Ezipt Lɔ Tulɛ'n 21 - NYANMIƐN NDƐ'N 1998

Ebre kanga'm bé su mmla

¹ Anannganman seli ekun kɛ: «Mmla wie mun ekun yɛ, fa be kle Izraɛlfuɛ mun:

² ‹Sɛ amun to Ebre kanga kun'n, man ɔ yo kanga lele afuɛ nsiɛn. I afuɛ nso'n su'n, amun `yaci i nun, nán ɔ tua kalɛ fi man sran.

³ Sɛ i kunngba yɛ ɔ bali'n, man i kunngba yɛ ɔ sɛ i sin-ɔn. Sɛ kusu ɔ ´ba-a, ɔ nin i yi yɛ be bali'n, man ɔ nin i yi'n be wɔ.

⁴ Sɛ i min'n yɛ ɔ mɛnnin i bla'n, sɛ ɔ nin bla'n be wuli ba bla mun annzɛ ba yasua mun'n, bla'n bɔbɔ o, ba mun o, be `ka i min'n i sa nun, yɛ yasua'n i kunngba cenje yɛ ɔ wɔ-ɔ.

⁵ Sɛ kusu ɔ se kɛ ɔ klo i min'n nin i yi'n nin i mma mun'n, nan ɔ klo-man kɛ ɔ kɔ nan ɔ nyɛn i ti'n,

⁶ i min'n `fa Nyanmiɛn yo i lalofuɛ, ɔ `fa sran'n mantan anuan'n annzɛ anuan'n i waka'n. Kpɛkuun ɔ `fiti i su'n nin tulie. Kɛ ɔ fin lɛ'n, sran sɔ'n ´su i tititi.

⁷ Sɛ sran kun yo i wa talua kun atɛ kɛ kanga sa'n, ɔ su kɔ-man kɛ kanga kun nga'm be fa kɔ'n sa.

⁸ Sɛ i min'n toli i kɛ ɔ ´fɛ i yo i yi'n, nan sɛ ɔ klo-mɛn i kun'n, man ɔ sɛ i sin yo bla'n i atɛ bla'n i si'n sa nun. Ɔ lɛ-man atin kɛ ɔ ´yo i atɛ aofuɛ'm bé sa nun.

⁹ Sɛ ɔ toli i kɛ ɔ ´fa mɛn i wa nan ɔ jɛ i'n, ɔ `yo i kɛ be fa yo ba bla mun'n sa.

¹⁰ Sɛ bla i min'n fa bla uflɛ'n, nán man ɔ kpɛ i b'ɔ ti bla klikli'n i like liɛ b'ɔ fata kɛ ɔ fa mɛn i'n su: i aliɛ o, i tralɛ o, i sin lalɛ nin o.

¹¹ Sɛ i min'n yo-man like nsan sɔ mun mɛn-mɛn i'n, bla'n ɔ kwla kɔ, ɔ tua-man kalɛ fi.› »

Sa tɛ b'ɔ be yo-ɔ, be nin kunlɛ fata'n

¹² «Sran ng'ɔ bo sran kun lele nan ɔ kun i'n, be ´kun i wie.

¹³ Sanngɛ sɛ ɔ'a bu-man ɔ'a sɛ-mɛn i nyrun'n nan sanvuɛsa yɛ ɔ nyɛnnin i'n, sran ng'ɔ kunnin sran sɔ'n, ɔ `ko fia lika nga n wa kle amun'n i nun .

¹⁴ Sanngɛ sɛ sran kun i nyinfu kun sran abɔlɛ su'n, sɛ ɔ ko fia min sɔwlɛ'n wun lɔ bɔbɔ o, amun `trɛ i nan amun `ko kun i.

¹⁵ Sran ng'ɔ bo i si annzɛ i nin'n, man be kun i.

¹⁶ Sɛ sran kun tra sran je'n, sɛ ɔ yoli i atɛ o, sɛ kusu ɔ wo i sa nun kɛ kanga sa o, man be kun sran sɔ'n b'ɔ trali je'n.

¹⁷ Sran ng'ɔ bo i si annzɛ i nin i sannzan'n, man be kun i.»

Like finlɛ nin kannin bolɛ

¹⁸ «Sɛ sran nnyɔn be ´tu ngondin nan kun fin i wiengu'n i acɔliɛ annzɛ yɛbuɛ'n, sɛ sran sɔ'n ɔ'a wu-man nan ɔ la'n,

¹⁹ sɛ ɔ kwla jaso nan ɔ nanti kpɔnman su'n, be su kun-man sran ng'ɔ boli i'n. Sanngɛ man ɔ yi sran ng'ɔ boli i'n i junman bɔ ɔ'a di-man'n i ti sika mɛn i, yɛ man ɔ yo i ayre lele san ɔ ´yo juejue.

²⁰ Sɛ sran kun fa waka bo i kanga yasua annzɛ i kanga bla nan ɔ kun i'n, man be tu i fɔ.

