Ezipt Lɔ Tulɛ'n 28 - NYANMIƐN NDƐ'N 1998

Nyanmiɛn nyrun jranfuɛ'm bé wun ninnge mun

¹ «Moiz, fa ɔ niaan bian Aarɔn nin i wa Nadab, nin Abii, nin Eleazar, ɔ nin Itamar man be bla ɔ́ wun wa. Sie be ngunmin man be di min nyrun jranlɛ junman'n.

² Yo Aarɔn i tralɛ mun wafa ngunmin, man be yo nyɛnmɛn, man be yo man i nyrun ba nyan.

³ I sɔ'n ti, se tannin wufuɛ'm be kwlaa nga n fali min ngwlɛlɛ'n n wlali be nun'n man be kpa Aarɔn i tralɛ ng'ɔ wa wla be'n blɛ bɔ be ´fɛ i wla min junman'n nun'n. Yɛ kɛ ɔ ´di junman'n, tralɛ sɔ'n yɛ ɔ wa wla-a.

⁴ Tralɛ ng'ɔ fata kɛ be yo be'n yɛ: pata kaan b'ɔ be fa cici be wue nun'n kun, Efɔd kun, tralɛ tɛnndɛn kun, yɛ tralɛ tɛnndɛn uflɛ bɔ be di nun aba'n, kle kun, yɛ cisu kun. Man ɔ niaan bian Aarɔn nin i mma mun be wlɛ i sɔ tralɛ mun nan be fa di min nyrun jranlɛ junman'n.

⁵ Man be nga be ´yo'n, be `fa bua ndrɛ. Man wie yo ɔkwlɛ, wie yo ɔkwlɛ srosrowa, wie yo ɔkwlɛ kankankan, yɛ wie yo ɔkwlɛ youun. Be `fa lɛn tannin kplɔkɔɔ'n nin sika ɔkwlɛ ekun.»

Efɔd'n i su ndɛ

⁶ «Be fa lɛn nyanman b'ɔ sɔ kpa'n yɛ be fa yo efɔd nin-ɔn. Man be fa bua ndrɛ be flanflan lɛn nun. Man bua ndrɛ'n wie yo ɔkwlɛ srosrowa, wie `yo ɔkwlɛ kankankan, yɛ wie `yo ɔkwlɛ youun. Man be fa sika ɔkwlɛ be yo i nun nzɔliɛ mun.

⁷ Man be yo i bue nnyɔn nga be sin be wati su'n be su nyanman nnyɔn. Nyanman sɔ mun yɛ be ´fa tra efɔd i ase-ɔ.

⁸ Cisu nga be fa ci efɔd'n su'n, man be wafa'n yo kɛ efɔd'n bɔbɔ sa. Nyanman nga be fa yo cisu sɔ'n, man wie yo ɔkwlɛ srosrowa, wie `yo ɔkwlɛ kankankan, yɛ wie `yo ɔkwlɛ youun. Yɛ man be nin efɔd'n be sa su kunngba.

⁹ Man be fa oniks yɛbuɛ nnyɔn nan klɛ Zakɔb i wa yasua'm be dunman su.

¹⁰ Man dunman nsiɛn tran yɛbuɛ klikli'n su, yɛ man dunman nsiɛn kun'm be tran yɛbuɛ nnyɔn su'n i su. Kɛ ɔ fɛ i be kpɛnngbɛn'm be nun b'ɔ ´fa ju be kanngan'm be nun'n, be awuliɛ'n i su yɛ be ´nian be ´klɛ-ɔ.

¹¹ Yɛbuɛ sɛfuɛ'n yɛ ɔ ´klɛ dunman sɔ mun yɛbuɛ'm bé su-ɔ. Be ´klɛ yɛbuɛ sɔ'm be su kɛ be fa klɛ nzɔliɛ'm be su'n sa. I sin be `fa be wla sika ɔkwlɛ buati nnyɔn nun.

¹² Be `fa yɛbuɛ nnyɔn sɔ'm be `sie efɔd'n i nyanman b'ɔ sin be wati su'n bé su. Be ti yɛbuɛ bɔ be ti Izraɛl akpasua blu-nin-nnyɔn'm be nzɔliɛ. Be ti wla kpɛnlɛ yɛbuɛ mun. Kɛ ɔ ´yo sɔ'n, Aarɔn ´sua be dunman mun i wati su ´fa kɔ min tannin sua'n nun lɔ, kpɛkuun min Anannganman mín wla su fi-man amún su le.

¹³ Like nnyɔn nga be nun yɛ be ´sie yɛbuɛ sɔ mun'n, man be yo sika ɔkwlɛ ninnge mun.

¹⁴ Man be fa sika ɔkwlɛ jrɛiin'n yo jrɔkɔ nnyɔn. Man be wɔ be kɛ nyanman sa. Be `fa sika ɔkwlɛ jrɔkɔ sɔ mun sende sika ɔkwlɛ ninnge nnyɔn nga be ´fa yɛbuɛ mun be ´sie nun'n bé su.»

