Ezipt Lɔ Tulɛ'n 25 - NYANMIƐN NDƐ'N 1998

TANNIN SUA NGA ANANNGANMAN YI I WUN NGLO NUN'N I JAJALƐ Like ng'ɔ fata kɛ Izraɛlfuɛ'm be man'n

¹ Anannganman seli Moiz kɛ:

² «Kan kle Izraɛlfuɛ'm be kɛ be `man min like. Like kwlaa nga sran'm be ´man'n nan be mɛn i klun-ufue su'n, amun `sɔ nun.

³ Ninnge ng'ɔ fata kɛ amun sɔ be nun'n be yɛ: sika ɔkwlɛ, jɛtɛ ufue yɛ aaba,

⁴ tannin ɔkwlɛ srosrowa nin nga ɔkwlɛ kankankan o nun'n, ɔ nin nga i nyin'n ti ɔkwlɛ youun'n, lɛn tannin kplɔkɔɔ, boli ndrɛ,

⁵ bua nene kplo nga be kɛn i ayre ɔkwlɛ'n, nnɛn uflɛ kplo b'ɔ sɔ kpa'n, akasia waka,

⁶ kannin ngo, waka bue nzue fanninfannin bɔ be fa flanflan bé ti su gualɛ ngo'n nun'n, ɔ nin ansans bɔ be yrɛ i'n,

⁷ yɛbuɛ kpakpa nga be flɛ be oniks bɔ be fa ta min nyrun jranfuɛ'm be su kpɛn'n i efɔd nin i pata kaan b'ɔ cici i wue nun'n su'n.

⁸ Man Izraɛlfuɛ'm be yo sua kun be man min, b'ɔ ti min liɛ klonglo, kɛ ɔ ´yo nan m'an tran amun afiɛn'n ti.

⁹ Kɛ amun ´yo tannin sua nga n yi min wun nglo nun'n nin i klun lɔ ninnge mun'n, amun `nian jajalɛ nga n wa fa kle amun yɛ'n su yɛ amun yo-ɔ.»

Nyanmiɛn i alaka'n

¹⁰ «Man be fa akasia waka be bobo alaka kun. Man i tɛnndɛn nun'n yo mɛtri kun ɔ nin i su santimɛtri ablaɔn-nin-nnun. Man i tɛtrɛ nun'n ɔ nin i nglo-nglo'n be yo santimɛtri ableso-nin-nnun.

¹¹ Man be klo sika ɔkwlɛ jrɛiin be guɛ i klun lɔ nin i sin, man be klo sika ɔkwlɛ be `guɛ i nuan su tɛɛn'n sin yia nun.

¹² Man be fa sika ɔkwlɛ be yo like kukluuklu kɛ nga sa sɔ nnan, nan be `fa be `tɛtɛ i alaka'n i cɔnjɔ nnan'm bé su, man i bue kun su wa nyan nnyɔn, yɛ man i bue kun ekun'n su lɔ nyan nnyɔn.

¹³ Man be sɛ akasia waka tɛnndɛn nnyɔn, nan be klo sika ɔkwlɛ be gua bé wun.

¹⁴ Man be fa waka sɔ'm be wlɛ i like kukluuklu'm be nun, man kun trɛn i bue kun su, yɛ man kun kusu trɛn i bue kun ekun'n su, kɛ ɔ ´yo nan b'a kwla sua Nyanmiɛn i alaka'n ti.

¹⁵ Man waka floloflolo sɔ'm be tran like kukluuklu sɔ'm be nun lɛ, nán be yi be.

¹⁶ Fa yɛbuɛ paplaapla nga Nyanmiɛn i mmla blu'n wo su bɔ n wa fa man wɔ'n sie i alaka'n nun.

¹⁷ Man be fa sika ɔkwlɛ jrɛiin fa yo alaka'n i su tre'n. Man i tɛnndɛn nun'n yo santimɛtri ya ablaɔn-nin-nnun yɛ i tɛtrɛ nun'n yo santimɛtri ableso-nin-nnun.

¹⁸ Man be fa sika ɔkwlɛ bɔ be boli i kɛ blalɛ sa'n be yo anz nga be sasa Nyanmiɛn i ninnge mun'n be nzɔliɛ sɔ nnyɔn. Man be yo be alaka'n i tre'n i bue nnyɔn'm be su.

¹⁹ Man anz sɔ'm be nin alaka'n i su tre'n be sa su kunngba, man kun trɛn i bue kun su wa, yɛ man kun kusu trɛn i bue kun ekun'n su lɔ.

²⁰ Man anz nnyɔn'm be ndɛwa'm be nun trɛ wɔ nglo nan be `fa kata alaka'n i tre'n su. Man be nyrun nnyɔn'n wɔ su, yɛ man be nyin kpɛ alaka'n i tre'n su wa.

²¹ Man be fa alaka'n i tre'n kata alaka'n su'n, kpɛkuun yɛbuɛ paplaapla nnyɔn nga Nyanmiɛn i mmla blu'n wo su bɔ n wa fa man wɔ'n, man be fa sie i alaka'n nun.

