Ezipt Lɔ Tulɛ'n 29 - NYANMIƐN NDƐ'N 1998

Nyanmiɛn nyrun jranfuɛ'm be Nyanmiɛn sa nun fa wlalɛ

¹ Nian, kɛ a ´fa Aarɔn nin i mma mun wla mín sa nun kɛ be `di min nyrun jranlɛ junman'n, like nga a wa yo'n yɛ: «Fa nannin tola bɔ b'a kpɛ cro'n kun nin bua nene nnyɔn bɔ lɛ fi sa nun-man bé wun'n.

² Fa ble sanmlɛn nan yo kpaun nga be gua-man nun kpaun ayre nin gato nga be tɔn be nin ngo'n, bɔ b'a gua-man nun kpaun ayre'n, ɔ nin kpaun paplaapla nga be gua-man be nun kpaun ayre'n bɔ b'a fa ngo b'a lualua be lɛklɛɛ'n.

³ Fa be gua gbogbo kun nun nan fa be kɔ min sua'n nun lɔ. Fa nannin tola'n bɔ ɔ'a kpɛ cro'n nin bua nene nnyɔn mun kɔ wie.

⁴ Fa Aarɔn nin i wa yasua mun kɔ tannin sua nga n yi mín wun nglo nun'n i anuan nun lɛ, yɛ man be fa nzue be wunnzin.

⁵ Fa Aarɔn i ninnge mun wlɛ i wun. Be yɛ: tralɛ tɛnndɛn'n, tralɛ tɛnndɛn kun'n, efɔd'n, yɛ pata kaan bɔ be fa cici be wue nun'n. I sin fa cisu'n fa ci i efɔd'n su.

⁶ Fa kle'n wlɛ i ti, kpɛkuun fa nzɔliɛ'n bɔ ti kɛ waka nyrɛ sa'n sie i kle'n su.

⁷ Fa bé ti su gualɛ ngo'n guɛ i ti su nan ɔ `kaci min liɛ mlɔnmlɔn.

⁸ I sin se i mma'm be kɛ be wunnge ɔ́ wun lɛ, nan wla be tralɛ tɛnndɛn'n.

⁹ Fa be cisu mun ci be afiɛn, fa bé kle mun wla bé ti. Kpɛkuun min nyrun jranlɛ junman'n ɔ ´ka bé sa nun titi. I sɔ mmla liɛ'n su kaci-man le. Wafa nga a ´fa Aarɔn nin i mma mun a ´sie kɛ be yo min nyrun jranfuɛ mun'n yɛ ɔ o yɛ:

¹⁰ be `fa nannin tola sɛsɛ'n be `wɔ tannin sua'n i nyrun lɔ. Man Aarɔn nin i mma'm be fa bé sa sie i nannin tola'n i ti'n su.

¹¹ I sin kpɛ nannin tola'n i kɔmin min nyrun lɛ tannin sua'n i anuan'n nun lɛ.

¹² Sɔ i mmoja'n gua like nun, fa ɔ́ sama kun bo nun nan fa klikli min sɔwlɛ'n i cɔnjɔ-cɔnjɔ'm bɔ be ti kɛ nnɛn wɛ sa'n be su. I sin fa mmoja ng'ɔ ka lɛ'n guɛ i min sɔwlɛ'n i bo lɛ.

¹³ Fa nnɛn lui ng'ɔ o nnɛn'n i klun ninnge'm bé su'n, fɛ i buɛ wunmuan'n nin i aklɛnzia nnyɔn mun, yɛ fa be lui ng'ɔ o bé wun'n nan yrɛ i kwlaa sɔ'n min sɔwlɛ'n su.

¹⁴ Fa nannin i nnɛn ba'n nin i kplo'n, ɔ nin i klun ninnge'n, fa be kɔ nanmue'n i sin lɔ nan ko yra be. Ɔ ti tɛ kun b'ɔ tu min nyrun jranfuɛ'm bé sa tɛ mun .

¹⁵ Man be fa bua nene klikli'n be bla, man Aarɔn nin i mma'm be fa be sa sie i ti'n su.

¹⁶ I sin kpɛ bua nene'n i kɔmin, sɔ i mmoja'n gua like kun nun, nan fa guagua min sɔwlɛ'n i nuan su sin yiɛ i.

¹⁷ Kpɛkpɛ nnɛn'n nun sinsin, wunnzin i klun ninnge mun nin i ja mun, nan fa be sie i nnɛn sinsin'n nin bua i ti'n bé su.

