Ezipt Lɔ Tulɛ'n 24 - NYANMIƐN NDƐ'N 1998

Nyanmiɛn nin Izraɛlfuɛ'm be aenguɛ tralɛ

¹ Anannganman seli Moiz kɛ: «Fu mín sin oka'n su wa, a nin Aarɔn, nin Nadab, nin Abii, ɔ nin Izraɛl kpɛnngbɛn'm be nun ableso. Amun `jran mmua lɔ nan amun `koto mín bo.

² I sin ɔ ngunmin a wa mantan min wa. Nán be nga'm be mantan min wa, yɛ nvlefuɛ'm be kusu nán be fu oka'n su wa wie.»

³ Moiz ko kannin ndɛ nga Anannganman kan kleli i'n i kwlaa nin like nga i waan be `yo'n kleli nvlefuɛ mun. Bé kwlaa be kɛnnin i likawlɛ kɛ: «E ´fa Anannganman i mmla'm be kwlaa be su.»

⁴ Moiz klɛli ndɛ nga Anannganman kan kleli i'n i kwlaa. Kɛ aliɛ'n cɛnnin'n, ɔ jasoli nglɛmun ndɛ kpa, ɔ kplannin Nyanmiɛn i sɔwlɛ kun oka'n i bo wun lɛ. Yɛ ɔ siesieli yɛbuɛ blu-nin-nnyɔn, be ti Izraɛl akpasua blu-nin-nnyɔn'm be nzɔliɛ.

⁵ Be kpali Izraɛl gbanflɛn wie mun kɛ be yi tɛ nga be yra be nnɛn'n kɔlikɔli'n be fa man Anannganman, nan be `fa nannin tola mun be `yi bo kun yolɛ i su tɛ mun be mɛn i.

⁶ Moiz sɔli nnɛn'm be mmoja'n, ɔ fɛli i bue guɛli i kpongbo'm be nun, yɛ ɔ fɛli i bue utuli i Nyanmiɛn i sɔwlɛ'n su.

⁷ Ɔ fali aenguɛ nga Nyanmiɛn nin be trali'n i wun fluwa'n nan ɔ'a kanngan nun nvlefuɛ'm be nyrun. Izraɛlfuɛ'm be seli kɛ: «Like kwlaa nga Anannganman waan e `yo'n, e ´nian su e ´yo i sekeseke kpan.»

⁸ Moiz fali mmoja'n kpɛntɛn-kpɛntɛnnin Izraɛlfuɛ'm bé su, kpɛkuun i waan: «Mmoja ng'ɔ o yɛ'n, o ti aenguɛ nga Anannganman nin amun trali'n blɛ b'ɔ ´man amun mmla nga'm be kwlaa'n, i nzɔliɛ .»

⁹ Kɛ ɔ yoli sɔ'n, Moiz, Aarɔn, Nadab, Abii yɛ Izraɛl kpɛnngbɛn ableso'm be fuli oka'n su lɔ.

¹⁰ Be wunnin Izraɛl Nyanmiɛn'n, i ja'm bé siesie like su. Like sɔ'n ti kɛ like wie yɛ be fali yɛbuɛ kpakpa nga be flɛ i Safir b'ɔ ti nglannglan'n be yoli sa. Ɔ ti ble klanman kɛ nyanmiɛn ble'n sa.

¹¹ Nyanmiɛn ɔ'a yo-man Izraɛl awlobo kpɛnngbɛn sɔ'm bé sa fi. Be wunnin Nyanmiɛn weiin, i sin be dili like yɛ be nɔnnin nzan.

Moiz nin Nyanmiɛn be yiali oka'n su lɔ

¹² Anannganman seli Moiz kɛ: «Fu mín sin oka'n su wa nan jran lɛ. N wa fa yɛbuɛ paplapa bɔ n klɛli mmla'm bé su'n n ´fa man wɔ, nan `fa mmla sɔ mun kle Izraɛlfuɛ mun.»

¹³ Moiz nin Zozie b'ɔ ti i sufuɛ'n be fuli Nyanmiɛn i oka'n su lɔ.

¹⁴ Ɔ seli kpɛnngbɛn'm be kɛ: «Amun `minndɛ e wa, e ´kɔ nan e ´ba, man e to amun wa. Aarɔn nin Ir be ´ka amún wun wa, sɛ sran wie waan be di i ndɛ wie be mɛn i'n, ɔ `kan kle be.»

¹⁵ Kɛ Moiz ´fu oka'n su'n, sin wɛnsrɛn kɛtɛli i su bliblibli.

¹⁶ Anannganman i nyrun nyannyan'n wo Sinai oka'n su. Yɛ sin wɛnsrɛn'n katali oka'n su lele cɛn ba nsiɛn. Cɛn ba nso su'n, kɛ Anannganman o sin wɛnsrɛn'n i afiɛn lɔ'n, ɔ flɛli Moiz.

¹⁷ Anannganman i nyrun nyannyan'n yoli Izraɛlfuɛ'm be nyrun kɛ sin dan wie yɛ ɔ su jue oka'n su lɔ sa.

¹⁸ Moiz wluli sin wɛnsrɛn'n nun, nan ɔ'a fu oka'n su lɔ. Moiz dili oka'n su lɔ kɔnguɛ ablanan nin wia su ablanan.