Ezipt Lɔ Tulɛ'n 22 - NYANMIƐN NDƐ'N 1998

¹ «Sɛ be fu awiefuɛ kun nun kɔnguɛ'n, b'ɔ su bu anuan ´ko wua'n, nan sɛ be finfin i like nan ɔ wu'n, ɔ ti-man sran kunlɛ.

² Sanngɛ sɛ wia'n ɔ'a jaso yɛ i sɔ sa'n ju'n, ɔ ti sran kunlɛ. Sɛ awiefuɛ kun wua like kun'n, ɔ `sie like sɔ'n i osu. Sɛ ɔ lɛ-man like fi'n, be `yo i atɛ kɛ kanga sa awie'n b'ɔ wuali'n ti.

³ Sɛ ɔ ko wuali nannin annzɛ aflunmun, annzɛ bua, annzɛ boli nan ɔ tɛ o i sa nun'n, ɔ `yi nnɛn sɔ'n man nan ɔ `su i bo nin nnɛn kun ekun.

Sran like sacilɛ

⁴ Sɛ sran kun yaci i nnɛn'm be lɛ be ko di sran wie i fie su like'n, annzɛ be ko saci vinyi fie kun'n, man ɔ fɛ i fie liɛ'n su lɔ ninnge kpakpa ng'ɔ nyɛnnin i'n, annzɛ i vinyi mma kpakpa ng'ɔ titili be i vinyi fie'n nun lɔ'n, ɔ `fa sie sran sɔ'n i liɛ'n i osu.

⁵ Sɛ sran kun wɔ susrɛ kun nun'n, nan sin'n ko tɔ ble kwle'm be nun, annzɛ ble nga be nian kpɛ-man, annzɛ ble nga b'a cici i sɔlɛ-sɔlɛ'n be nun'n, ɔ fata kɛ i sɔfuɛ'n tuɛ i kalɛ man sran ng'ɔ lɛ fie sɔ'n.

⁶ Sɛ sran kun man i wiengu kun sika annzɛ like kpa wie kɛ ɔ `sie, nan awiefuɛ kun wa wua sika sɔ'n annzɛ like sɔ'n sran'n i sua'n nun'n, sɛ be tra awiefuɛ'n, man ɔ yi sika'n annzɛ like'n i wunsu kpɛ nnyɔn fa mɛn i fuɛ'n.

⁷ Sɛ b'a tra-man awiefuɛ'n kusu'n, man sran ng'ɔ sie like sɔ'n ɔ fa Nyanmiɛn yo i lalofuɛ ɔ ta nda kɛ nɛ́n i yɛ ɔ wuali i wiengu'n i like nin-ɔn.

⁸ Ndɛ kwlaa nga ɔ'a tɔ akplowa'n, nannin su ndɛ o, aflunmun su ndɛ o, bua su ndɛ o, boli su ndɛ o, tralɛ su ndɛ o, man be fa ndɛ sɔ'n be to Nyanmiɛn lɔ. Man sran nga i ndɛ yo-man fɛ'n yi like sɔ'n i wunsu nnyɔn fa man i wiengu kun'n.

⁹ Sɛ sran kun man i wiengu nnɛn wie kɛ ɔ tɛ i, sɛ aflunmun o, sɛ nannin o, sɛ bua o, sɛ boli o, sɛ nnɛn uflɛ wie o, nan sɛ nnɛn sɔ'n wu'n, annzɛ like wie bu i ja'n, annzɛ kusu ɔ tu anunman nan sran fi ɔ'a wun-man nun'n,

¹⁰ man sran ng'ɔ ta nnɛn'n fa Anannganman i dunman ta nda nun kɛ nɛ́n i yɛ ɔ wuali i wiengu kun'n i nnɛn nin-ɔn. Man sran ng'ɔ lɛ nnɛn'n lafi nda nga i niaan'n tali'n su, nán man i wiengu'n sie i nnɛn'n i osu.

¹¹ Sanngɛ sɛ nnɛn'n i tafuɛ'n i bɔbɔ yɛ man be wuɛli i'n, ɔ `tuɛ i kalɛ `man nnɛn'n i fuɛ'n.

¹² Sɛ blo nnɛn wlɛfuɛ wie yɛ ɔ kunnin nnɛn sɔ'n, man nnɛn'n i tafuɛ'n fɛ i onga ng'ɔ kali lɛ'n ko kle nnɛn'n i fuɛ'n. Kɛ ɔ ko yo i sɔ liɛ'n, ɔ su tua-man kalɛ fi.

