Ezipt Lɔ Tulɛ'n 23 - NYANMIƐN NDƐ'N 1998

Ndɛ sin jranlɛ

¹ «Nán kan ndɛ ng'ɔ ti ato ndɛ'n sin lika'm be nun. Nán jran sa tɛ yofuɛ'm bé sin, nán yo ato lalofuɛ.

² Sran wie bé bo yo kun be yo sa tɛ. Nán nian kɛ be ti kpanngban ti a se kɛ a su be su yo wie. Sran wie'm be kusu be di ndɛ i wafa b'ɔ ti-man su'n. Nán jran bé sin.

³ Sɛ sran kun ti yalɛfuɛ bɔbɔ nan i ndɛ yo-man fɛ'n, nán nian kɛ ɔ ti yalɛfuɛ'n ti a se kɛ a jran i sin.

⁴ Sɛ a nin sran ng'ɔ kpɔ wɔ'n i nannin annzɛ i aflunmun bɔ ɔ'a mlin'n amun yia'n, trɛ i ko mɛn i.

⁵ Sɛ a wun sran ng'ɔ kpɔ wɔ'n i aflunmun bɔ trɔ'n ɔ'a tin i su'n, nán yaci i lɛ, uka ɔ kpɔfuɛ'n nan amun mɛn i nnɛn'n su man ɔ jaso jran.

⁶ Sɛ sran wie waan a `di i jɔlɛ'n, sɛ ɔ ti yalɛfuɛ bɔbɔ'n, nán niɛn i yalɛ'n ti bu i ndɛ kwlɛ.

⁷ Nán sie ɔ́ su ato ndɛ'm bé bo. Nán kun sran nga ɔ'a yo-man sa tɛ'n, ɔ nin sran kpa'n. Sran ng'ɔ yo i sɔ sa tɛ liɛ'n, n ´tu i fɔ.

⁸ Nán sɔ adi ninnge nun, afin i sɔ ninnge bɔ be fa man'n, be si sran be nyin, kannzɛ sran'n ti sa sifuɛ kpa bɔbɔ o, be si i nyin. Yɛ be saci nanwlɛ difuɛ'm be ndɛ kanlɛ'n.

⁹ Nán kle aofuɛ bɔ be tran amun afiɛn'm be yalɛ. Afin amun si aofuɛ yolɛ'n i nun ndɛ'n kwlaa yɛlɛ kɛ amun bɔbɔ amun yoli aofuɛ Ezipt mɛn'n nun lɔ.»

Wunmiɛn delɛ afuɛ'n nin wunmiɛn-delɛ-cɛn'n be ndɛ

¹⁰ «Fa afuɛ nsiɛn lua asiɛ'n su ninnge nan ti be su mma.

¹¹ Sanngɛ afuɛ'n i nso'n su'n, yaci asiɛ'n lɛ man ɔ de wunmiɛn kpa. Ɔ nvle'n nun yalɛfuɛ'm be ´nyan like nun be fa ta bé wun, yɛ blo nnɛn'm be kusu be ´di ng'ɔ ka lɛ'n. Yo ɔ vinyi nin ɔ olivie'm be sɔ wie.

¹² Fa cɛn ba nsiɛn fa di ɔ junman mun. Sanngɛ cɛn'n i nso su'n, ɔ ti wunmiɛn-delɛ-cɛn. Nán di junman, kɛ ɔ ´yo nan ɔ nannin mun, nin aflunmun mun, nin ɔ sa nun junman difuɛ mun, ɔ nin aofuɛ'm b'a kwla de wunmiɛn'n ti.

¹³ Amun `fa ndɛ nga min Anannganman n kan kle amun'n su kpa. Amun `nian amún wun kpa. Nán amun bo flɛ amuɛn mun kɛ amun srɛ be like, nán be dunman bɔ sa tɛ amún nuan nun mlɔnmlɔn.»

Izraɛl lɔ cɛn dilɛ cɛn mun

¹⁴ «Afuɛ kwlaa nun amun `di cɛn kpɛ nsan be `manman min.

¹⁵ Cɛn klikli ng'ɔ fata kɛ amun di'n yɛlɛ kpaun bɔ b'a gua-man nun kpaun ayre'n i cɛn'n. Afin anglo sɔ'n nun yɛ an jasoli Ezipt lɔ-ɔ. Anglo nga be flɛ i Abib'n nun'n, amun `di cɛn sɔ'n lele cɛn ba nso kɛ n seli amun kɛ an fa yo'n sa. Nán amun fa amún sa ngbɛn bla min lika saun'n nun.

¹⁶ Ble kpɛlɛ cɛn'n i sin kɛ amun ´bo like nga amun luali'm be kpɛlɛ i bo'n, amun `di like kpɛlɛ sɔ'n i cɛn'n. Munngun'n nun afuɛ'n i awieliɛ'n, kɛ bɔ amun ko wie amun fie nga amun dili'n be su ninnge'm be su yiayia'n, amun `di cɛn.