¹⁸ Yra nnɛn wunmuan'n min sɔwlɛ'n su. Ɔ ti tɛ kun b'ɔ be yrɛ i nnɛn'n kɔlikɔli'n b'ɔ bɔn fannin min Anannganman min bue nun .

¹⁹ I sin'n, man be fa bua nene'n i nnyɔn su'n bla, man Aarɔn nin i mma'm be fa bé sa sie i ti'n su.

²⁰ I sin kpɛ bua nene'n i kɔmin, sɔ i mmoja'n gua like kun nun, fɛ i mmoja sɔ'n wie klikli Aarɔn nin i mma'm bé su fama'm be pɛkɛpɛkɛ'n su, fa wie ekun klikli bé sama kokotre fama'm be su, yɛ fa wie ekun klikli bé ja mma kokotre fama'n be su. Kpɛkuun mmoja ng'ɔ ka lɛ'n, fa guagua min sɔwlɛ'n i nuan'n su tɛɛn sin yiɛ i.

²¹ Fa mmoja ng'ɔ o min sɔwlɛ'n su'n kan, ɔ nin min ngo'n, fa kpɛntɛn-kpɛntɛn Aarɔn su, yɛ fa wie kpɛntɛn-kpɛntɛn i tralɛ'm bé su. I sin, kpɛntɛn-kpɛntɛn wie Aarɔn i mma'm be su, yɛ kpɛntɛn-kpɛntɛn wie be tralɛ'm bé su. Kɛ ɔ fin i lɛ'n, Aarɔn nin i mma'm be ´yo min liɛ klonglo, yɛ be tralɛ'm be ´yo min liɛ klonglo wie.

²² Tɛ bɔ be fa bua nene nnyɔn su sɔ'n be yi'n yɛ Aarɔn nin i mma'm be ´fa wlu be junman'n nun-ɔn. Fa bua nene i lui'n nin i lua'n, nin i buɛ wunmuan'n, nin i aklɛnzia nnyɔn mun ɔ nin bé wun lui'n, yɛ i walɛ fama'n,

²³ fa kpaun bɔ kpaun ayre nun-man nun'n, b'ɔ o gbogbo b'ɔ jin min nyrun lɛ nun'n wie, ɔ nin gato nga be fali ngo be kɛɛnnin'n kun, ɔ nin kpaun paplapa nga be gua-man nun kpaun ayre'n kun.

²⁴ Fa ninnge sɔ'm be kwlaa wla Aarɔn nin i mma'm bé sa nun. Yɛ toto ninnge sɔ mun Anannganman i nyrun kɛ be fa yo i titi'n sa.

²⁵ I sin fa ninnge sɔ mun bé sa nun, nan yra be min sɔwlɛ su. Yra be nin tɛ nnɛn nga be yrɛ i kɔlikɔli'n. Ɔ ti tɛ kun bɔ be yrɛ i nnɛn'n kɔlikɔli min nyrun, b'ɔ bɔn fannin min Anannganman min bue nun.

²⁶ Fa bua nene nnyɔn su'n i wue'n nan toto i min Anannganman min nyrun. I yɛ ɔ ti ɔ liɛ lika nin-ɔn.

²⁷ Kɛn i weiin kɛ bua nene i wue'n bɔ be toto i Anannganman i nyrun'n, ɔ nin i walɛ bɔ be fa kleli i'n, be ti i liɛ klonglo.

²⁸ I sɔ'n ti, blɛ kwlaa nun'n, kɛ Izraɛlfuɛ'm be ´yi bo kun yolɛ i su tɛ'n, man be yi nnɛn i lika sɔ mun be fa man Aarɔn nin i osu'n nunfuɛ mun tititi, afin be ti be liɛ.

²⁹ Sɛ Aarɔn wu'n, man be fɛ i tralɛ ng'ɔ wla fa jran min nyrun'n be mɛn i mma mun, nan be wla be cɛn nga be fa be wla min sa nun'n bɔ be bo be junman'n bo'n.

³⁰ Man Aarɔn i mma'm be nun kun ng'ɔ ko kaci i si'n, b'ɔ ´yo min nyrun jranfuɛ'm be su kpɛn i si i ajalɛ nun'n, ɔ `wla tralɛ sɔ'n lele cɛn ba nso. Kɛ ɔ ´ko di junman'n n lika kpa'n nun tannin sua'n nun lɔ'n man ɔ wla be.