Pata kaan b'ɔ cici be wue nun'n i su ndɛ

¹⁵ «Man ajuin difuɛ'm be yo jɔlɛ dilɛ pata kaan bɔ be fa cici be wue nun'n kun. Junman kunngba nga be dili i efɔd'n su'n yɛ be `di i pata kaan'n su-ɔ. Be `fa lɛn b'ɔ sɔ kpa'n yɛ be `fa yo-ɔ. Man be fa bua ndrɛ be flanflan lɛn'n nun. Man bua ndrɛ'n wie yo ɔkwlɛ srosrowa, wie yo ɔkwlɛ kankankan, yɛ wie yo ɔkwlɛ youun. Man be fa sika ɔkwlɛ be yo nun nzɔliɛ mun.

¹⁶ Man ɔ yo kɛ pɔsu sa. Man i bue nnan'm be ngba be sɛ. Man bue kun yo santimɛtri ablaɔn-nin-nnun, bue kun yo santimɛtri ablaɔn-nin-nnun.

¹⁷ Man be fa yɛbuɛ kpakpa mun be fa mantan-mantan pata kaan'n su. Be `yo i sɔ nyanman nnan. Nyanman klikli'n, be `yo i nin sarduani kun, topaz kun, emɛrɔd kun.

¹⁸ Nyanman nnyɔn su'n, be `yo i nin grenat kun, safir kun, yɛ diaman kun.

¹⁹ Nyanman nsan su'n, be `yo i nin yasɛnt kun, agat kun, yɛ ametist kun.

²⁰ Nyanman nnan su'n, be `yo i nin krisɔlit kun, kɔrnalin kun, yɛ zasp kun. Yɛbuɛ wafa-wafa sɔ mun'n, man kun tran sika ɔkwlɛ buati kun nun, kun tran sika ɔkwlɛ buati kun nun.

²¹ Be `klɛ Zakɔb i mma blu-nin-nnyɔn'm be dunman yɛbuɛ sɔ'm bé su. Be `klɛ bé su kɛ be fa klɛ nzɔliɛ'm be su'n sa. Be `klɛ dunman kun yɛbuɛ kun su, be `klɛ kun yɛbuɛ kun su. Yɛbuɛ sɔ'm be wa yo Izraɛl akpasua blu-nin-nnyɔn'm be nzɔliɛ.

²² Man be yo sika ɔkwlɛ jrɔkɔ nnyɔn. Sika ɔkwlɛ jrɛiin'n yɛ be `fa yo-ɔ. Man be wɔ jrɔkɔ sɔ mun kɛ nyanman sa. Be ti pata kaan'n i liɛ.

²³ Man be yo like kukluuklu nnyɔn kɛ nga sa ɔ nin sika ɔkwlɛ, yɛ be `fa sika ɔkwlɛ nga sɔ mun be wla pata kaan'n i cɔnjɔ nnyɔn nga be o nglo'n bé su.

²⁴ Man be fa sika ɔkwlɛ nyanman nnyɔn'm be cici pata kaan'n i sika ɔkwlɛ nga nnyɔn'm bé su.

²⁵ Man be fa nyanman mun bé ti kun mun be cici sika ɔkwlɛ buati nnyɔn nga be o efɔd'n i nyanman'n su'n bé su. Kɛ ɔ yo sɔ'n liɛ'n, pata kaan'n kwla tran be nyrun wa.

²⁶ Man be yo sika ɔkwlɛ nga nnyɔn nan be fa be wla pata kaan'n i nuan nnyɔn nga be o ngua'm bé su. Man be trɛn i bue ng'ɔ kan efɔd'n i su.

²⁷ Man be yo sika ɔkwlɛ nga nnyɔn ekun, nan be `fa sie efɔd'n i nyanman nnyɔn bɔ be sin be wati su'n bé bo ngua efɔd'n i nyrun wa kan be sali su lɛ'n. Man sika ɔkwlɛ nga sɔ'm be tran efɔd'n i cisu'n su.

²⁸ Man be fa nyanman ɔkwlɛ srosrowa'm be cici pata kaan'n su sika ɔkwlɛ nga nin efɔd'n su sika ɔkwlɛ nga liɛ'n, kɛ ɔ ´yo nan pata kaan'n ɔ'a ka efɔd'n i cisu'n su, nan ɔ nin efɔd'n be nun ɔ'a ti-man'n ti.

²⁹ Blɛ bɔ Aarɔn ´wlu min lika kpa nun'n, man ɔ wla jɔlɛ dilɛ pata kaan'n bɔ Izraɛl akpasua'm be dunman'm be o su'n, man ɔ trɛn i wue'n su. Kɛ ɔ yo sɔ'n, min Anannganman mín wla ´kpɛn amún su.