²² Alaka'n i su tre'n i su lɛ yɛ e nin wɔ e wa yia-a, e ´yia anz nnyɔn'm be afiɛn'n nun lɛ. Lɛ yɛ n ´kan mín nuan su ndɛ n ´kle wɔ yɛ a ´kan kle Izraɛlfuɛ mun-ɔn.»

Tabli nga be gua su kpaun man Nyanmiɛn'n

²³ «Man be fa waka be bobo tabli kun, man i tɛnndɛn nun'n yo mɛtri kun, man i tɛtrɛ nun'n yo santimɛtri ablenun, yɛ man i nglo-nglo'n yo santimɛtri ableso-nin-nnun.

²⁴ Man be klo sika ɔkwlɛ jrɛiin'n be fa gua su. Be `fa sika ɔkwlɛ'n be `ci i nuan su tɛɛn sin yia nun.

²⁵ Be `yo kadri i bue nnan'm bé su. Man i kadri sɔ'n i kpikplikpi'n yo santimɛtri mɔcuɛ, yɛ man be fa sika ɔkwlɛ be ci i nuan su tɛɛn wie.

²⁶ Man be fa sika ɔkwlɛ be yo like kluklu kɛ nga sa sɔ nnan, nan be `fa tata i cɔnjɔ nnan'm bé su tabli'n i ja nnan'm bé wun lɛ.

²⁷ Man like kluklu sɔ'm be mantan kadri'n. Be `fa waka floloflolo nnyɔn'n be wla be nun nan b'a fa sua tabli'n.

²⁸ Be `sɛsɛ akasia waka nnyɔn, be `klo sika ɔkwlɛ be gua bé wun. Be yɛ be `fa be `sua tabli nin-ɔn.

²⁹ Be `yo tabli'n i asiɛti mun, nin klowa mun, nin kpongbo cɛcrɛcɛ mun, ɔ nin tasi bɔ be fa gua nzan ase'n mun, i kwlaa sɔ'n sika ɔkwlɛ jrɛiin ngunmin kokoko yɛ be fa `yo be-ɔ.

³⁰ Tabli sɔ'n su yɛ be ´sie kpaun nga be ´fa man min nin-ɔn. Nán kpaun sɔ'n i bo tu le.»

Kannin'm be siewlɛ b'ɔ lɛ sama nso'n

³¹ «Man be fa sika ɔkwlɛ jrɛiin be `yo kannin'm be siewlɛ kun. Man be bo sika ɔkwlɛ'n kɛ be fa bo blalɛ'n sa. Kannin siewlɛ sɔ'n i bɔbɔ i ja o, i afiɛn flolo nin o, klowa nzɔliɛ'm bɔ be o su mun o, i su like kpɔlɛ kpɔlɛ mun o, waka nyrɛ nzɔliɛ bɔ be o su mun o, man be kwlaa be sa su kunngba.

³² Man be yo i sama nsiɛn i afiɛn flolo'n su. Man nsan tran bue kun su, yɛ man nsan ekun tran bue kun'n su.

³³ Be `yo klowa nzɔliɛ nsan i sama kun su. Man klowa sɔ'm be yo kɛ waka bɔ be flɛ i amandie'n i mma'n sa. Man be yo like kpɔlɛ kpɔlɛ mun nin waka nyrɛ nzɔliɛ mun i sama'n su ekun. Ninnge wafa kunngba sɔ mun'n, be `yo be kannin siewlɛ'n i sama nsiɛn'm be su.

³⁴ Kannin siewlɛ'n i afiɛn flolo'n su'n, be `yo klowa nzɔliɛ mun bɔ be ti kɛ amandie i mma'n sa'n sɔ nnan. Be `yo i su like kpɔlɛ kpɔlɛ mun nin waka nyrɛ nzɔliɛ mun. Man klowa kun nyɛn i like kpɔlɛ kun nin i waka nyrɛ kun.

³⁵ Kan kannin siewlɛ'n i sama nnyɔn be bo'n taka likawlɛ afiɛn flolo'n su'n lɛ'n, man be yo like kpɔlɛ kun lɛ. Man be yo kannin siewlɛ'n i sama nsiɛn'm be bo'n sɔ: nnyɔn be bo lɛ, be `yo like kpɔlɛ kun, nnyɔn be bo lɛ, be `yo like kpɔlɛ kun.

³⁶ Man kannin siewlɛ'n nin i sama mun nin like kpɔlɛ kpɔlɛ mun be sa su kunngba. Be `fa sika ɔkwlɛ jrɛiin yɛ be `yo kannin siewlɛ'n i wunmuan nin-ɔn. Be `bo sika ɔkwlɛ'n kɛ be fa bo blalɛ'n sa.

³⁷ Man be yo kannin siewlɛ'n i kannin nso mun. Be `sie be kannin siewlɛ'n su nglo, man be trɛn i nyrun wa.

³⁸ Man be fa sika ɔkwlɛ jrɛiin be yo kannin siewlɛ'n i like nga be fa tu nzuɛn'n nin nzuɛn guawlɛ'n.

³⁹ Be `sunnzun sika ɔkwlɛ kilo ablasan yɛ be fa `yo kannin siewlɛ'n nin i wun ninnge mun-ɔn.

⁴⁰ Moiz, nian su man be yo i kɛ nga n fa kleli wɔ oka'n su lɔ'n sa.»