¹³ Sɛ sran kun ko srɛ i wiengu kun i nnɛn wie kɛ ɔ ´ta nan i lika wie bu'n, annzɛ nnɛn'n wu'n nan nnɛn'n i fuɛ'n nun-man lɛ'n, man sran ng'ɔ ko srɛli nnɛn'n ɔ tannin i kalɛ.

¹⁴ Sɛ kusu nnɛn'n i fuɛ'n wo lɛ yɛ i sɔ sa'n juli'n, sran ng'ɔ ko srɛli nnɛn'n su tuɛ-mɛn kalɛ. Sɛ be lueli nnɛn'n, i luelɛ sika'n yɛ ɔ ti i kalɛ bɔ be ´tua-a.»

Nzuɛn kpa nin Nyanmiɛn sulɛ'n be su mmla wafa-wafa mun

¹⁵ «Sɛ sran kun ko laka talua ng'ɔ nian si-man bian, bɔ be nian trɛ-mɛn i ase'n, nan ɔ nin i be la'n, ɔ fata kɛ ɔ man talua'n i si'n i aja ninnge, nan ɔ `ja talua'n.

¹⁶ Sɛ talua'n i si'n waan ɔ kplin-man su'n, sanngɛ man talua'n i lakafuɛ'n yi aja like nga be yi nan talua ng'ɔ nian si-man bian'n ɔ'a ja bian'n. Man ɔ yi i sika nun.

¹⁷ Nán yaci baefuɛ bla kun sa nguan nun.

¹⁸ Sran ng'ɔ nin nnɛn be la'n, man be kun sran sɔ'n.

¹⁹ Sran ng'ɔ yi tɛ man amuɛn mun'n, b'ɔ yi-man tɛ man-man Nyanmiɛn i ngunmin'n, man be kun i.

²⁰ Nán amun kle aofuɛ'm be yalɛ, yɛ nán amun bo be akpo, afin man amun wla kpɛn su kɛ amun yoli aofuɛ Ezipt mɛn'n nun lɔ wie.

²¹ Nán amun yo angboti bla nin aika'm be tɛtɛ.

²² Sɛ amun yo be tɛtɛ'n, be ´flɛ min kɛ min Anannganman n de be, yɛ n kan kle amun kɛ n ´ti bé flɛlɛ'n.

²³ N ´fa ya amun wun, kpɛkuun n ´yo man alɛ ´di amun, yɛ amun yi'm be ´yo angboti, amun mma'm be kusu be ´ka aika.

²⁴ Sɛ min nvle'n i nunfuɛ kun b'ɔ ti yalɛfuɛ'n ɔ wa usa bosia ɔ sa nun'n, nán yo i kɛ sran bɔ sran sika wo i su'n sa, nán se i kɛ ɔ su i bo.

²⁵ Sɛ a fa ɔ wiengu kun i tralɛ kɛ aowa sa'n, dun mmua fa mɛn i nan wia'n ɔ'a tɔ,

²⁶ afin i wun katalɛ like bɔ ɔ lɛ i'n yɛlɛ kunngba ng'ɔ o lɛ'n. Sɛ be de i sa nun'n, nzu yɛ ɔ ´fa kɛtɛ i su nan ɔ'a la-a? Sɛ ɔ kpan flɛ min'n, n ´tɛ i su, afin n ti aunnvuɛsifuɛ.

²⁷ Nán amun kpɛ min bɔ n ti amún Nyanmiɛn'n min nzowa. Nán amun bo amun nvle'n i su kpɛnngbɛn'n i sannzan.

²⁸ Amun fie'm be su ninnge be mma klikli'n, ɔ nin amun vinyi mma klikli'n, amun `fa blɛ min ndɛndɛ, nán man ɔ cɛ. Amun `fa amún wa yasua klikli mun be wla min sa nun.

²⁹ Nannin mun, nin bua mun, ɔ nin boli'm bé wa klikli nga be wu be'n, kɛ be ko di cɛn ba nso be nin bo wun'n, amun `fa be yi tɛ man min be le mɔcuɛ'n su.

³⁰ Amun `yo min liɛ klonglo, ɔ man nán amun di nnɛn nga i wiengu nnɛn tɛ wie ɔ'a kun i fie su lɔ'n, amun `fa man alua mun man be di.»