²¹ Sanngɛ sɛ kanga nga be boli i'n, ɔ di cɛn kun annzɛ cɛn nnyɔn nan ɔ'a wu'n, be su tu-mɛn i min'n i fɔ, afin i bɔbɔ i sran-an.

²² Sɛ sran yasua wie'm be su tu ngondin nan be ko si bla wunnzɛfuɛ bɔ i ba wulɛ cɛn nian ju-man nan ɔ wu ba'n, kannzɛ bɔ kekle ɔ'a ju-man bla'n su'n, bla'n i wun'n ɔ `de be like jɔlɛ difuɛ'm be nyrun.

²³ Sanngɛ sɛ kekle wie ju i su'n, be `tu sran sɔ'm be fɔ. Sɛ sran kun ɔ kun sran'n, be `kun i wie sie i osu.

²⁴ Sɛ ɔ bo sran kun nyinma'n, be `bo i liɛ'n wie sie i osu. Sɛ ɔ tu sran kun je'n, be `tu i liɛ'n wie sie i osu. Sɛ ɔ bu sran wie sa'n, be `bu i liɛ'n wie sie i osu. Sɛ ɔ bu sran wie ja'n, be bu i liɛ wie sie i osu.

²⁵ Sɛ ɔ fa sin yra sran wie'n, be `fa sin yrɛ i wie sie i osu. Sɛ ɔ bo sran wie kannin'n, be `bo i wie sie i osu. Sɛ ɔ yo sran wie like yaya'n, be `yo i wie sie i osu .

²⁶ Sɛ sran kun bo i kanga bla annzɛ i kanga yasua nan ɔ bo i nyinma kun'n, ɔ `yaci i nun man ɔ nyɛn i ti, i sɔ'n ti i nyinma'n i kalɛ tualɛ.

²⁷ Sɛ ɔ tu i je kun'n, ɔ `yaci i nun man ɔ nyɛn i ti, i sɔ'n ti i je'n i kalɛ tualɛ.

²⁸ Sɛ nannin kun si sran kun'n, sɛ bla o, sɛ yasua o nan ɔ kun i'n, man be to nannin sɔ'n i yɛbuɛ be kun i. Yɛ nán man be di i nnɛn'n. Nán be man sran ng'ɔ lɛ i'n i ndɛ kun.

²⁹ Sɛ nannin sɔ'n si sran'm be sɔ titi yɛ sɛ sran ng'ɔ lɛ i'n ɔ ti sanngɛ ɔ niɛn-mɛn i su'n, sɛ nnɛn sɔ'n kun sran'n, man be kun i nin yɛbuɛ, kpɛkuun be `kun nannin sɔ'n i fuɛ'n wie.

³⁰ Sɛ be kplin su kɛ ɔ yi sika nan ɔ fa to i nguan liɛ'n, sika kwlaa nga be kle i kɛ ɔ `yi'n, yɛ ɔ yi-ɔ.

³¹ Sɛ nannin'n si ba kaan kun'n, ba bla o, annzɛ yasua o, mmla kunngba'n su yɛ be `di-ɔ.

³² Sɛ nannin'n ko si kanga bla annzɛ kanga yasua nan ɔ kun i'n, sran ng'ɔ lɛ nnɛn'n, ɔ `man kanga'n i min'n i jɛtɛ ufue ablasan, yɛ man be fa yɛbuɛ be kun nannin'n.

³³ Sɛ sran kun kpɛ kunman nan ɔ'a kata-man su'n, nan nannin annzɛ aflunmun tɔ nun'n,

³⁴ sran ng'ɔ fuli kunman sɔ'n, ɔ `tannin nnɛn'n i kalɛ `man sran ng'ɔ lɛ nnɛn'n. Kpɛkuun nnɛn'n i fuɛn'n ti i liɛ.

³⁵ Sɛ sran kun i nannin si i wiengu kun i nannin liɛ'n nan ɔ kun i'n, man be yo nannin nga i nyin wo su'n i atɛ, nan be sran nnyɔn'n be cɛ i sika'n nun. Be `cɛ nannin ng'ɔ wuli'n i nnɛn'n nun kusu.

³⁶ Sɛ kusu sran'm be si kɛ nannin sɔ'n ɔ si sɔ titi yɛ i fuɛ'n niɛn-mɛn i su'n, i fuɛ'n `sie nannin ng'ɔ wuli'n i osu, kpɛkuun ɔ fɛ i fuɛn'n.»

Nnɛn wualɛ

³⁷ «Sɛ sran kun ko wua nannin kun annzɛ bua kun annzɛ boli kun'n, nan sɛ ɔ kun i annzɛ kusu ɔ yo i atɛ'n, man ɔ su nannin'n i bo nin nannin nnun, man ɔ su bua'n i bo nin bua nnan, yɛ man ɔ su boli'n i bo nin boli nnan, ɔ fa man sran ng'ɔ lɛ i'n.»