo kunngba sɔ'n wie gua Aarɔn nin i mma'm bé su, sie be ngunmin kɛ ɔ ´yo nan b'a kwla yo min nyrun jranfuɛ'n ti.

³¹ Kɛ ɔ ko yo sɔ'n, kan kle Izraɛlfuɛ mun kɛ: ‹Nyanmiɛn i ngo nga kɛ be ´fa sran kun annzɛ like kun be wla Nyanmiɛn sa nun'n, be fa guɛ i ti'n su'n annzɛ be fa gua su'n yɛ ɔ o yɛ. Man Anannganman i junman'n i ngunmin cɛ yɛ be fa di-ɔ.

³² Nán sran kun sa fa kpakpa i wunnɛn'n su, yɛ nán sran fi nian su nan ɔ sɛnngɛn i liɛ kɛ nga sa. Ɔ ti min liɛ klonglo, yɛ man amún si kɛ ɔ ti like dan, afin min liɛ-ɔ.

³³ Sɛ sran kun nian ngo nga su sɛnngɛn i liɛ'n nan ɔ fa gua sran ngbɛn wie su'n, be `kɛn i bo i nvlefuɛ'm be afiɛn.› »

Ansans b'ɔ ti Nyanmiɛn liɛ klonglo'n i yilɛ

³⁴ Anannganman seli Moiz ekun kɛ: «Fa waka nzue bɔ be bɔn fannin bɔ be o yɛ mun: storaks, oniks, ɔ nin galbanɔm. Gua be nun ansans kpakpa man ɔ nin like klikli liɛ sɔ mun sɛ sɛsɛsɛ.

³⁵ Sran ng'ɔ ti ansans yifuɛ'n, man ɔ fa njin gua nun, nan ansans sɔ'n `yo ansans kun b'ɔ ti jrɛiin, b'ɔ ti min liɛ klonglo.

³⁶ Man be yo wie sanmlɛn nan be fa sanndi min alaka'n nyrun tannin sua'n nun lɛ kan e nin wɔ e ´yia lɛ'n. Man ayre sɔ'n yo amun nyrun like kun b'ɔ ti saun kpa.

³⁷ Nán sran kun nian ansans nga su yo i liɛ kɛ ɔ `guagua. Ɔ ti like kun b'ɔ ti min Anannganman min liɛ klonglo, min ngunmin min liɛ-ɔ.

³⁸ Sɛ sran kun nian ansans nga su yo i wunsu kɛ nga sa'n, nan ɔ fa fuɛnfuɛn i bue'n, man be kɛn i bo i nvlefuɛ'm be afiɛn.»