Ezipt Lɔ Tulɛ'n 3 - NYANMIƐN NDƐ'N 1998

¹ Moiz kɛnkɛn i sia Zetro b'ɔ ti Madian lɔ sraka yifuɛ'n i bua mun nin i boli mun. Cɛn kun ɔ kankannin nnɛn mun ɔli aawlɛ flɛnnɛn'n i sin lɔ, kpɛkuun ɔ ɔli Nyanmiɛn i oka nga be flɛ i Orɛb'n su lɔ.

² Anannganman i anz'n yili i wun nglo kleli i lɛ kɛ sin taaman sa susrɛ kun i afiɛn. Moiz ´nian susrɛ nin-ɔn, sin taaman o nun, sanngɛ susrɛ sɔ'n yra-man bɔ kaan sa.

³ Moiz waan: «N wa kpɛ min nyin nan n ´nian abonuan sa nga, yɛ n ´wun sa nga ti bɔ susrɛ'n yra-man'n.»

⁴ Kɛ Anannganman wunnin kɛ ɔ su kpɛ i wun nan ɔ ´nian'n, kpɛkuun ɔ o susrɛ'n nun lɔ ɔ'a flɛ i, i waan: «Moiz! Moiz!» Moiz tɛli i su kɛ: «Nannan!»

⁵ Anannganman seli i kɛ: «Nán mantan susrɛ'n wa. Yi ɔ ja ngbabua'n, afin lika nga a o nun yɛ'n ti min Nyanmiɛn min lika.

⁶ N ti ɔ si i Nyanmiɛn, n ti Abraam, nin Izaak, nin Zakɔb be Nyanmiɛn.» Moiz kɛtɛli i nyrun, afin ɔ kwla nian-man Nyanmiɛn srɛ b'ɔ kun i'n ti.

⁷ Anannganman seli i ekun kɛ: «N wunnin min sran nga be o Ezipt lɔ'n be nyrɛnnɛn nga be fa kle be'n. Kɛ be kle be nyrɛnnɛn'n, kpanlɛ nga be kpannin'n, n tili. N si afɛ ng'ɔ o be su'n.

⁸ M'an jra kɛ n wa de be Eziptfuɛ'm bé sa nun nan n ´fa be Ezipt mɛn'n nun n ´kɔ mɛn klanman b'ɔ ti tɛtrɛ kpa'n nun lɔ. Lɔ asiɛ'n yo like ye kpa, i kunngba'n ɔ ti nnɛn tawlɛ klanman. Be nga be tran mɛn sɔ nun'n be yɛ: Kanaanfuɛ mun, Ɛtfuɛ mun, Amɔrfuɛ mun, Ferezfuɛ mun, Evfuɛ mun, ɔ nin Zɛbisfuɛ mun.

⁹ N tili Izraɛlfuɛ'm be kpanlɛ'n b'ɔ toli min wa'n, kpɛkuun n wunnin wafa nga Eziptfuɛ'm be fa yo be tɛtɛ'n.

¹⁰ Siɛn'n, n ´sunman wɔ Ezipt famiɛn'n i wun lɔ. Ko fa Izraɛlfuɛ'm bɔ be ti min sran mun, man be tu Ezipt mɛn'n nun lɔ .»

Nyanmiɛn i dunman ng'ɔ bo kleli Moiz'n i ndɛ

¹¹ Moiz seli Nyanmiɛn kɛ: «?Wan yɛlɛ min bɔ n wɔ n ko to Ezipt famiɛn'n lɔ nan n `yo man Izraɛlfuɛ'm be tu Ezipt lɔ-ɔ?»

¹² Nyanmiɛn tɛli i su kɛ: «N jin ɔ́ sin, yɛ nian, nzɔliɛ b'ɔ kle kɛ min yɛ n sunman wɔ'n yɛ. Kɛ a ko fa Izraɛlfuɛ mun ko fite'n, amun wa su min oka nga su.»

