Ezipt Lɔ Tulɛ'n 2 - NYANMIƐN NDƐ'N 1998

Moiz i awuliɛ nin i bakan nun ndɛ

¹ Bian kun o lɛ, ɔ ti Levi osu'n nunfuɛ, ɔ jali Levi osu'n nun bla kun.

² Bla'n wunnzɛli, ɔ wuli ba yasua kun. Bla sɔ'n wunnin kɛ ba'n ti klanman nan ɔ'a fɛ i a fia lele anglo nsan .

³ I sin b'ɔ wunnin i kɛ ɔ fa bakan'n fia-a, ɔ yo-man ye kun'n, ɔ fali gbogbo bɔ papirus ja yɛ be fa yoli'n, ɔ wɛsɛli i wun nin gudrɔn nin waka bue nzue wie nan ɔ'a la bakan'n i nun. I sin kpɛkuun ɔ fali ko wlɛli i ndɛ'm be afiɛn Nil nzue nuan lɔ.

⁴ Bakan'n i niaan bla'n jran mmua lɔ niɛn i su nan ɔ ´wun sa nga ɔ ´ju bakan'n su'n.

⁵ I sin b'ɔ ´cuɛn nun kan'n, kpɛkuun Ezipt famiɛn'n i wa bla'n ɔ'a ba nzue dan sɔ'n nun wunnzinlɛ. Kɛ ɔ ´wunnzin'n, bla nga be su i su'n be ɔli wlan-wlanlɛ nzue'n i nuan su, kpɛkuun famiɛn'n i wa bla'n ɔ'a wun gbogbo b'ɔ o ndɛ'm be afiɛn lɔ'n, yɛ ɔ sunmɛnnin i afanniɛn bla'n kɛ ɔ ko fa.

⁶ Ɔ tike su b'ɔ ´nian-an, ba nɔnman yasua kun yɛ ɔ la nun yɛ ɔ sun yɛ. Ɔ yoli i annvɔ kpɛkuun i waan: «Ato-ɔ, Ebre'm be wa-a!»

⁷ Yɛ bakan'n i niaan bla'n bali-ɔ, ɔ usali famiɛn'n i wa bla'n kɛ: «? A klo kɛ n ko kunndɛ bla ta kun Ebre'm be nun lɔ nan ɔ wa man ba'n i nyɔnflɛn man wɔ?»

⁸ Ɔ tɛli i su kɛ: «Ɛɛn, ko kunndɛ.» Yɛ talua kan'n ´ko flɛ bakan'n i awuliɛ niɛn nin-ɔn.

⁹ Bla'n bali, famiɛn'n i wa bla'n seli i kɛ: «Fa bakan nga kɔ, nan ko mɛn i nyɔnflɛn, n ´tua wɔ kalɛ.» Bla'n fali bakan nan ɔ'a ɔ i nyɔnflɛn manlɛ.

¹⁰ Kɛ bakan'n yoli kaklaka'n, i nin'n fɛli i ko mannin famiɛn'n i wa bla'n. Ɔ kacili kɛ i klun ba sa, kpɛkuun famiɛn'n i wa bla sɔ'n waan: «Kɛ bɔ n fɛli i nzue nun'n ti'n, n ´tɔn i dunman kɛ Moiz.»

Moiz i Madian mɛn'n nun wanndi kɔlɛ

¹¹ Kɛ Moiz yoli kpɛnngbɛn'n, le kun ɔ ɔli i niaan Ebre'm bé wun lɔ. Ɔ wunnin plɔtrɔ junman nga be fa mian be kɛ be di'n. Ɔ wunnin Eziptfuɛ kun b'ɔ su bo i niaan Ebre'm be nun kun.

¹² Ɔ nian wa nian wa b'ɔ wun-man sran'n, nan ɔ'a kun Eziptfuɛ'n nan ɔ'a fɛ i saka'n ɔ'a fiɛ i aunnyan'n nun.