³¹ Man be fa bua nene i nnyɔn su'n, be tɔn i nnɛn'n lika ng'ɔ ti saun'n nun. Tɛ nga be fa bua sɔ'n yi'n, ɔ kle kɛ Nyanmiɛn nyrun jranfuɛ'm be su bo be junman'n i bo.

³² Man Aarɔn nin i mma'm be di nnɛn nin kpaun nga bɔ kali gbogbo'n nun. Be `di i tannin sua'n i anuan'n nun lɛ.

³³ Be ngunmin cɛ yɛ be kwla di min kpatalɛ tɛ nnɛn sɔ'n nin-ɔn. Ɔ ti be junman'n nun wlulɛ nin min sa nun bɔ be fa be wla'n i tɛ. Nán sran uflɛ fi di wie, afin ɔ ti min aliɛ.

³⁴ Sɛ lika cɛn nglɛmun nan nnɛn'n nin kpaun'n wie kali lɛ'n, man be yra be, nán man be di be kun, afin be ti min aliɛ.

³⁵ Like nga n fa kleli wɔ'n, nian su fa yo Aarɔn nin i mma mun. Man be junman nun wlulɛ'n i ti cɛn dilɛ'n ɔ di cɛn ba nso.

³⁶ Cɛn kwlaa fa nannin tola kun fa yi sa tɛ'n i ti kpatalɛ tɛ. I sɔ yɛ a ´fa yo min sɔwlɛ'n i saun-ɔn. I sin fa olivie ngo gua min sɔwlɛ sɔ'n su nan ɔ `yo min liɛ klonglo.

³⁷ Yi tɛ sɔ'n lele cɛn ba nso. Kɛ ɔ ´yo sɔ'n, wuun w'a yo min sɔwlɛ'n saun kpa. I liɛ'n, sran kwlaa annzɛ like kwlaa ng'ɔ kan n sɔwlɛ'n ɔ ´yo saun.»

Tɛ nga be yi cɛn kwlakwla'n

³⁸ «Man cɛn kwlakwla be fa bua nga b'a kpɛ cro'n sɔ nnyɔn bɔ be lɛ afuɛ kunngun'n be fa yi tɛ min sɔwlɛ'n su be man min tititi.

³⁹ Man be fa kun be man min nglɛmun, kun'n kusu be `fa man min nnɔsua.

⁴⁰ Kɛ be ´fa nglɛmun nun bua liɛ'n be ´kɔ yi tɛ'n, man be fa ble sanmlɛn kilo nsan. Man be bo sanmlɛn'n nin olivie ngo litri kun nin sin. Man be fa nzan litri kun nin sin. Ɔ ti ase gualɛ liɛ.

⁴¹ Kɛ be ´fa nnɔsua nun bua liɛ be ´kɔ tɛ'n i yilɛ'n, man be fa like nga be fa man'n, ɔ nin nzan, kɛ be fa yoli i nglɛmun nun'n sa. Man be yra tɛ sɔ'n, ɔ ´bɔn min bue nun fannin.

⁴² Kɛ ɔ fin ndɛ b'ɔ ´fa kɔ'n, nán be yaci tɛ sɔ'n b'ɔ ti min liɛ klonglo'n i yilɛ. Man be yi i tannin sua'n i anuan'n nun min nyrun lɛ. Lɛ yɛ min nin amun e ´yia yɛ n ´kan ndɛ n ´kle wɔ-ɔ.

⁴³ Lika sɔ'n nun lɛ yɛ e nin Izraɛlfuɛ mun e ´yia-a, kpɛkuun lika'n ´yo min liɛ klonglo kɛ bɔ min nyrun nyannyan'n wo lɛ'n ti.

⁴⁴ M bɔbɔ n ´sie tannin sua sɔ'n nin min sɔwlɛ'n be ngunmin. Kɛ n ´sie Aarɔn nin i mma'm be sɔ-ɔ. Be ´su min yɛ be ´yo min nyrun jranfuɛ mun.

⁴⁵ N wa tran Izraɛlfuɛ'm be afiɛn, n ´yo be Nyanmiɛn.

⁴⁶ I sɔ'n nun be ´wun i wlɛ jrɛiin kɛ min Anannganman, bɔ n ti be Nyanmiɛn'n, min yɛ n fali be Ezipt lɔ n bali kɛ ɔ ´yo nan m'an tran be afiɛn'n ti. N ti Anannganman be Nyanmiɛn.»