¹³ Sanngɛ Moiz seli Nyanmiɛn kɛ: «Kɛ n wa ko to Izraɛlfuɛ'm be lɔ bɔ n ´se kɛ: ‹Amun nannan'm be Nyanmiɛn'n yɛ ɔ sunmannin min amún sin'n,› be wa usa min kɛ: ‹?Yɛ be flɛ i sɛ?› ?N ´tɛ be su sɛ?»

¹⁴ Nyanmiɛn waan: «Min ti Nyanmiɛn bɔ n wo lɛ titi'n. Ndɛ nga a wa kan kle Izraɛlfuɛ mun'n yɛ: ‹Nyanmiɛn b'ɔ wo lɛ titi'n sunmannin min amún sin.› »

¹⁵ I sin Nyanmiɛn kan guali su kɛ: «Kan kle Izraɛlfuɛ mun kɛ: ‹Anannganman b'ɔ ti amun nannan'm be Nyanmiɛn'n, Abraam, nin Izaak, nin Zakɔb be Nyanmiɛn'n yɛ ɔ sunmannin min amún sin-ɔn.› Min dunman ng'ɔ o lɛ titi'n yɛ ɔ o lɛ-ɔ, dunman nga yɛ blɛ'n kwlaa nun sran'm be ´fa flɛ min-ɔn.

¹⁶ Siɛn'n, kɔ ko yia Izraɛl kpɛnngbɛn mun nan se be kɛ: ‹Anannganman b'ɔ ti amun nannan'm be Nyanmiɛn'n, Abraam nin Izaak, nin Zakɔb be Nyanmiɛn'n yili i wun nglo kleli min. Ɔ seli min kɛ ɔ buli afɛ nga amun o nun'n i akunndan, yɛ ɔ wunnin sa nga be fa yo amun Ezipt mɛn'n nun'n.

¹⁷ I sɔ'n ti, i waan ɔ ´de amun Eziptfuɛ sɔ'm bɔ be kle amun nyrɛnnɛn'n bé sa nun, nan ɔ ´fa amun kɔ Kanaanfuɛ mun, nin Ɛtfuɛ mun, nin Amɔrfuɛ mun, nin Ferezfuɛ mun, nin Evfuɛ mun, ɔ nin Zɛbisfuɛ'm be mɛn liɛ'n nun lɔ. Lɔ asiɛ'n yo like ye kpa, i kunngba'n ɔ ti nnɛn tawlɛ klanman.›

¹⁸ Izraɛlfuɛ'm be ´fa ɔ nuan ndɛ'n su. Kɛ ɔ ko yo sɔ'n, a nin be kpɛnngbɛn mun, amun ko to Ezipt famiɛn'n. Amun `se i kɛ: ‹Anannganman, Ebre'm be Nyanmiɛn'n, e Nyanmiɛn'n, ɔ yili i wun nglo kleli ye. Man e atin nan e `fa cɛn nsan e `nanti e `wɔ aawlɛ flɛnnɛn'n nun lɔ, e `ko yi tɛ e man e Nyanmiɛn'n.›

¹⁹ N si kɛ Ezipt famiɛn'n su man-man amun atin kɛ amun wɔ. San be ´miɛn i fii kpa.

²⁰ I ti'n, m ´ba yasua su Eziptfuɛ'm be afiɛn, kpɛkuun n ´fa abonuan sa nga n ´yo be'n n ´fa kle be nyrɛnnɛn. I sin famiɛn'n ´yaci amun nun amun ´kɔ.

²¹ N ´yo man Eziptfuɛ'm be ´yo amun ye, ɔ man amun su fa-man amún sa ngbɛn kɔ-man.

²² Ezipt bla'm be kwlaa nga be trantran amún wun koko lɛ'n, ɔ nin nga be nin amun tran awlo kun'n, man amun nun mmla mun be srɛ be ninnge nga be fa jɛtɛ ufue annzɛ sika ɔkwlɛ be yoli'n, yɛ be `srɛ be tralɛ mun. Amun `fa ninnge sɔ mun sua amun mma yasua mun nin mma bla mun. Kɛ amun wa de Eziptfuɛ'm bé bo ninnge mun kɛ nga sa.»