³⁰ Wɔ Moiz, fa ninnge nga be fa si min klun sa'n sie be jɔlɛ dilɛ pata kaan'n nun, i liɛ'n, blɛ bɔ Aarɔn o min nyrun'n, be ´trɛn i anwlɛn ba'n su tititi. Afin ɔ fata kɛ Aarɔn sua Izraɛlfuɛ'm be jɔlɛ mun i anwlɛn ba'n su tititi blɛ b'ɔ o min nyrun'n kɛ ɔ ´yo nan ɔ'a si min klun sa nga n yi i nglo Izraɛlfuɛ'm be lika'n ti.»

Ninnge uflɛ bɔ bé wla be Nyanmiɛn i junman dilɛ nun'n

³¹ «Man be yo tralɛ tɛnndɛn kun bɔ i su yɛ Aarɔn ´wla efɔd nin-ɔn. Man i kwlaa'n yo ɔkwlɛ srosrowa.

³² Man bé ti wlawlɛ'n trɛn i afiɛn sɛsɛ. Man be bu bé ti wlawlɛ sɔ'n i nuan `sin yia nun kɛ ɔ ´yo nan ɔ'a titi-man'n ti.

³³ Man be fa bua ndrɛ ɔkwlɛ srosrowa, yɛ ɔkwlɛ kankankan, ɔ nin ɔkwlɛ youun, be fa yo like kɛ grenadie mma'n sa. Be `fa siesie tralɛ'n i nuan buwlɛ'n su `sin yia nun. Man be fa glein bɔ be ti sika ɔkwlɛ'n be wlawla grenadie mma'm be afiɛn.

³⁴ Kɛ be sie sika ɔkwlɛ glein kun'n, be `sie grenadie mma kun mɛntɛn i. Be `yo i sɔ trilili `sin yia tralɛ dan'n i nuan buwlɛ ng'ɔ kpɛ ngua'n su.

³⁵ Man Aarɔn wla tralɛ sɔ'n blɛ b'ɔ ´di min nyrun jranlɛ junman'n. Blɛ b'ɔ ´wlu lika kpa'n nun b'ɔ ´kɔ min Anannganman min nyrun'n annzɛ kusu kɛ ɔ fin lɔ ´fite'n, man be ti glein'n i tɛlɛ. Kɛ ɔ yo sɔ'n liɛ'n, ɔ su wu-man.

³⁶ Man be klo sika ɔkwlɛ jrɛiin'n, be fa yo like kun kɛ waka nyrɛ sa. Be `klɛ like sɔ'n su kɛ: ‹Ɔ ti Anannganman i liɛ klonglo›. Be `klɛ i kɛ be fa klɛ tanpɔn'm be su'n sa.

³⁷ Man be fa sie nyanman ɔkwlɛ srosrowa'n kun su, nan be fa sie kle'n i nyrun lika'n su.

³⁸ Man ɔ tran Aarɔn i ngban su blɛ b'ɔ o min Anannganman min nyrun'n. Sɛ ɔ yo sɔ'n, i liɛ'n, n ´sɔ Izraɛlfuɛ be sraka nga be fa man min'n nun. Kannzɛ bɔ be fɔn yɛ be fa man min o, n ´si be aunnvuɛ.

³⁹ Man be yo Aarɔn i tralɛ tɛnndɛn kun ekun ɔ nin lɛn tannin kplɔkɔɔ, be `yo i su kle'n nin lɛn tannin kplɔkɔɔ, yɛ man be yo i su cisu, man be di cisu sɔ'n be nun aba.

⁴⁰ Aarɔn i mma'm be liɛ'n, man be yo tralɛ tɛnndɛn mun be man be. Be `yo cisu mun, nin kle mun be man be ekun. Be like-ɔ, be `wla be. I sɔ'n ´kle kɛ be lɛ nyrun.

⁴¹ Wɔ, Moiz, fa ɔ niaan bian Aarɔn nin i mma'm be tralɛ mun wla be, nan fa ngo gua bé ti su. I sin fa junman'n wla bé sa nun. Sie be ngunmin kɛ ng'ɔ o lɛ'n sa kɛ ɔ ´yo nan b'a su min nan b'a yo min nyrun jranfuɛ mun'n ti.

⁴² Kɛ ɔ ´yo nan sran'm b'a wun-man bé bo'n ti'n, yo cɛkoto man be, man ɔ fɛ i be bo lengle nun lele ju be sɔwa'n su.

⁴³ Man Aarɔn nin i mma'm be wla cɛkoto sɔ mun blɛ bɔ be ´wlu tannin sua'n nun lɔ'n, annzɛ blɛ bɔ be ´mantan min sɔwlɛ'n be ´di min nyrun jranlɛ junman'n min lika kpa'n nun'n. Kɛ ɔ yo sɔ'n, i liɛ'n, fɔ su tran-man bé wun, yɛ be su wu-man. Ɔ ti mmla kun b'ɔ ti Aarɔn nin i osu'n nunfuɛ'm be liɛ b'ɔ ´ka lɛ tititi.»