¹³ Kɛ i aliɛ cɛnnin b'ɔ ´kɔ Ebre'm bé wun lɔ ekun'n, ɔ ´nian-an, be nun nnyɔn be su di utre. Ɔ usali sran nga i ndɛ liɛ'n yo-man fɛ'n kɛ: «?Ɔ yo sɛ ti yɛ a bo ɔ niaan nin-ɔn?»

¹⁴ Sran sɔ'n usɛli i kɛ: «?Wan li yɛ ɔ fali wɔ sieli i é su kpɛn nin e jɔlɛ difuɛ-ɔ? ?A kunndɛ kɛ a ´kun min kɛ a fa kunnin Eziptfuɛ'n sa?» Ɔ man srɛ kunnin Moiz nan ɔ'a se i klun lɔ kɛ: «Ndɛ sɔ'n ɔ'a tru sakpa.»

¹⁵ Ezipt famiɛn tili sa sɔ'n, kpɛkuun ɔ kunndɛli kɛ ɔ ´kun Moiz, kpɛkuun yɛ Moiz wanndili Ezipt famiɛn'n nyrun ɔli Madian mɛn'n nun lɔ-ɔ. Kɛ ɔ ɔli'n, ɔ ko trannin nzue gbo kun wun lɛ.

¹⁶ Madian lɔ sraka yifuɛ'n lɛ ba bla nso. I wa bla nso'm be bali nzue salɛ kɛ be ´fa guɛ i bé si i nnɛn'm be nzue nɔnwlɛ ninnge'm be nun, nan nnɛn'm be `nɔn.

¹⁷ Kpɛkuun kɛ nnɛn kankanfuɛ'm be juli lɛ'n, be kannin bé bo. Yɛ Moiz kusu tinnin i wun ase-ɔ, ɔ jrannin talua'm be sin nan ɔ'a man be nnɛn'm be nzue.

¹⁸ Kɛ be sali be sin bé si Zetro wun lɔ'n, ɔ usali be kɛ: «Ai! ?Ɔ yoli sɛ bɔ ndɛ amun ba ndɛ sɔ-ɔ?»

¹⁹ Be tɛli i su kɛ: «Eziptfuɛ kun deli e nnɛn kankanfuɛ'm bé sa nun, kpɛkuun ɔ sali nzue mannin e nnɛn mun bɔbɔ.»

²⁰ Ɔ usɛli i mma'm be kɛ: «?Yɛ bian sɔ'n wo nin? ?Ɔ yo sɛ ti yɛ amun yacili i lɔ-ɔ? Amun `ko flɛ i man ɔ wa di like.»

²¹ Moiz kplinnin su kɛ ɔ nin bian sɔ'n be ´tran. Zetro fɛli i wa bla kun mɛnnin i kɛ ɔ jɛ i. Be flɛ i kɛ Sefora.

²² Bla'n wuli ba yasua kun. Yɛ Moiz waan: «Afin bɔ m'an kaci aofuɛ mɛn uflɛ wie nun nin-ɔn, n ´tɔn i dunman kɛ Gɛrsɔm, i bo'n yɛlɛ kɛ: M'an Fia Wa.»

Nyanmiɛn yili Moiz kɛ ɔ de Izraɛlfuɛ mun

²³ I sin b'ɔ cɛ lele'n, Ezipt famiɛn'n wa wuli, sanngɛ i blɛ sɔ nun'n, wuun Izraɛlfuɛ'm be tɛ o kanga'n nun. Be kplin, be sun. Be kpanlɛ'n toli Nyanmiɛn lɔ.

²⁴ Nyanmiɛn kusu tili be sun flɛlɛ nga be sun flɛli i'n. Kɛ ɔ tili i sɔ'n, ɔ man i wla kpɛnnin aenguɛ ng'ɔ nin Abraam, nin Izaak, nin Zakɔb be trali'n su.

²⁵ Kɛ Nyanmiɛn niannin Izraɛlfuɛ mun'n, kpɛkuun be yoli i annvɔ.