¹⁷ Afuɛ kwlaa nun'n, amun nvle'n nun yasua'm be kwlaa be `bla min Anannganman min nyrun kpɛ nsan.

¹⁸ Blɛ bɔ amun ´fa nnɛn nga amun kunnin i'n blɛ min'n, nán amun fa kpaun nga kpaun ayre o nun'n fa sie su. Nán amun fa nnɛn nga amun fa yi tɛ nnɔsua nun'n i lui'n be sie lɛ lele man aliɛ cɛn su.

¹⁹ Amun `fa amun fie'm bé su ninnge'm be mma klikli'n be fa bla min Anannganman mín sua'n nun. Nán amun fa boli'n i nin i nyɔnflɛn nzue fa tɔn i wa'n i nnɛn'n.»

Kanaan lɔ wlulɛ kasiɛ'n

²⁰ «N ´sunman min anz kun, ɔ ´dun mmua amun nyrun yɛ ɔ ´sasa amun atin'n nun. Ɔ ´fa amun trilili ´ju mɛn nga m'an siesie i lɔ m'an sie amun'n nun.

²¹ Amun `nian amún wun kpa man amún nyin yi i. Nán amun jaso i wun. Ɔ su yaci-man amún nyin kekle'n su cɛ-man amun, afin min yɛ n sunmɛn i-ɔ.

²² Sɛ amún nyin yi i kpa'n, nan amun yo like nga n se amun kɛ amun yo'n, amun kpɔfuɛ'm be ´yo min kpɔfuɛ wie, yɛ e nin be nga be nin amun be kun alɛ'n e ´kun.

²³ Min anz'n ´dun mmua amun nyrun, ɔ ´fa amun kɔ Amɔrfuɛ mun, nin Ɛtfuɛ mun, nin Ferezfuɛ mun, nin Kanaanfuɛ mun, nin Evfuɛ mun, ɔ nin Zɛbisfuɛ'm be mɛn'n nun lɔ, yɛ n ´nunnun nvle sɔ mun.

²⁴ Nán amun koto nvle sɔ'm be amuɛn'm be bo, nán an sɔ be. Nán amun nian be aeliɛ'm bé su yo wie. Amun `bubu be waka sran'm be nun, yɛ amun `saci yɛbuɛ nga be takali be'n mun.

²⁵ M bɔbɔ min Anannganman bɔ n ti amun Nyanmiɛn'n yɛ amún `su min-ɔn. N ´yra min nuan klanman man amun, i ti amun ´nyan aliɛ diwa nin nzue nɔnwa. N ´yo man amun su tɔ-man tukpacɛ.

²⁶ Amun mɛn'n nun lɔ'n, be su wun-man bla kun kɛ ɔ'a kpɔ kuɛ annzɛ bla kun b'ɔ ti klun kpanfuɛ-ɔ. N ´yo man amun nguan nyanman'n ´yo tɛnndɛn.

²⁷ Srɛ dan kpa ´kun nvle nga be ´ti i kɛ amun su ba'n be nunfuɛ mun. N ´sanngan nvle nga amun ´wlu nun'm be nun. Amun kpɔfuɛ'm be kɔmin sin'n yɛ amun ´wun i-ɔ, afin be ´wanndi amun nyrun.

²⁸ N ´sunman abɔn dandan mun amun nyrun lɔ, be ´fuan Evfuɛ mun, nin Kanaanfuɛ mun, ɔ nin Ɛtfuɛ'm be kwlaa nan amu'an ju lɔ bɔbɔ.

²⁹ Sanngɛ n su kan-man be kwlakwla bé bo afuɛ kunngba nun. Afin sɛ ɔ yo sɔ'n, mɛn'n ´tɔ koun ngboko, kpɛkuun nnɛn tɛtɛ'm be ´sɔn be kle amun yalɛ.

³⁰ N ´kan amun kpɔfuɛ'm bé bo kanngankanngan, i liɛ'n, kɛ amun ko trɛ'n, wuun amun su fa mɛn'n i ngba siɛn'n.

³¹ Amun mɛn liɛ'n ´bo i bo ndɛma jenvie'n su lele ´fa ju Mediterane jenvie'n su, yɛ ɔ ´fɛ i Sinai aawlɛ flɛnnɛn'n su lele fa ju Efrat nzue ba'n su. Afin n wa fa be nga be o lika sɔ'm be nun'n n ´wla amún sa nun nan amun kan bé bo.

³² Nán amun nin be tra aenguɛ, nán amun fa be amuɛn mun.

³³ Nán amun kplin be su kɛ be tran amun mɛn'n nun kɛ ɔ ´yo nan b'a laka-man amun nan amu'an fɔn-man mín wun'n ti. Afin sɛ amun su be amuɛn mun'n, wuun amu'an tɔ amuɛn sɔlɛ aya'n nun.»