Ezipt Lɔ Tulɛ'n 19 - NYANMIƐN NDƐ'N 1998

NYANMIƐN NIN IZRAƐLFUƐ'M B'A TRA AENGUƐ Nyanmiɛn waan ɔ nin Izraɛlfuɛ'm be ´tra aenguɛ

^1-2 Izraɛlfuɛ'm be tuli bé bo Refidim lɔ. Kɛ be tuli Ezipt lɔ'n, be anglo nsan su'n i cɛn klikli'n su'n, be juli Sinai aawlɛ flɛnnɛn'n nun. Be kpɛli be ngblaliɛ aawlɛ flɛnnɛn'n nun Sinai oka'n i wun lɛ.

³ Moiz fuli oka'n su kɛ ɔ ´ko wun Nyanmiɛn wun. Nyanmiɛn o oka'n i ti su lɔ, ɔ flɛ Moiz seli i kɛ: «Ndɛ ng'ɔ fata kɛ a kan kle Zakɔb i awlo'n bɔ yɛlɛ Izraɛlfuɛ mun'n yɛ:

⁴ ‹Amun wunnin sa nga n yoli Eziptfuɛ mun'n yɛ amun wunnin wafa nga n fa fali amun m bali mín wun wa'n. Kɛ anunman nyin fa lolo i mma mun, kɛ n kusu n lololi amun sɔ-ɔ.

⁵ Siɛn liɛ'n, sɛ amun ti ndɛ nga n kan kle amun'n i kpa'n, sɛ amun nian aenguɛ nga e nin amun e tra'n su kpa'n, amun ´yo min nvle b'ɔ ti min liɛ klonglo nvle kun nga'm be afiɛn, afin asiɛ wunmuan'n ti min liɛ.

⁶ Sanngɛ amun liɛ'n, amun wa yo min nyrun jranfuɛ'm be nvle. Amun nvle sɔ'n ´yo min liɛ klonglo.› Ndɛ nga a wa kan kle Izraɛlfuɛ mun'n yɛ ɔ o lɛ-ɔ .»

⁷ Moiz sɛli i sin ngblaliɛ'n nun lɔ, ɔ flɛli Izraɛl kpɛnngbɛn mun nan ɔ'a kan ndɛ nga Anannganman kan kleli i'n i kwlaa ɔ'a kle be.

⁸ Nvlefuɛ'm be kwlaa be tɛli su kɛ: «Like kwlaa nga Anannganman waan e yo'n, e ´yo.» Moiz ko kannin i su nga be tɛli i'n kleli Anannganman.

⁹ Kpɛkuun Anannganman seli Moiz kɛ: «N wa ba ɔ́ wun lɔ. Sin wɛnsrɛn kpikplikpi kun nun yɛ n ´fia-a kɛ ɔ ´yo nan kɛ n ijɔ kle wɔ'n, Izraɛlfuɛ'm b'a ti nan b'a lafi ɔ su titi'n ti.» Moiz kannin i su nga nvlefuɛ'm be tɛli'n kleli Anannganman.

Nyanmiɛn nin Moiz be yiali Sinai oka'n su

¹⁰ Anannganman seli Moiz ekun kɛ: «Sa ɔ́ sin sran'm bé wun lɔ nan se be kɛ be `yo bé wun saun ndɛ nin ainman. Be `kpu be tralɛ mun.

¹¹ Man be siesie bé wun be minndɛ ainman sin, afin cɛn sɔ'n nun n wa jra Sinai oka'n su sran'm be kwlaa be nyrun.

¹² Ja awɛ tɛɛn man ɔ́ sin yia oka'n nan se be kɛ: ‹Nán amun fu oka'n su, nán amun mɛntɛn i'n bɔbɔ. Like kwlaa ng'ɔ mɛntɛn i'n be ´kun i.

¹³ Sɛ sran o, sɛ nnɛn o, sɛ ɔ mɛntɛn i'n, be su yaci-mɛn i lɛ. Be su fa-man bé sa be kɛn-mɛn i, sanngɛ be ´to yɛbuɛ be fin i annzɛ kusu be ´to ta mma mun be sɛnsɛn i. Kɛ awɛ'n ko tɛ'n yɛ sran wie'm be ´fu oka'n su lɔ-ɔ.› »

¹⁴ Moiz fin oka'n su lɔ jrali nvlefuɛ'm be wun wa. Ɔ yoli man be yoli bé wun saun. Be kpuli be tralɛ mun.

¹⁵ I sin ɔ seli be kɛ: «Amun `siesie amun wun amun `minndɛ ainman. Nán amun nin amun yi'm be la nna tɛ.»

¹⁶ Cɛn ba nsan su'n, i nglɛmun nun'n, be tili kɛ nyanmiɛn su kpan kplannan kplannan oka'n su lɔ. Be wunnin kɛ nyanmiɛn'n kpa sin piapiapia lɔ, yɛ be wunnin sin wɛnsrɛn kpikplikpi kun lɔ ekun. Be tili awɛ kun tɛlɛ kekle kpa. Kɛ Izraɛlfuɛ'm be o ngblaliɛ'n nun lɔ'n, be usuli kpa'n sa tututu.

¹⁷ Moiz fali be ngblaliɛ'n nun lɔ fiteli kɛ be wunnge Nyanmiɛn wun lɔ. Be jrannin oka'n i bo lɛ.

¹⁸ Sin wɛnsrɛn'n fali oka wunmuan'n, afin Anannganman jrali sin'n i afiɛn. Sin wɛnsrɛn'n jaso mlemlemle kɛ ngbɛ nun sin wɛnsrɛn sa, yɛ oka wunmuan'n kejeli kpa.

¹⁹ Awɛ'n i tɛlɛ ng'ɔ su tɛ ba siɛn'n, laa li wuun ɔ'a tɛ-man. Kɛ Moiz ´ijɔ'n, wuun Anannganman tɛ su, ɔ tɛ su kekle kpa, wuun nyanmiɛn'n kpla.

²⁰ Anannganman jrali Sinai oka'n i ti su nglo lɔ, ɔ flɛli Moiz, nan Moiz ɔ'a fu oka'n su lɔ.

²¹ Anannganman seli i kɛ: «Ko kan kle sran'm be kɛ nán be wanndi bla min nianlɛ. Sɛ be yo i sɔ'n, be nun kpanngban kpa be ´wu.

²² I kpa'n bɔ man min nyrun jranfuɛ bɔ be lɛ atin be mantan min'n, be `yo bé wun saun kɛ ɔ ´yo nan m'an saci-man be'n ti.»

²³ Moiz tɛli su kɛ: «Sran'm be su kwla fu-man Sinai oka'n su, afin ɔ bɔbɔ a seli e kɛ e `ja awɛ tɛɛn sin yia oka'n nan nán sran fi mɛntɛn i lɔ.»

²⁴ Nan Anannganman ɔ'a se i kɛ: «Kɔ, jra ngblaliɛ'n nun lɔ, i sin a nin Aarɔn be `fu wa. Sanngɛ nán min nyrun jranfuɛ'm be nin nvlefuɛ'm be se kɛ be kpli be ´fu ba mín sin wa, kɛ ɔ ´yo nan m'an saci-man be'n ti.»

²⁵ Moiz jrali, yɛ ɔ ɔli nvlefuɛ'm bé wun lɔ ko kannin ndɛ sɔ'n kleli be-ɔ.